|
藤条焖猪肉 我哋细个嘅时候，若然系做咗调皮捣蛋嘅事，又或者喺学校被老师投诉，噉阿爸或者阿妈就好有可能会请你食一道广东名菜“藤条焖猪肉”喇。 何谓“藤条焖猪肉”呢？讲白就系阿爸阿妈攞藤条嚟打你个屁股啦。以前广东人每家每户都会有好多用藤做嘅家居用品嘅，鸡毛扫就系其中之一喇。通常阿爸阿妈打仔女呢，都会将鸡毛扫调转嚟揸，用长长嘅藤条嚟打啲仔女。因为藤条嘅柔韧性好，打起嚟会好痛嘅，但系又唔会好似戒尺之类嘅物体噉硬，唔容易打出严重嘅伤患，所以藤条系家长执行家法最常用嘅“武器”。 而“焖”字亦都有讲究㖞。广东人喜欢吃嘢，对厨艺方面亦都颇有研究，所谓“焖”，就系将食材放喺煲里面，𢫏实个煲盖，然后就用文火嚟慢慢煮烂。而“藤条焖猪肉”之所以用个“焖”字，其实就系意味啲仔女翻到屋企，无处可逃，唯有任由家长慢慢炮制嘅意思。而“猪肉”就喺仔女个屁股喇。 不过，现时好多家庭都已经好现代化喇，体罚仔女嘅情况就越嚟越少，而好多家庭亦都好少会有鸡毛扫咿样嘢，所以，食到正宗“藤条焖猪肉”咿道广东“名菜”嘅机会就越嚟越少。 烚熟狗头 喺粤语里面，形容一个人笑得好假，皮笑肉不笑，一副阿谀奉承嘅样，就会话佢笑得“烚熟狗头”一样。 点解笑得假会被称为“烚熟狗头”呢？冇吃过狗肉嘅朋友就可能唔知道。原来，将狗头放入大镬里面烚，因为加热嘅关系，烚熟之后狗嘅嘴巴就会裂开，就好似笑脸一样。但实际上大家都知道佢（狗）肯定唔系真正想笑嘅，都被人吃喇，仲笑得落咩？所以，粤语就用“烚熟狗头”嚟形容假笑喇。 死鸡撑饭盖 “死鸡撑饭盖”哩句话喺粤语里面系用嚟形容嗰啲明明系自己做错咗，但系就死都唔肯认错，仲编造好多理由畀自己去辩护嘅人。例如喺超市里面排队埋单，突然间有人插队，被人发现咗之后，插队嗰条友仲死口唔承认自己插队，噉你就可以话佢“死鸡撑饭盖”啦。 “死鸡撑饭盖”哩句话究竟喺点样嚟嘅呢？死鸡又点解会撑饭盖呢？大家如果蒸过鸡，应该都知道，将光鸡放入饭煲里面蒸，蒸熟咗之后，鸡脚肯定会蹬直嘅，如果只鸡比较大，就好有可能会连煲盖都撑开。点解会噉样呢？原来，刚削洗干净嘅鸡，鸡脚关节都仲系柔软灵活嘅，可以弯曲住塞入煲里面。而喺放入煲里面蒸热之后，鸡脚嘅筋就会收缩使鸡脚撑直，甚至将煲盖都撑开。 明明死咗，都仲要硬撑，哩个状况用嚟形容嗰啲打死都唔肯认错嘅人，实在系形象生动到极点喇！ 70、80年代的广州街头 ▼全屏播放效果更佳▼ 传承粤语文化，点在看及转发，可人让更多人知道 |
|
|
