 沪语朗读：颜海雯 作者：周伟新 改编、朗读：颜海雯 朋友晓得我欢喜吃海鲜，托人从海边带来一批新鲜个鱼搭仔虾。 中浪向，按照宁波人个烧法，我拿小黄鱼用盐酒烤，搿能既有清蒸个味道，但是又比蒸个味道浓。满满一大碗鱼肉勒闪光亮，一看见末就食欲大开呀。去拿好醋、糖、老干妈辣酱调成功个蘸料。然后一道端到台子浪向。 吃饭选择勒内阳台窗门边头个写字台旁边，勒搿搭坐下来，浑身侪拨灿烂个阳光罩勒海，向外眺望出去，是层层叠叠个绿荫搭仔高楼……还要再去添眼背景音乐，打开音响，让海莉.维斯特拉邪气好听个吟唱飘满我整个房间。阳光、美味、美景、美乐，哈，四者皆备，可以开席了！ 古人有训：食勿言。讲个是吃饭辰光要专心。我小辰光勒吃饭台子浪欢喜“乱说乱动”。有一趟，我眉飞色舞讲得起劲，呒没看到我个爸爸勒朝我瞪眼睛。姆妈快点提醒：冒讲唻！我仍旧刹勿了车，爷老头子一把拿我手里向个筷子夺过去，老凶个讲：到房间里去，想明白再来吃…… 已经老了，积习还可以改。搿能一边吃、一边看、一边听，贪占一多末，麻烦来了呀。 一条鱼吃脱大一半个辰光，突然之间，觉着胡咙口拨针扎了一记：勿好了！鱼刺卡着了。快点拿碗筷放下来，去查百度，看看有啥解决个办法：讲勿可以吞饭、吃醋……最简单个办法，就是咳嗽。 好了，乃末看电脑咳嗽；一边散步一边咳嗽。胡咙咳得痛起来了，鱼刺却是岿然不动。 夜里向刷牙齿个辰光，我用牙刷去拨搿根刺，没想到弄得满嘴巴侪是血，迭只老举三呢，继续安营扎寨，纹丝不动。我睏勒床高头唉声叹气：真个是乐极生悲呀，明朝只好到医院里去求助了。 搿歇辰光，唯一个安慰就是海莉美妙个歌声了，像浪花轻轻叫慢悠悠个拍打海岸，野像是遥远个地方传来个深沉祈祷。 …… 我拿音响关脱，带了迭根刺进入了梦乡。 第二天早浪向醒来，辣末生头邪气开心：咦，鱼刺呢？勿晓得跑到啥地方去了啦，喉咙勿痛了伊讲！ 勿会是马拉多那式个“上帝之手”，拿鱼刺拔脱了？我横想竖想，想了老半天，噢，一记头明白过来了：搿是口腔里个“台风”——我个昏涂起作用了呀，夜半歌声介个搞了一夜天，鱼刺哪能会勿拨刮得无影无踪呢？！ 图片来自网络 往期回顾： “上海言话讲起来”旨在传播沪语，若有不当之处，敬请留言指正。 感谢您的支持转发，欢迎关注本公众号
|
|
|
来自： 渺渺m69vnzsah9 > 《待分类》
