 沪语朗读：千杯不醉 馄饨、菜肉馄饨搭仔素馄饨（二） 作者：千杯不醉 改编：郭 莉 朗读：千杯不醉 推荐：丁迪蒙 当年虽然荠菜难弄，青菜倒是常年侪有个。假使周末礼拜天要吃菜肉大馄饨，搿是一家门侪会得狠狠叫激动一番个，因为难得，因为勿容易，真叫是一眼也勿比今朝侬去吃只满汉全席推板个！再讲还要全家动员，人人参加——买菜、买肉、还要排队买皮子！一直到最后大家一道裹馄饨。上海阿姨大清早拎只篮头出门，假使人家问伊，今朝买点啥？烧眼啥吃吃？“菜肉大馄饨！”讲出来也砰砰响！馄饨实在是可以让侬抬头挺胸、中气十足回答人家个一道美食！ 当年我勒嘞中医学院读书，冬天早浪向，总归是赖到最后一分钟再下决心起来，冲到食堂，也就只好买到两分洋钿一只个标准粉“黑馒头”，再加两分洋钿一份什锦酱菜。看牢迭个馒头酱菜、酱菜馒头，就算是肚皮饿得咕咕叫，也勿会有半眼食欲了。现在想想也觉着邪气奇怪，为啥即使呒没别样热粥啊、肉馒头啊、菜馒头豆沙馒头咾啥，就算只有淡馒头，勿是也可以弄出眼花样经个嘛！譬如搨眼花生酱、芝麻酱咾啥？大饼油条瓷饭糕、老虎脚爪咾啥我也勿去奢求了。勒今朝迭眼侪勿是啥稀奇物事，但是伊歇辰光，唉，贫穷真个是可以限制人个想像力个！反正就是一个词：呒没！吃勿吃侪是迭个。乃末，总归是勉强咬了两囗僵馒头就厾脱勿要吃了，饿仔肚皮上四节课，还要认认真真做笔记，搿是真生活哦！一直捱到头昏眼花总算下课，快点冲到食堂去买份像样个饭菜，还是要有搭挡个噢！要跟搭档分工排队买饭买菜。假使触霉头碰着老师拖堂，葛末常庄是连得五分洋钿一勺个青菜也呒没了！只剩下来油腻腻腥气不剌个海带烧肉，看勿见啥像样个精肉，只有几块抖抖甩甩个奶脯肉了。唉，怪勿得阿拉当年侪介瘦，从来也呒没人想过啥要“减肥”！ 当年中医学院勒嘞枫林路浪，此地为啥呒没商场，呒没啥个大饼油条豆腐浆咾啥，啥人也勿晓得！反正学堂附近，下课十分钟能来回个路程里向，除脱学堂大门对过两爿小烟纸店文具店，别样是侪没个！想勿到后来有一日突然发现，校门对过个弄堂口拎出了一只煤球炉，一个长得像电影巜一江春水向东流》里向个婆阿妈、电影演员吴茵个老太太，居然勒嘞弄堂口卖茶叶蛋搭仔菜肉馄饨了！哦哟！老太太个馄饨真是弄得阿拉心花怒放啊！阿拉一般侪是耐心个等早浪第二节课上完个20分钟休息辰光，冲到对过，吃一角洋钿一客菜肉大馄饨。老太太镬子勿大，又只是一只煤球炉子，一镬子也只能下十几靠廿只馄饨，弄得勿好还要等下一镬，真正急煞人！每一镬当中伊还必须加冷水重新烧开，假使侬齐巧晏来一步，别个同学捷足先登，葛末侬就只好弹弹眼乌珠，咽咽涎唾水，看牢别人吃热腾腾香喷喷个大馄饨了。等到侬个一镬水开了，辰光也差勿多了，只好再三催老太太，好了伐？好了伐？！老太太总归笑眯眯慢吞吞个讲：覅急呀！覅急呀！马上就好！一面讲，一面还朝镬子里加了一大勺子冷水下去，乃末刚刚从底下头翻上来个馄饨一勺子又到了镬底。侬是简直哭也哭得出了：“拨我呀，快点呀！”伊仍旧慢气细气：“又勿好拨侬吃生个咾，总归要烧熟个呀，妹妹！”唉，等到馄饨总算舀到我自家个搪瓷盆里向，简直已经呒没辰光了。乃末好，勿关啥风度啊、气质啊，连起码个吃相也勿讲了，一个个侪喇开嘴巴狼吞虎咽，拿突突滚个开水里撩出来个菜肉馄饨，勒嘞限时限刻个几分钟里向吞到肚皮里去！现在想想，小姑娘搿能也真是老有本事个，阿是啊？ 几十年过去，现在我想起老太太个菜肉大馄饨，还是搿能个美好，还是邪气温暖个感觉。 点以下文字即有精彩回放： 图片来自网络 |
|
|
来自： 渺渺m69vnzsah9 > 《待分类》
