 沪语朗读：渺渺 童年零食个回忆 原创：亭子间爷叔 来源：弄堂2019.6.13 上海话改写：郭莉 推荐：丁迪蒙 诵读：渺渺 记得我小辰光，爷娘常庄带我到食品店去，买一包饼干或者一卷水果糖，热天还会买一根棒冰。不过对于食品店里买零食个柜台里，陈列得琳琅满目个各色蜜饯——咖啡色个福建拷扁橄榄、淡绿色个“良友杭”咯、红颜色个山楂条、黄颜色个杏脯咯、还有白颜色个糖冬瓜咾啥，爷娘是勿会搭我买个，一是因为迭眼物事价钿蛮贵；两是伊拉认为搿种物事勿卫生。所以我也只好朝搿眼物事看看算数。 阿拉屋里住个是一条大弄堂，四通八达，各种小贩川流不息进来吆喝，其中也有兜售、加工零食个，最多个是爆炒米花。伊歇辰光，一听到 “爆炒米花……喔！”搿种叫声，阿拉侪会拿了一罐头米，或者是一罐头干个年糕片，交拨爆炒米花个。小贩拿米或者年糕片倒进伊个铁筒，再加一勺糖精，乃末一手勒勒火炉浪转动铁筒加热，一手拉风箱，等到铁筒个压力表指针到辰光了，小贩立起来，用力扳开铁筒盖头，嘴巴里喊一声“响喽——”只听得“嘭”一声，爆好个炒米花年糕片就冲进搿只对牢铁筒口个大麻袋里，然后倒进客户自备个面盆、钢种镬子里。乃末，大家喜滋滋拿回去，可以吃蛮多日脚了。 还有一种是卖“饧糖”，也就是卖麦芽糖个小贩，伊挑个担子就是伊个工作台，担子里有红、绿、黄三种饧糖，下面勒勒加热。担子上头个几只小抽屉里，放勒各种工具，担子上头个草把浪向，插满伊用饧糖做个公鸡、苹果、辣椒，还有老虫偷油个造型，小囡是顶欢喜看伊用饧糖做搿种物事了。伊从糖罐里挑出一眼黄颜色饧糖，用手捏捏搓搓，做成一只上尖下圆个球形，然后用一根空心芦苇杆插进去一吹，一只空心个油葫芦马上就做出来了。再勒勒葫芦浪向用红、绿颜色个饧糖粘上去，做成一只小老虫，呒没几分钟，一只邪气生动个老虫偷油个糖塑就做好了，往草把上头一插，围观个小囡一片啧啧叫好。不过大家勿会去买来吃个，因为又用手来捏，又用嘴巴吹，搿能介大家就会觉着有眼“腻心”了。 还有做棉花糖个，敲鼓卖“蛋片”个，唱快板卖五香豆个，拉手风琴卖梨膏糖个……五花八门闹猛得来！ 勒勒有种弄堂口，还有一种小摊头，有各种各样伊拉自家做个、或者是一种专门个小作坊加工个小物事。搿种摊头还有一只简单个转盘，一分洋钿转一转，指针指到啥物事，侬就拿啥物事。大人带我走过搿种摊头辰光，总归要讲“覅去看，龌里龌龊个！”但是我出于小人个好奇，有辰光也会去看一看个。搿种摊头浪有两种伊拉自家加工个食品邪气特别： 一种叫“腌金花菜”。有人来买，摊头浪主人就用筷子夹出一撮腌好个像咸菜一样个“腌金花菜”，放勒一张小小个方纸头浪，再勒勒菜浪向撒一眼眼甘草粉，据说迭个邪气好吃。 还有一种物事是放勒小砂锅里，再用五香、桂皮一道煠出来个细细长长个小螺蛳，一帮小鬼头侪立勒边头讲：“钉螺，钉螺！”当时大家侪晓得，钉螺是传播血吸虫病个。摊头主人连忙解释：“勿是钉螺，钉螺哪能好拨㑚吃呢？”现在才晓得，迭个物事叫“香螺蛳”，是一种美味小吃。 六十年代初，我读小学。我个学堂是沿马路个，学堂旁边有好几家小店，卖各种零食、文具、玩具咾啥，专做小学生个生意。学堂规定每天早浪、中浪几点钟可以开校门放小学生进去。辰光没到，小学生就成群聚集勒校门附近，乃末小店个生意也就是最兴隆个辰光。学堂贴隔壁个搿爿小店，老板邪气瘦，学生子勿晓得为啥，侪叫伊“阔老板”。阔老板小店里，有“盐金枣”、“盐金条”、甜、咸萝卜干、桃板、橄榄咾啥。伊拿零食个起售点降到最低，几十粒“盐金枣”，几根甜萝卜干，侪可以包成一只小小个三角纸包，售价一分或者两分，就连饼干也可以化整为零，卖两分一块。搿能就迎合了阿拉搿种袋袋里只有一分、两分硬币，嘴巴又邪气馋痨个小学生。“阔老板”有一手包“三角包”个硬功夫，半个钟头伊就可以包一大堆“三角包”。我有常时也会买一小包甜萝卜干、“盐金枣”，课间休息辰光，拿一粒“盐金枣”偷偷叫放进嘴巴里，细细叫品味伊个咸中带甜……。到了五、六年级辰光，阿拉是大小囡了，对“阔老板”个迭眼物事就不屑一顾了。 现在，当年穿街走巷个出售、加工零食个小贩，老早呒没踪影了；走过我从前个小学门口，代替当年搿眼小店个是一家“罗森”便利店，里向个食品从酸奶、饮料到薯片、虾条、巧克力……真是应有尽有，价钿也蛮结棍，每样侪要好几块。小学生放学以后进来，买迭个买伊个，几块洋钿根本勿当一桩事体。想起自家小辰光勒勒“阔老板”店里买一分一包个“盐金枣”，围勒零食摊头看闹猛、咽涎唾个童年时代，由勿得长叹一声：真是今非昔比啊！ 推上海言话叙身边事体 究吴侬细语吟诗词歌赋 往期回顾： 图片来自网络 |
|
|
来自： 渺渺m69vnzsah9 > 《待分类》
