|
網友小潘引述一個報章理財個案，話一個月入1萬餘的銷售員，之前亂使錢，而家身家2.5萬元，尚欠9000元分期購物咭數，現已控制開支，希望9年後結婚，想買間樓350萬元。小潘的問題是呢個仁兄咁少錢都想買樓，他係唔係太保守。
好多人會覺得銷售員先生出現一個計數問題，要買350萬元的樓，單計三成首期已經要105萬，加埋使費起碼要110萬，佢這種收入這種儲蓄方式，9年後無乜機會達到呢個目標。
我就覺得唔止係計數問題，係理財問題。香港中小學無教理財，大學無教理財，社會只教人消費，唔好怪後生仔係「月光族」，呢一族人勢力龐大，理直氣壯，君不見開G20峰會的主要爭議係各國應唔應該節約開支，欠億13萬億的美國總統奧巴馬大力叫各國唔好節約開支住，以保持經濟增長。你美國不斷印銀紙暫時仲有人信，唔等如其他國家可以咁做，美國這個全球最強國家鼓吹「先使未來錢」的消費文化，世界各地有咁多月光族，又有乜出奇。
我覺得銷售員先生唔使計數啦，佢而家條數差太遠，莫講話350萬元的樓，150萬的樓也未必買得起，買?亦未必供得起，因為結完婚生埋仔開支好大，供得仔供唔到樓。佢最需要的端正營運自己人生的概念，從增收節支開始，每月賺1萬幾元太少啦，我唔係叫佢罷工叫老細加人工，而係叫佢力爭上游，做個top sales先至講，每月搵1萬幾，同每月搵3萬幾，差好遠啦，同老細扭計無用，要提升自己的戰鬥力，博命?，才可以升職加薪。每個銷售團隊都有一兩個人可以跑出來，就要做跑出來呢一兩個。增加收入重要過一切。
另外，當然係節約開支合理投資，後生仔最好唔用信用咭，如果有扣數咭，有錢至可以用，咁就最好啦，銷售員先生欠咭數9000元，佢話有2.5萬元儲蓄，我就唔明佢為什麼不馬上還清咭數 ，而係仲去俾10幾厘息的咭數。控制開支之餘，仲要不斷發狂儲錢，投資在有增長的大股上，9年唔係短時間，投入的時間合理，本金可以翻一兩翻。咁樣條數變成佢9年內會唔會累積儲到30、40萬本金，再透過投資變成過100萬以上，投資時，唔輸、少輸係重要關鍵。增收節支，儲錢投資，呢8個字，真係學一世都未學得完。
陸羽仁 |
|
|
