《桃源河上个桥》 原稿作者:徐自读 方言朗读:陈一兵 由衷感谢陈一兵先生热忱提供方言朗读音频与方言文稿 欢迎大家提供各种形式的方言文化作品 留住乡音,公益同行 好消息 本期留言前20名 获赠一本《宁海话》 赶快留言哟 联系地址请另写一条留言告知 绝对不会公开 赠书者:《宁海话》作者陈一兵
桃源河上个桥 上世纪五十年代,宁海桃源路还勒一梗蛮阔个河。个梗河嗷桃源河,从南到北有四洞桥,勒桃源桥、步云桥、春浪桥、木板桥。介且啦!桃源河个水梗青个,水草碧绿个,一蓬一蓬个鱼虾勒河迭划来划去!河岸头弹勒石子路,木结构个老屋沿河而起。勒个段小桥流水、炊烟袅袅个桃源河,弗晓得发生勒嘈点生动有趣个事干。 杨柳巷口个步云桥勒一洞环洞桥,两横种了杨柳树,杨柳巷、杨柳村个嗷法便闯来个。桥边迭有一株一抱粗个溪椤树,树边个空地便勒吴桂龙柴行,一梗大杆秤呆高高个挂勒树桠叉迭。个吴桂龙生勒两个囡,同班拜长街老本王志文为老师头。后底,柴行传搭两个囡,个班市面上混混个浮头鱼,晓得两姊妹有点生活头,都呒胆来寻生事。 步云桥个西面,有爿同善社,城关派出所勒堆办公。老张勒所长,老寿勒城关个“百晓”,何份人家住勒何堆坞采、几弄几幢几号,都摊勒其肚里向。老鲍个打个晓得个,尿屙个小事干,小人勃嘴、打相打,大人呢都会寻其做中央人。老底子啦!小人个尿屙都好甮整捉,屙一落地,便搭黄狗抢敖滑石精光。宁海人讲脾气推板个人,有一句说话:尔个讨饭性格会改啊?除非黄狗弗吃屙!五十多年过去了,有般人“火暴躁”个性格到个且都还呒不改敖啦,月间个黄狗反使都弗吃屙来。 城中小学墙弄头出来便勒春浪桥。个洞石拱桥上面生勒芜苔搭水草,桥栏杆好相猛。桥脚下鲫鱼夹整蓬敖,钓鱼人都勒个横扎米塘。桥个西头勒宁海发电厂,听起来发电厂蛮海会个,讲原情,便勒独台个单缸发电机,个力道望弗如手扶拖拉机,靠手摇才会旋起来,弗顺个且,还要盘一梗呆粗粗个老麻绳,几个人同班嗷“一二三”!用力一记,才会旋起来。哒哒叫个响声震得地都会抖啦,晦气桥脚下个钓鱼人,便上钩个鱼逃敖一梗都呒不剩啦。。 春浪桥个东头,一到夏天卦个日昼头、夜晏跟,一班一班各人都互搭桥头两横,掼眠椅个掼眠椅,掇矮凳个掇矮凳,挈杌头个挈杌头,团栾四圈排拢来,摇摇蒲扇,乘乘风凉,譀譀大话。生意人呢也跟迭忙起来,我顶晓得便勒 “老牌针”婆合搭“南瓜子花生”公。格个婆,面前裥横勒一块木板,用一梗裤腰带吊勒后司颈,木板迭排勒大大小小个缝衣针、钉被针、絜鞋底针,都嗷“老牌针”,大家人都弗晓得个婆姓告呣嗷告呣咯,便把“老牌针”当其名字来嗷。弗管红猛日头,还勒乌风猛飑,桥头桥尾长日听闻其来得嗷 “老牌针……卖老牌针来……”。个喊腔卜落个嗷卖声,个簇细笔尖个缝衣针,是勒其一份人家5个人过日脚个望头。还夷个“南瓜子花生”公,炒瓜子会得猛!其炒个南瓜子花生,鼻头都香落敖啦,二三分一酒盅个南瓜子,大家人吃敖嘴巴嗒嗒都还想吃啦。 从春浪桥望北弗到一百米,有一洞木板桥。桥个东头,便勒宁海中学,桥个西头,有一廑车门朝东个石板明堂,嗷“大利元”,老底子个宁海人都晓得个,“大利元”专医疔疮个。当家人丁阿婆良心好得猛。其有“针挑放脓放血”个医术合得祖传个乌药膏,搭其医好个人木牢牢。其从边弗向人家讨药钿个,捉其嘈点便嘈点,尔日脚难过,其便一分都弗要。我十二岁勒顺脚个脚板背迭生勒一只疔疮,其十多两日便拨我医好来,我从小便记牢丁阿婆是勒我个救命恩人。 桃源桥勒城里顶闹热个坞采,市日头人叠倒成山敖。桥个东头勒东大街,笔直通搭东门花楼殿,桥个西头勒中大街,骨直通搭西门杏树脚。解放前,同善社南面有一只海道司井,井边迭庉了一对做白酒䣲个俩老倌。我看嗷其白酒䣲公、白酒䣲婆。其看有两个儿,小儿当勒空军,大儿原旧来迭卖白酒䣲,凭其自家刮刮叫个手艺,白酒䣲卖得兴香拍门敖。其弗管上高落低,雨打日头晒,每日起早落晏担勒货郎担,勒桃源桥春浪桥个两头旋,大家人都嗷其“白酒䣲宏”。每回其货郞担一放落,总有一大班人互拢去,争着买喷香个白酒䣲。搭尔讲,五分一碗个白酒䣲,勒介且算顶好个接力。有些讲究个买主还要加一只鸡蛋,白酒䣲宏便点好洋油炉,拨打散个鸡蛋倒搭白酒䣲迭拌均,个一大碗达达烫个白酒䣲卤蛋便捧搭头前,买主付勒一角钞票,便“霍落霍落”个啜起来。互勒边迭好几十个小人,眼睛乌溜溜个盯着买主,相其一口一口啜光白酒䣲卤蛋,个加个都熬弗牢咽了好两回个涎唾卤。 小桥流水、袅袅炊烟个桃源河变成勒桃源路,河岸头个桃花搭杨柳也成为长久个记挂。蛮多个宁海人,都弗晓得勒桃源河上搒着过个事干。呒数年岁大了,我越来越记挂介些老屋老景。亏得宁海还有前童、黄坛。
注释: 嗷:叫。 打相打:打架。 勒:是,在。 扎米塘:下鱼饵。 嘈点:多少。 梗:根,条。 旋:绕,转。 闹热:热闹。 日昼头:中午。 市日头:集市日。 阔:宽。 夜晏跟 :黄昏。 叠倒成山:人山人海。 介且:那时 。 掼:扛。 自家:自己。 便:就 。 掇:端。 刮刮叫:顶瓜瓜。 树桠叉:树丫。 挈:提。 白酒䣲(音同“板”):酒酿。 划:游。 杌头:无背小凳。 白酒䣲宏:钱久宏。 团栾四圈:四周。 兴香拍门:门庭若市。 囡:女儿。 譀大话:侃大山。 上高落低:跋山涉水。 老师头:师傅。 浮头鱼:二流子 。 红猛日头:烈日炎炎。 起早落晏:起早摸黑。 呒胆:不敢 。 乌风猛飑:暴风骤雨。 顶好:最好。 寻生事:滋事。 听闻:听见。 接力:点心。 爿:家。 喊腔卜落:嘶哑。 洋油炉:煤油炉。 百晓:样样懂。 过日脚:过日子。 达达烫:滚烫。 坞采:地方。 望头:盼头。 啜:吃。 车门:大门。 互:围。 勃嘴:吵架。 廑:幢 乌溜溜:黑溜溜。 石板明堂:大四合院 相:看。 熬弗牢:挺不住。 涎唾卤:唾液。 弗晓得:不知道。 搒着过:碰到过。 告呣:什么 火暴躁:脾气火暴 滑石精光:一点不剩 |
|