 沪语朗读：余晖 朗读者 作者、诵读：余晖 小辰光，我是一个会叫人个小囡，由于会得开口，所以父母亲经常愿意带我去走亲眷。一到亲眷家附近，只要碰着父母亲打招呼个人，勿分男女老少，我个小嘴巴就勿停个叫人。 因为我是有套路个，从来勿会弄错。外婆屋里是金桥老街东街浪向个大户人家，到外婆家附近个辰光，看到比我母亲年龄小个妇女，侪叫嬢嬢，大个则叫大大姆妈，其实应该叫小阿姨或者大姨妈，但浦东人觉着随男方个叫法叫嬢嬢或者大大姆妈更加亲热一点，而男个则侪叫娘舅，娘舅个爱人叫舅妈，搿个是严格区分个，勿能叫爷叔，否则会闹笑话了。 而遇碰着年纪与搭外婆差勿多大个，女个一般侪叫阿奶，男个一律叫大大。又是与搭男方叫法一样，听说也是为了表现更加亲近一点。 由于我从小勿怕生，会叫人，长得又是大头大脑个，所以特别受欢迎，每趟走亲戚总有勿少收获，如像饼干呀！糖果呀！自然勿少。所以呀，每次回家去阿哥阿弟侪要拍我马屁，其实侪是看中我带回来个零食，伊拉侪是馋唠呸。 但是，跟牢父亲到胶州路65号个祖母屋里去，我就有些勿自然了。因为伊面个同龄人，会勒背后头叫我乡下人，所以我也勿大愿意去个。伊面个与搭我父亲辈分差勿多个男人侪叫爷叔或者伯伯，而女个除了爷叔个太太叫婶婶，伯母则叫大妈妈以外，其他比父亲小个一律叫阿姨，或许伊拉觉着叫阿姨更加洋气，而在勒浦东则叫嬢嬢，真是弄勿懂，又听说搿能叫也是为了更加亲热。比父亲大一点个倒没错叫大大姆妈。而祖父母辈个倒也没错，侪叫大大，阿奶。 所以呀！叫人个学问邪气大个，要赚回来点零食是邪气勿容易个呀！现在个小人，是严格区分男女方个称呼个，现在，囡儿也长大成人了，有辰光会得问我，勒浦东为啥姨妈可以叫嬢嬢？勒浦西又为啥嬢嬢可以叫阿姨？我只好跟搭伊讲，浦东传统文化与搭仔浦西海派文化过去是两种勿同个文化。 其实我晓得自家勒瞎讲八讲，能蒙就蒙，装一个文化人而已，事实浪向又有啥人讲得清爽呢？  图片来自网络 上海言话叙身边事体 吴侬细语吟诗词歌赋 往期回顾： “上海言话讲起来”旨在传播沪语，若有不当之处，恳请留言指正。 感谢您的支持转发，欢迎关注本公众号
|
|
|
来自： 渺渺m69vnzsah9 > 《待分类》
