|
今次破天荒分上中下三篇講解，先和大家打個底，以下是一位年輕面書友兼忠實讀者，兩年多前和我的私訊:「我好唔開心，公司話生意差要cut開支，剛剛被老闆炒過唔到年！同我同期入另一個有得留低，我冇！大家平起平坐，只不過我唔識講說話及唔識睇面色做人。我做嘢超投入跟得貼上心，論經驗、學歷、勤力都比他好，全年都冇遲到早退，而他一年遲到十多次，又無故曠工，預支年假，返工玩電腦樣樣齊。老闆話我怕蝕底斤斤計較，話我怕蝕底？明明大家平起平坐，公司所有『下欄嘢』都已經係我做晒，做跑腿叫飯買飯都是我出錢先又要出力，執貨倉粗重嘢都係我，反觀佢淨係坐喺度，咁都話我怕蝕底？」 「仲有我上司話我難教難駕馭，佢叫我做嘢我唔聽佢話，有自己一套。其實係咪請人着重易駕馭？好多都唔鍾意請太有經驗，我公司就係咁，請後生女諗住易教聽話，咁即係點？我做嘢又快又準，精益求精，都冇得留低，反而留一個遲到王，呢間公司發展前途有限！」 我當時答他：「你心情唔好我可以理解，待你心情平復之後試細心想想你上司對你的評語，其實你為甚麼冇得留低的原因呼之欲出！你要吸取今次慘痛的教訓，否則就真的是total loss了！不經一事不長一智，不要怨天尤人，除了勇敢面對還須拿出決心改及克服自己的弱點。Son姐為你打氣！」 老闆請人，最基本要求，無非必能為自己所用。坦白講，蠢其實一點沒有問題，總有可用得着的地方。但自恃聰明目空一切，自把自為一知半解叻唔切，橫衝直撞成事不足敗事有餘，死得人多。 兩年多後，突然又再收到他傳來的私訊，展開了以下對話：「你覺得我再咁樣個個星期五返大陸開會，仲有咩前途？我已經維持了一年多了，做呢份工冇乜前途，初時一個月一次會，整整下一星期一次，又唔見解決到公司嘅問題，銷售量有乜突破，你話呢啲咁官僚主義嘅公司，我真係勁想走！」 「走？當然可以，但係走去邊？你的性格，主宰你的命運！從頭再看了一次我們的對話，你怎麼沒有成熟過？匹夫之勇不可逞，你有幾多光陰可以虛耗，又有幾多條命夠死？你還是依舊自負，EQ、AQ都低，不怕得罪講句，大器難成！ 「投訴抱怨誰不會？你有沒有真正面對克服？我不想再聽投訴，有沒有方法可以提供參考等我畀意見？ 「好，我會反省一下，我已經同老闆講過唔想個個星期返大陸，可能兩星期返一次，但佢想我一星期返兩次，因為佢唔想stay咁耐在大陸！其實現時做的生意國內好多人做，可是做得好嘅唔多，好多都係賣假貨起家，我唔想再留喺度賣假貨了！品質一點保證也沒有，還有好多投訴，我會諗辦法，呢度冇乜前途！」 「你並沒有捉到問題的軸心，你的價值究竟何在？不是你自己認為，是在你老闆眼中心目中的，你明白嗎？」 「明白，老闆畀好多機會我做，因為佢都是新手老闆，公司開始了兩年多，佢完全做嘢唔策劃，諗到乜就做乜，好多出事，都係我提醒佢！呢個老闆雖然懶，但就是因為佢乜都唔做乜都唔理，我一個人成套嘢建立了出來，物流、採購、清倉、銷售推廣、培訓……」 「你以負面看事物，看到的只能是負面。你不要搶答，靜下來想想我話中所指，你太自我，領悟不到我的提示！」 「明白，應該正面一點看事情！明白，唔應該太多抱怨，自己諗辦法！」 「你人際關係，還有人緣，都不會好，事事以自己觀點角度及感覺做依歸，人家看你，一樣難頂！試換個角度看，你要是和一個像你一樣的人共事，或者用一個和你一樣的下屬，會點？」 「Good reminder, thanks！抽離自我中心，試以人哋觀點來看事情。」 「你好好反省！人必先自省，才有資格省人！客觀，明白未？」 「明白，謝謝你，自己先好好反省。」 最後收到的，是這個訊息「真的謝謝妳，做人做事要客觀，我老闆終於明白了我一直以來的道理了，成功點化了他，不再亂入貨大包圍，好好規劃一下公司嘅貨型策略，人員貴精不貴多，採購及銷售，物流策略，這樣才好做，之前一直做到趴街冇成效，現在我嚟策劃了之後好咗好多！」 雖然長篇，不過不是大論，我決定公開，是希望透過與這位年少氣盛心高氣傲的小友的對話，可以令大家同有得着。 他的遭遇情況，憤憤不平的種種投訴，覺得自己全部做得對反而被針對，黑狗得食白狗當災，到底意難平！職場中慣常見得很。 份份工都話冇前途，究竟是否真正黑仔王，頭頭碰着黑？還是自己盲目，看不到還是無視自己盲點缺點的存在？ 這個真實案例，當中轉變及玄機，要是願意花時間代入以不同身份角色角度思考分析一下，要真正參得透須假以時日經驗，但對不管做人還是做事，保證都會大有得着。 真正聰明人，會從其他人犯的錯中學習；一般人會在自己犯的錯中學習；蠢人則會不停犯錯做反面教材供他人學習。 張慧敏 |
|
|
