 沪语朗读：渺渺 朗读者 螺蛳娘 作者：吴翼民 来源：新华日报2019.3.21 沪语改编：郭莉 推荐：丁迪蒙 朗读：渺渺 螺蛳娘，就是做螺蛳生意个女人。螺蛳娘个叫法蛮俗个，跟“绣娘”“船娘”咾啥个“姑苏十二娘”是一眼沾勿上边个，但是也俗得可爱，俗得有味道。我从小就看见过交关螺蛳娘，伊拉摸螺蛳，剪螺蛳，卖螺蛳——卖生个螺蛳搭仔熟个螺蛳。 从前个江南，勿仅乡下到处是螺蛳，城里也侪是螺蛳。像苏州搿恁个城市，到处河道纵横，清粼粼个河水里，有鱼有虾，当然也有螺蛳。迭个螺蛳啊，勒勒河浜底下头、勒勒河浜个石子驳岸浪向、还勒勒河浜个一级级石头台阶浪，密密麻麻侪是个，特别是春夏季节，更是多得勿得了。女人、小囡只要勒勒自家个河埠边头弯下腰来，就好抄起一大把。回来剪脱螺蛳屁股，一边已经起油镬爆香葱姜，放进螺蛳一炒一烹，乃末一碗喷香喷香个酱爆螺蛳就上桌了。 苏州人拿炒熟个螺蛳叫“罐头笃肉”，搿是拿螺蛳壳比喻成砂锅罐头，蛮形象个。现在还有人拿螺蛳比喻成“农家鲍鱼”，更加形象了。 从前家家户户侪欢喜迭个物事个，富裕之家为了尝新，贫困人家当伊开荤，到了热天夜里，家家户户开始了“风凉夜饭”，就是勒勒自家屋门前露天吃晚饭，葛末餐桌浪总归会有一碗酱爆螺蛳个。只听见东家唆得“吱吱”响，西家也唆得响“吱吱”，乃末苏州小巷子里向是一片“吱吱”声，真是蛮闹猛个。前几年“苏州话大奖赛”用了一则广告语，就是“风凉笃笃，咸蛋嗑嗑，螺蛳唆唆，乳腐戳戳”。 螺蛳哪能会得跟女人搭界，结果还有了“螺蛳娘”个叫法了呢？原来，摸螺蛳多数侪是女人做个生活，网船个男人，好像是勿去做迭种效益勿大个生活个，男人要捉值铜钿个鱼虾呢。摸螺蛳也叫耥螺蛳，有专用工具，勒勒河浜边头忙一趟，收获倒是也勿少，但是搿个物事勿值铜钿，卖勿出价钱，所以侪是女人搭仔小囡去赚一眼零用铜钿。有个女人勿甘心迭恁，就加工出售螺蛳，乃末有了剪螺蛳搭仔炒螺蛳个加工生活。 也是蛮稀奇个，吃螺蛳板要剪了屁股，两头打通，炒熟了再好一唆痛快。既唆到汁水，又唆到螺蛳肉，汁水鲜香可口，螺蛳肉又肥又韧。我小辰光穿街走巷，常庄会碰到螺蛳娘抄一只竹篮头、兜牢只砂锅叫卖熟螺蛳，一声声“阿要吃酱油热螺——蛳”，吴侬软语夹杂螺蛳个葱香味道，飘洒勒空气中。螺蛳娘有个是耥摸螺蛳个渔家女子，有个是郊区农妇，也有城里贫困家庭女子，伊拉做个是一分洋钿一勺子个小生意，面孔浪倒是幸福知足个表情。尤其到清明时节，螺蛳顶肥顶嫩个当口，伊拉个生意可以讲是飞俏飞俏，几砂锅螺蛳一歇歇侪卖光，真是买卖虽小，收效勿小，用伊拉自家言话来讲，就叫“小雨落得密”啊。啥人叫伊拉个螺蛳介鲜美，介馋人呢！ 岁月飞逝，螺蛳还是大众美味食品，但是城市河道渐渐枯绝，乡下也差勿多一样。亏得江南总算还有浩瀚太湖，螺蛳还有地方生存繁衍。前几年我勒勒太湖边党校学习，每天一早，只看见湖岸浪爬满了螺蛳，随随便便就可以拾到一碗，请食堂简单加工，实在是“崭货”。不过，现在太湖螺蛳也少脱交关。目前政府鼓励大量放养，利用螺蛳来净化湖水。太湖水质得以逐渐改善，小小螺蛳功不可没。现在大家吃到个螺蛳，大多数侪来自水质更好个苏北地区啦。 螺蛳越来越少，螺蛳娘还有伐？有啊，我看见过两位邪气特别个螺蛳娘。有一家主打螺蛳美食个饭店，老板娘从外头买进了大量螺蛳，在豆浆里向养脱几天，螺蛳静静较吐故纳新，清洁了自家个里里外外，再慷慨登上人类餐桌。我吃过，的确是又干净又肥硕，成为饭店个一大特色。另外一家饭店个螺蛳，由老板娘亲自把关，一粒一粒侪要闻过，验过，乃末再让螺蛳“以身飨客”。侬要晓得，吃螺蛳个食客顶恨个就是唆法唆法，居然唆到一粒臭螺蛳，或者是一包泥浆，搿是会大倒胃口个！葛末言话回过来，迭个两家饭店个老板娘，能勿能算是新一代个螺蛳娘呢？ 灵个，螺蛳娘！ 往期回顾： 图片来自网络 |
|
|
来自： 渺渺m69vnzsah9 > 《待分类》
