 沪语朗读：黄燕琼 择校勿亚于择偶（三） 作者：胡伟立 沪语改写、朗读：黄燕琼 审核、推荐：丁迪蒙 走出市西中学，右转弯，再朝西走两个街区就搭江苏路相交了，伊面有一所别样风格个学堂——市三女中。 搿所优雅、美丽个学堂原来是只女子教会学堂，名字叫做“中西女私塾”。1892年创办个。举行开学典礼个辰光，只有7名学生子，是上海滩浪向第一所贵族女子学堂。 我勒市西读书个辰光，市三女中个校长是薛正。 迭位上海圣玛利亚教会女中毕业，后来勒燕京大学专攻教育专业个老校长，1936年起就受聘搿所学堂，是当时叫做“市西女中”的校长。伊些辰光个“市西女中”是一所私立个、贵族化个女子学堂，以培养“大家闺秀”、“大使夫人”为目标个。 薛正校长继承了“中西”个典雅、贤淑个校风，勒教育当中融合东西方文化个精华，提出培养“IACE女小囡”（Independent独立、Able能干、Caring关爱、Elegant优雅）个目标搭仔一套相应个教育模式。 无论是市西女中还是市三女中，表演短小个话剧始终是学堂个传统。老师经常教学生改编莎士比亚戏剧或者是欧美文学个名著片段，表演英语个短剧，也鼓励学生排演曹禺个《雷雨》、郭沫若个《孔雀胆》、《棠棣之花》、《屈原》咾啥有名个话剧。 薛校长曾经亲自导演过学生排演中国现代剧《一片爱国心》等等戏剧，勒演艺活动当中，培养学生个爱国心，也陶冶了女学生子个情操。 市三女中还特别重视音乐教育，学堂里有得好几间琴房，摆勒几十只钢琴拨女生练琴、练唱。音乐老师呢，勒课堂浪向讲解西洋音乐史、播放各种名曲，帮助女学生子熟悉贝多芬、巴赫、海顿、莫扎特等音乐大师，还经常组织音乐会、化妆舞会咾啥，使得校园里向充满了音乐个气氛。 市西中学搭市三女中相距勿远，因此也常庄有眼联谊活动。 我个印象当中，市三女中走出来个女同学，总归有眼与众勿同个典雅、高贵。记得阿拉学堂有个调皮个男生，曾经冲勒市三女生离开个背影，半吟半叹《爱莲说》里向个句子：“香远益清，亭亭净植，可远观而不可亵玩焉！” 人勒成长过程中，青少年时代接受了啥个学堂教育，勿仅仅对世界观个影响邪气大，对气质、格调个形成也是至关重要个。所以，一个人受教育个学堂背景有辰光比学历、比职位更加引人关注。 像上海搿能介个城市，现代教育起步早、各种特色学堂业也比较多个。因此，选择学堂就是选择了一种人才模具，多看看从里向走出来个人，包括老师搭仔学生个气质品格，就可以选定自家个未来。 照我来看，选学堂，无论是公办个还是民办个，最最要紧个侪勒了解搿只学堂个校长个做派，要弄清爽伊个办学理念、伊倡导个校风以及伊对师生个态度。 至于伊眼一味炫耀校舍个豪华、条件个舒适或者只讲究赞助费个所谓个贵族学堂，我认为，勿读也就是了。
|
|
|
来自： 渺渺m69vnzsah9 > 《待分类》
