|
上海还有中只角 来自上海言话讲起来 00:00 08:33 沪语朗读：王乙其 朗读者 除了上只角、下只角，上海还有中只角 来源：大上海小龙弄 作者：马尚龙 沪语改写：丁迪蒙 朗读：王乙其 交关人侪习惯了上海有上只角、下只角个讲法，但是我要勒搿两个角个当中，再加上一只角——中只角。 上海是只大城市，也就是一方大水土，勒搿一方大水土下头，至少就是八方水土；按照一方水土养一方人个讲法，上海至少养个就是八方上海人。假使是个男人，除非伊飞黄腾达突然发迹或者是家道中落，否则老有可能一生一世就生活勒同一方水土里向；假使是个女人呢，伊就会得带有勿确定个因素，比方讲出嫁，比方讲一段情爱经历，邪气有可能改变自家个水土纪录，从乡下人变成功上海人，从下只角来到了上只角。 上海女人个命搭仔运，就勒上海个马路浪穿行，就勒上海个河浜里向流淌，就是勒上只角、中只角、下只角搿三只角里向或者是陶醉，或者是无奈，或者是抗争。 勒地理意义浪，上海是平原，而勒精神搭仔物质意义浪，上海就是绵延起伏个丘林，绵延之广，起伏之大，上海是独一无二个，搿也就是为啥“嫁得好”一百来年前头就是上海女人人生课题个原因。 生勒啥地方搭仔嫁到了啥地方是啥个意味？住个地方对于一个女人来讲，出嫁之前，是父亲搭仔祖上个荣耀证书，出嫁以后，是所嫁个男人个财力证书。一个上海女人住个地方，是搿个上海女人个命，也是搿个上海女人个运。 自然会得想起王安忆个《长恨歌》搭仔里向个王琦瑶，或者讲是王琦瑶拉，因为王琦瑶是一代上海女人个形象大使。伊拉是阿里一只角个女人？伊拉出生勒弄堂，弄堂勿是最上只角个，但也勿见得是下只角个，伊拉就贯穿勒上海所有个地方，淮海路搭仔四川路侪有弄堂；王琦瑶还住过公寓，最后死勒弄堂个洋房里向。 假使用上海人还是乡下人个标尺来衡量，王琦瑶拉当然是上海人，但是假使用上只角还是下只角来衡量，王琦瑶拉好像无法安身；伊拉肯定勿是下只角个人，屋里向有得一套半套个红木家生，还有姨娘，母亲还要去剪旗袍料，搿啥地方是下只角享用得到个？但是，搭上只角又邪气个勿般配。伊可能是石库门个弄堂，也可能是新式里弄房子个弄堂……伊勒地理浪是有穿透力个，勒身份搭仔物质浪，又对上只角搭仔下只角保持了自家个独立，勿妨讲搿能介个地段是属于中只角个。 上只角、下只角、中只角个区分在于，下只角是人多店少个地方，中只角是人多店多个地方，上只角呢，是人少店少却又是闹中取静个地方，还有独栋花园洋房，有街心花园，街边花园。果然，湖南路、武康路，太原路，五原路，岳阳路，小洋楼一幢又一幢，店邪气少，人就更加少了，但是到淮海路去走走倒是邪气近个。 面对牢更加多个下只角，中只角就是上只角了。伊拉住个地方大多数是勒苏州河个南面，徐家汇个东面，肇嘉浜路个北面，黄浦江个西面，比内环线高架还要小一圈。 勒迭个范围之外个，就是下只角了。下只角个女人用五十年代个闲话来讲，倒真个是劳动人民：闸北女人跟牢男人，大多数是剃头、搓背、倒马桶扫垃圾个，杨树浦个女人大多数是工厂做工人个，也有做水产个，南市个女人呢，大多数是摆小摊头个，而浦东女人，就侪是种地个了。 中只角个家庭当然勿会介苦，大多数是实实在在过日脚个家庭，有以眼眼勿大勿小个家底，有家规、懂礼貌。加上搿能个家庭个小姑娘侪是要去学堂读书个，勿是读私塾，所以对上海欧陆风情个把握，往往就是从搿能介个女小囡开始。假使讲“上海女人”是一个品牌，葛末品牌个最初形成，就应该是上海个女小囡搭仔欧陆风情如胶似漆个辰光。 搿能介个女小囡一生一世个美梦就是勒学堂里发端个。读书，享受，学会做一个上海女人，嫁个好人家，相夫教子，搿就是中只角女小囡一生应该走个道路。 |
|
|
