|
端五 来自畸笔叟 00:00 10:38 今朝开始，小长假了。本来想歇搁两天，不写了。为啥呢？ 因为本来小长假想到杭州去，西湖旁边走走，散散心。啥晓得交关朋友侪劝我覅去，讲人实在太多了。人多么，到处侪人多嗰呀，嚇点啥？ 有位朋友就讲了：侬晓得西湖旁边，人多到啥个程度否啊？啥程度？迭能讲，交关游西湖的朋友只想好好教做人根本不想投湖自杀，歇歇被人挤到湖旁边甚至差点挤下去。而有些真正心里想不通真的要投湖自杀的人，反而随便哪能挤也挤不到湖旁边。早上死到夜里也没死成功。 好吧，算了。 端五节讲点啥呢？喏，前两日有朋友帮我留言，问：听说过端五节不好送粽子给人家么？为啥？伊讲，送粽么谐音送终呀，不吉利。 要死快了。不晓得各位听见过否啊，我是没听见过。 我只听说，送人礼物，送只表不碍，送只钟有点问题。因为送钟谐音送钟。啥辰光听到的？好像1990年以后。后来又出新版本2.0，讲送钟的辰光再加送一本书，就叫做“有始有终”，就不碍了。 一样规矩，歇歇会得变的，总归好像不正宗。真要是老祖宗规矩，啥人敢变？ 还有了。讲到医院或者人家屋里去看望病人，送水果比较大路。不过不好送生梨。因为梨者，离也。侬送了人家蛮远嗰。啥辰光开始传的？大概1980年代中后期。 因为老早，至少1970年代，我有一趟在医院陪一个朋友，陪了好几天。亲眼看见，来来往往，看望病人的，手里拎的，苹果香蕉橘子生梨侪有的。碰着啥个水果上市买啥个，毫无禁忌。 据说送“伞”也不好送。朋友来的辰光，天是好的，回去辰光落雨了。哪能办？只好借畀伊，不好送畀伊。伞者，散也。现在时髦讲法：友谊的小船讲翻就翻了。情人恋人之间尤其不可造次。再问一声，啥辰光听到的？好像也是大概1980年代中后期。 因为1970年代，大家习惯到别人家屋里做人客，三日两头碰头嘎讪无。碰着落雨的概率不低。主人家拿伞递过来，有辰光会得多一句嘴：“侬拿去好唻，阿拉屋里交关了，用不着还了。” 友谊小船从来也不看见因此而翻忒。 还可以举一个例子。云片糕。 也不晓得从啥辰光开始，云片糕成了“白喜事”的专用品。当然现在又不流行了。不过，有一段辰光，好像也是大概1980年代开始，总有十几靠廿年，侬假使拎仔云片糕去做人客，搿是有大头耳光吃的。 我就弄不懂了。我小辰光不止一次看到有人拎仔云片糕走人家的。自家买点吃吃也是寻常事。老的食品店营业员还活着呢，可以去问的呀。 白喜事里，除了云片糕，还有交关怪事体。啥个去火葬场的车子么不好原路返回。据说死人要跟得来嗰。所以到仔屋里门口还要跳火圈，隔断阴阳。啥辰光开始的？大概也是1980年代中后期。 这个我也不理解。刚刚哭得死去活来，巴不得哭得伊活转来。哪能一歇歇又覅伊跟转来了呢？真的能够跟转来是好事体呀，求之不得了。要么刚刚是假哭。 为了这桩事体，以及上述千奇百怪的所谓风俗，我称之为“伪风俗”，我曾经反复请教过家父以及其他前辈。家父说得言之凿凿：从来没听见过。乡下头也从不流行。 最近有人考证，当下流行的婚礼习俗，源自于1990年代初一家台湾婚庆公司的创意。中不中，西不西，洋不洋，腔不腔。双方家长侪上台过一把领导发言的瘾头。用词之伧俗、句式之陈腐、语气之官腔，真是难听之极。 面前冷盆喷香，就是不晓得啥辰光动筷子。 要命的是，上述所谓“伪风俗”虽然流行得不久，却流行得很。大家侪不但乐意接受，而且身体力行。还要劝别人家做。甚至还误以为这些侪是我中土的传统文化。 谢谢一百谢。我可以肯定地讲，这根本不是阿拉海派文化。要么就是啥人胡编乱造，要么就是1990年代“民工潮”带得来的北方乡下陋习。 今朝还好是过节，我只好言话讲得客气点了。 “伪风俗”之所以流行，正是因为现在人侪门槛贼精。侬提出疑问，要得罪亲眷朋友的呀。去做了，兜一圈，跳盆火，又不烦难，何必呢。 但是大家想过否啊，假使侪没人质疑，这些“伪风俗”将来就侪要变成“国学”了！ 现在人哪能了？老早屋里大人，文化程度不高，不过，“姜太公在此，百无禁忌”的豪气还是有的。现在这种豪气侪到啥地方去了？其他不谈，至少以上这些忌讳，几乎侪不大气。不大气就是小家败气，网络讲法就叫“屌丝”。 唉，全民屌丝化，正未有穷期。
|
|
|
