|
沪语朗读：高仁 
高仁先生 谚俗入印，化俗为雅（三） 作者：沈嘉禄 朗读：高仁 推荐：丁迪蒙 值得注意个是，搿些沪谚、熟语勿仅流行于巷闾坊间，还拨活色生香个引入了戏曲、小说、评弹、滑稽、说唱、童谣、绕口令、谜语等等文艺形式，勒民间文学领域则有更为广阔个伸展空间。比方讲，从《九尾龟》《海上花列传》咾啥旧个小说，到当代个王安忆、彭瑞高、金宇澄等等作家个小说，侪引用了上海方言搭仔沪谚、熟语，使得作品更加生动活泼，地方色彩鲜明，人物形象饱满，读者个反响也是邪气积极个。所以，周建国勿是心血来潮，借沪谚、熟语来白相感觉，而是经过深思熟虑个，体现了文化自觉搭仔文化自信，阿拉也应该拿伊个作品摆勒上海文化界着力研究、弘扬海派文化个宏大背景下头来审视、来评判、来肯定。至少我勿会拿伊个搿番努力看作是“吃力不讨好”的个“出花头”。 讲到搿搭，可能有人会得问：上海要建成具有世界影响力个国际大都市，沪谚、熟语邪气重要？当然是十分重要个！作为一座国际大都市，应该有国家层面认定个官方语言，也应该有各种通用性较强个外国语言，但是各位请注意，正是勒搿能介个大格局当中，本地方言再显得特别重要！搿是一座城市个根系命脉之所在，是城市个密码，是市民阶层呼应沟通个“暗号”“密语”“气息”，也是身份个表征。阿拉应该晓得自家是啥人，从阿里搭来，到啥地方去？阿拉应该用方言来确定自家个族群“血型”搭仔成长个历史，搿决勿是要排斥普通闲话，也勿是要排斥外省人，恰恰相反，阿拉要友善个提醒像潮水一样涌进上海创业发展个新移民，帮助伊拉尽快融入上海搿座城市，融入上海人，融入上海生活个日常，成为快乐健康、奋发有力个新上海人。葛末，有些文化密码就必须知晓，搿是城市门户个钥匙，也是上海人心灵个钥匙。普通闲话或者外国闲话勿能精准表达个意思，上海方言可以轻松个表达，搿个侬应该能听、会说。 
语言勿仅是交流思想、表达感情个交际工具，而且是每个时代文化信息个载体。中华文化之所以博大精深，就是因为伊自古以来就是一种多元个文化，从来就包容各地民众创造搭仔长期积累个精神文明。作为上海本土文化个根基，上海方言首先拜上海一方水土个造福，也是一百多年来吸纳各地移民以后大融合个结晶，是上海人民对人类多元文化个贡献。传承上海方言，就是传承上海地区个文化基因，葛末，拨沪谚熟语一定个文化认知搭仔地位，也是对文化基因个明确编码或者标注。 假使阿拉从搿层意义浪来解读周建国用中国印表达沪谚、熟语的艺术实践，就能够获得更加多个思考搭仔共鸣。今朝，周建国从伊第一阶段创作个沪谚、熟语印当中精选了一百零八方付梓成书，我表示热烈祝贺。 建国老同学嘱我作序，我是深感荣耀，我以作家身份从文化层面谈点体会，至于技术层面，浙派徽派、元朱满白、瓦当四灵、穿带铁线……我迭个“三脚猫”就勿敢“瞎三话四”了。 
上海言话叙身边事体 吴侬细语吟诗词歌赋 往期回顾： 月河，我在雨中想妳
“小小班”里过暑假
慈祥的祖母
茭白塘里钓龙虾
詩詞賞析——憶秦娥·簫聲咽 灶披间里个闲言碎语
有一种修养，叫遇事不责备 “上海言话讲起来”旨在传播沪语，若有不当之处，恳请留言指正。 感谢您的支持转发，欢迎关注本公众号
|
