|
今朝，侬还勒用扇子伐 作者：陈鲁民 改编：郭莉 朗读：孙维陵 （朗读者近照） 大热天，热得吃勿消。小扇子就派了大用场。勒呒没空调、电风扇之前，扇子绝对是热天介个主角，无论是士、农、工、商，做官个还是平民，恨勿得一人一把，用来驱赶大热天好热气，带来阵阵凉意。所以，扇子别名就叫做“凉友”。就算是空调、电风扇高度普及个现在，勿少中老年人还是对扇子情有独钟。一扇在手，随时相伴，优哉游哉，不亦乐乎。伊拉觉着，扇子方便自如，带来个勿仅是自然风，还好节约能源，又好锻炼手臂膊，好处真是勿勿少少。 扇子最早叫“五明扇”，据说是虞舜发明制作个。开始辰光，伊是一种礼仪个工具，后首来再慢慢叫从地位搭权力个象征，转变成纳凉个生活用品。扇子个材质原来就是羽毛个，后来种类越来越多，包括羽毛扇、芭蕉扇、蒲扇、团扇、折扇、绢宫扇、泥金扇、黑纸扇、檀香扇，名堂交关多。 历史上顶出名个是诸葛亮个鹅毛扇。人家侪是“眉头一皱，计上心来”，伊是扇子一摇，就有锦囊妙计。后来，人家就拿伊眼足智多谋，专门搭人出谋划策个角色称为“摇鹅毛扇个”。瓦岗寨里个徐茂公，梁山浪个吴用，朱元璋手下个刘伯温，李自成麾下个牛金星，洪秀全倚重个洪仁玕咾啥，侪是搿牌人。 当然，名声在外个，还有《西游记》里铁扇公主个芭蕉扇，可大可小，有真有假，威力无穷，变幻莫测，让只活孙吃仔勿少苦头，大费周章。最后巧施妙计，钻到铁扇公主个肚皮里去了，总算逼伊交出了宝扇，扇灭了八百里个火焰山，开辟了取经之路。 扇子还可以做兵器。《水浒》里向有个好汉叫宋清，位子勒一百单八将里个第76位，名号是“地俊星铁扇子宋清”，不过，伊个“铁扇子”从来也呒没看见伊用过一次，做个侪是“掌管专一排设筵宴”个事体。金庸武侠小说里使用“铁扇子”个好汉倒是勿少，看起来潇洒飘逸，总归还勿如刀啊剑啊用起来顺手，好像也呒没扇出过啥像样个大侠英雄。 扇子种类有交关，所以是勿好乱用个，啥个人用啥个扇子是有讲究个，要用搭自家身份相符个扇子再好，要勿然是会得拨人家笑话个。军师、谋士要用鹅毛扇，摇发摇发点子就来了；咬文嚼字个书生文士要用折扇，十八相送里向梁山伯祝英台就是一人一把折扇；躬耕田野个乡下老农民嘛，一般就用蒲扇了，因为价廉结实；荡荡悠悠个小巷里向个闲人欢喜用芭蕉扇，因为伊轻快随意，携带方便；娇滴滴个大户人家个贵妇、小姐，葛末是专用团扇个，假使扭捏扇子个腔调得法，倒是好平添几分姿色，侬看林黛玉用扇子拿小嘴巴一遮，搿万般风情就叫贾宝玉挡勿牢了。 还有唻。从前辰光用扇子个动作搭仔扇个部位也是有讲究个。儒雅文人，扇起扇子来大多数是勒胸前，动作幅度比较小，看起来文静洒脱；武夫兵将一般性格粗爽，动作幅度就大，常庄是扇勒腹部。正所谓“文胸武肚”嘛；做奶妈、保姆个，坐在欸搭，一手抱牢小囡，一手扇小腿，怕风大直接扇勒小囡身浪勿好；当差役个下属、仆人，跟勒官员身边，唯唯诺诺，用起扇子来一定要一半扇拨主人，一半带勒自己，勿好只扇自家个。不过伊拉搿种官员一上朝就作孽了，皇帝身后有两个宫女搭伊打扇子，大臣勒下头就只好汗嗒嗒渧，一心只想快点退朝。 扇子也是诗人顶顶欢喜个，留下来勿少佳句。汉代班婕妤《团扇歌》搿能写：“新裂齐纨素，鲜洁如霜雪。裁为合欢扇，团团似明月。”构思奇妙。唐代白居易《白羽扇》是搿能个：“素是自然色，圆因裁制功。飒如松起籁，飘似鹤翻空。”意趣清新。宋代李石个《扇子诗》又勿一样：“冷热衰盾之日，清和夷惠之风。天运自有常度，世态人情不同。”朴实本真。最有名个当然还是清代纳兰性德个句子：“人生若只如初见,何事秋风悲画扇。”写人跟咏唱扇子浑然一体，至今还是广为传诵个。 现在，平常还是欢喜拿扇子个大概是搿几种人，一是说书先生，二是相声演员，因为扇子是伊拉重要个演出道具；三是着棋个，四是书画家，搿大概是因为有迭能个习惯传下来个。再有么，就是广场浪跳扇子舞个大妈，整齐划一，呼呼生风，完全就是都市里向专门个一道风景，倒是也蛮别致个。 |
|
|
