|
讲起上海言话里的“弄”字，真是有点“弄僵”。为啥？因为侬弄仔半半六十日，还是弄伊弗清爽。 单讲读音，就有三种。 long（上声）、nong（上声）、nong（去声）。 除了里弄、弄堂，作名词解时，读long（上声），大家不大会弄错，一旦作动词，就麻烦了。 简单举两个例子。 弄僵，要读nong（上声）；弄怂，就要读nong（去声）了。 不过有人讲，nong（去声）僵，nong（上声）怂，也没啥不可以。 那就更加弄不清爽了。要看上下文再定了。 还有弄白相，弄坏忒。反过来好像也还可以。侬弄得清爽否啊？ 本来，汉字博大精深。一个“弄”字，是会意字。上头一半其实是“玉”字，下头一半，读gong，像两只手。所以，弄的本义就是把玩玉器。 所以，弄弗过伊，就是白相弗过伊。 弄弗落，就是白相弗来。 弄空头，弄虚头，就是白相空屁。 弄弄就刮三，或者弄弄就喇叭腔，就是“玩不转”。 弄弄大，就是“玩大了”。 从这个意义上讲，“弄白相”好像有点叠床架屋。其实不然。“弄白相”的意思是不是真的白相，而是弄弄白相相。要死，越加弄弗清爽了。 后来，慢慢的，“弄”又有了“做生活”的意思。 现在还有人这样讲，伊弄仔好几年股票了。十年前头伊就弄房地产了。 而在老底子，“弄缸甏”就是白相杂技，顶缸嘛。“弄猢狲”，就是白相“猢狲出把戏”。“弄嘴头”，就是吃开口饭，唱戏啊，教书啊，侪是“弄嘴头”。而“弄笔头”则是写文章，写状纸，不是记者，就是律师了。 黑社会也叫“弄”。比如“弄手脚”、“弄头颈”，侪是刁难的意思。而“弄乖”则是耍小聪明，耍花招的意思。 如果一个人，样样不会弄，黑社会也不会弄，又哪能讲法？也有的，叫“弄卵”。侬搿样也不会，伊样也不会，搿么只好“弄卵”了。 再后来，“弄”又有了“搅”的意思。 比方讲，“侬弄弄清爽噢!”一定不是叫侬把玩起清爽，也不是叫侬做清爽的生活，而是叫侬“搅搅清爽”。 还有一句，“弄得我没方向”，也是“搅得我没方向”的意思。 最后来讲一段我自家的亲身经历，来说明上海言话里“弄”字的博大精深。 16年前，我在一次例行体检中被查出高血压。领导很重视，叫我到华山医院做了各种检查。最后，请D院长与我面谈。 D院长是的的刮刮上海人。一个“弄”字，用得出神入化。 下面一段对话，不是上海人还真难听懂。 “搿么，侬两样家什侪弄嗰啰。” “弄嗰弄嗰。” “弄得还蛮结棍嗰啰。” “结棍嗰结棍嗰。” “乃末好弄忒唻。” “弄忒伊，弄忒伊。” “两样侪弄忒啊？” “侪弄忒，侪弄忒。” “一记头侪弄忒，侬吃得消否啊？” “吃得消吃得消。” “也覅忒吃力。我看先弄忒一样吧。” “好，弄忒一样，弄忒一样。” “侬准备先弄忒啥？” “随便，随便。” “一样要弄忒一样么，我劝侬先弄忒香烟。” “好，弄忒香烟，弄忒香烟。” “老酒么，我看侬一时头上白的也弗敢吃。” “对，弗敢吃，弗敢吃。” “稍许弄眼红嗰。不过也覅多弄。” “晓得了，晓得了。谢谢D院长。” 唉，D院长，我总归一生一世也弄弗过侬。 （全文完） 广而告之： |
|
|
