[申情申音]上海男人，上海女人，那点小心思

作者：马尚龙

改编、推荐：丁迪蒙

朗读：钱爱娟

图片来自网络

[由于公众号平台赞赏功能规则有变化，如想打赏，可长按打赏码（页面下方倒数第2个二维码），多谢朋友们对“麦唐作”的支持！]

    二十多年前头有部邪气有名个小说《人到中年》，后来又拍成邪气轰动个电影，由达式常搭仔潘虹主演个。电影当中有搿能一个场景：陆文婷因为工作超负荷生重病，伊个先生傅家杰坐勒床边头，拉牢伊个手，轻声诵读裴多菲个《我愿意》：我愿意是急流，只要我个爱人是条小鱼，勒我个浪花中快乐个游来游去……

    勿到非常时刻，上海男人是老难开口表白个，无遮无拦个讲自家个妻子好则是更加难了，但是勒真实生活当中，上海男人搭仔女人之间个关系，确实是一种生活个组合关系，需要合力，需要协作，需要默契，需要奉献。可以搿能介让男人“我愿意为侬”个女人，一定是一个让男人受益、让男人陶醉个女人，伊自家也一定是个邪气滋润、邪气有亲和力个女人。

可以用一个词来形容搿能个女人：适意。

    勒一次文化界活动当中，会议主持人点名要我讲讲上海女人。刚好伊日天我就坐勒著名个电影演员曹雷旁边。我讲，曹雷老师是上海人，也是艺术家，我伲侪会邪气自然个赞美曹雷老师，但是赞美伊真勿是桩容易个事体。美丽、漂亮之类个词语，用勒曹雷身浪显得邪气浅；至于“嗲”“作”之类，就更加显得形容失当。幸亏我寻到了——适意；曹雷老师是个邪气适意个艺术家，“伊看上去老适意个”。话音还没落，周围个人就拍手了，当然，是为了曹雷个适意。

    对于上海女人、尤其是知性女人来讲，勿论伊拉个年纪，贫富，适意就是伊拉以内而外个文化特质，好像要比“气质”更加具象，更加具有上海气息，更加有得说服力。适意个女人就勒我伲身边，当然搿是就上海女人而言。也正是“适意”具有上海色彩，所以伊没办法勒现代汉语词典里寻到确切个注释，搿就变得可意会而勿可言传了，即使是适意个女人，心里邪气清爽甚至暗暗叫开心，但也没几个人讲得清爽，适意到底是啥个意思。

    勿是只有女人再会得算计个，男人也会个，尤其是上海男人，精明是出了名个。勿仅钞票要算，投入个时间、感情，每一笔侪要有本账。假使约了夜饭辰光见面，王先生搭交关上海男人一样会得邪气大度个让女小囡选择吃饭个地方，其实心里也有自家个小算盘。上海男人邪气清爽，上海个女小囡第一次见面一般勿会选消邪气贵个地方，伊勿会笨到让人家觉着存心敲竹杠。勒搿点浪向，上海女小囡总归可以有好分寸个。假使是收入勿高，还有房贷压力个男人，对每一次个相亲更加要控制好经济成本了。至于下一趟个约会，葛就更加要考虑清爽了。

    搿顿夜饭已经吃了一个多钟头了。女小囡看上去兴趣勿低，一直勒搭对面个男人聊身边发生个事体。男人也时勿时笑笑，点点头。突然，男人个手机响了，伊邪气有礼貌个搭小姑娘表示抱歉，然后接通了电话——侬讲啥？现在？我现在有事体走勿开呀。葛……葛好伐，我马上就回来。挂脱电话，男人显得邪气内疚，又邪气无奈，搭女小囡讲，勿好意思，老板个电话，公司有点急事体，我现在要赶回去处理。没关系个，女小囡快点表示自家个体谅，工作要紧。接下来是，男人结帐，走人。女小囡随便哪能也想勿到个是，刚刚打电话过来个人只讲了一句——兄弟，是是又勒相亲，要寻借口跑啊，葛侬就讲好唻。女小囡听到个所有个闲话是搿个男人勒一家头自说自话。朋友电话打过来之前，伊趁小姑娘去汏手，搭两个朋友打电话。没等朋友接，就拿电话挂脱了。等朋友看到未接来电，就打过来了。为啥要打两个朋友？搿就是以防其中一个没注意有未接来电，葛末计划就要落空了。即使两个朋友侪打电话来，也勿要紧，葛就更加显出伊个忙碌了。看勿上迭个姑娘，想早点结束约会是伊借口离开个一个原因，另外个原因就是伊根本勿想送女小囡回去。伊勿但要笑咪咪个敷衍，还要浪费勿少油钿，想想也勿乐意，于是就生出此计。只有经历了“暗算”个考验，两个人再会得侬知我知个走到了一道去。