|
沪语朗读：颜海雯 朗读者 泡饭 来源：网络 改编：郭莉 朗读：颜海雯 推荐：丁迪蒙 勒勒上海人个食谱里向，“泡饭”意思就介简单：隔夜冷饭，加眼水烧烧开；或者干脆就用开水泡一歇，就好吃了。 侬想烧只正宗个上海泡饭，也邪气简单，一镬子水滚开了，隔夜冷饭团倒进镬子，水再滚一歇，用筷子拿饭团搅碎，一分钟关火。乃末汤汤水水，饭米粒呒没烧酥有嚼头，正宗上海泡饭就烧好了。 梁实秋曾经用泡饭为题目嘲笑上海人。有一次伊到上海，投宿勒一位朋友屋里，早浪向跟伊拉一道吃泡饭，配四只小碟子：油条、皮蛋、乳腐、油氽花生米，“一根油条剪成十几段，一只皮蛋勒勒酱油碟子里滚来滚去，啥人也勿好意思去夹开来吃”。 上海人寒酸相，梁实秋一笔写尽。不过，要是梁老前辈在世，我倒要告诉伊：端出四只碟子来吃泡饭，排场其实已经邪气隆重了！ 吃泡饭，并勿是上海人主动选择个。上海城区，工人阶级一大清早去轧公共汽车上班，根本呒没辰光烧饭熬粥，大多数弄堂房子里也勿通煤气，老清老早生煤球炉，又麻烦又浪费，葛末夜里多烧点饭，第二天早浪开水一泡，匆匆忙忙扒几口，嘴巴一抹出门，一家老小该做啥就做啥去。 当然，也可以到街头巷尾小店里叫一碗阳春面，叫二两生煎，或者买一副大饼油条再来一碗滚烫个豆浆。不过实际浪，还是吃泡饭个日脚顶多。穷归穷，冷饭团是勿吃个，搿是瘪三腔。 泡饭之所以成为美食，是因为过泡饭个小菜丰富，上海个花头经就出勒搿里向。从前上海几乎每条小马路侪有一两家油酱店，称作“糟坊”，店里有酱菜专柜，玻璃格子里琳琅满目，走近了，一股咸滋滋香味扑鼻而来，迭个就是酱菜香。 萝卜头、大头菜、什锦酱菜、白糖乳瓜、崇明包瓜、糖醋荞头、仔姜片、乳腐、醉麸……是交交关关，还有一种螺蛳菜，长短勿到一寸，身浪有螺纹，小巧玲珑，奘笃笃，一头有眼尖噱噱，赛过上海人欢喜吃个小河鲜螺蛳，咬口是脆得来，好算是酱菜里个贵族。白糖乳瓜呢，是酱瓜里个“白骨精”，有人生病了，啥物事也吃勿落，再可能买点回去过粥。一斤要九角六分，常吃就是败家子。 上海人家吃得顶多个酱菜还是乳腐，伊是豆腐发酵霉变之后个华丽转身。乳腐分红白两种，方方正正，酥软鲜香，老少咸宜。 除了酱菜，咸蛋、皮蛋也是泡饭个良朋益友，皮蛋要有松花纹路个，咸蛋要是高邮出品个，热天吃咸蛋顶开心，筷头一戳，红油一记头吱出来。啥叫幸福？呶，就是搿种有咸蛋吃个日脚！ 上海人还会自家做点过泡饭个小菜，譬如干煎暴腌带鱼，干煎暴腌小黄鱼，还有一种骨刺又多、身板又薄个黄鲒，要重油氽到两面金黄，连骨刺一道嚼碎，鲜香满口！ 油氽花生米也是过泡饭个恩物，又是老好个下酒小菜，上海人送伊一只美名：油氽果肉。对了，花生米还可以跟苔条一道氽，俗称苔条花生，是相当高级个，上酒水也是蛮有面子个！日脚越来越好了，葛末就吃起了咸鲞鱼蒸肉饼子。泡饭搭档，咸鲞鱼蒸肉饼子一定是前三甲。至于宁波人顿顿离勿开个清风鳗鲞、黄泥螺、醉蟹、醉螺、蟹糊、虾酱咾啥，口味一个比一个重，侪属于绑架泡饭个“黑手党”。 能干眼个女主人会得炒两只时令小菜犒劳屋里向人：春天，笋丝炒肉丝加点豆腐干丝；香莴笋上市了，凉拌莴笋浇麻油，生鲜松脆。夏天疰夏吃勿落，榨菜肉丝就是开胃良方。秋天萝卜干炒毛豆子，毛豆子要炸到皱皮，萝卜干要浙江萧山出产个，再淋一点点酱油，加一小勺白糖收汁，吃个辰光萝卜干勒嘴巴里咕叽咕叽响，叫侬欲罢不能。冬天新咸菜上市，炒肉丝冬笋丝，鲜爽清香……吃泡饭勿适宜上大荤，过泡饭个小菜应该简约清洁、干脆利索，以咸鲜味道为主，乃末再好拿米饭香衬得清清白白。 现在上海人早饭有N种选项，可以吃生煎、吃小笼、吃小馄饨、吃菜肉汤团、吃锅贴、吃面筋百叶汤配烧麦、吃咖喱牛肉汤配葱油饼、吃鸡粥配白斩鸡，吃葱油开洋面配鸡鸭血汤，或者索介来一只焖肉爆鱼双浇面。但是随便哪能，泡饭是永远勿会背叛个。 小辰光特别馋，盼望过年吃大鱼大肉，初一早浪吃宁波汤团，初二早浪吃八宝饭，初三早浪吃糖年糕，到了初四早浪，侪吵了要吃泡饭了，泡饭魅力有几化啊！ 有种大老板身价数亿，但是还会叫保姆用开水泡碗泡饭。迭个是上海人味觉个基因。尽管现在已经到了吃啥有啥个好时光，上海人还是守牢了吃泡饭个底线。 我有一个朋友，是入行四十年个糕饼师，连法国、日本同行也侪要敬伊三分。有一日我问伊，早浪向顶想吃点啥？迭位吃遍全球个糕饼师斩钉截铁个吐出两个字：“泡饭！” |
|
|
