 沪语朗读：邬渊敏 来源：新民晚报 作者：许德华 改写、朗读：邬渊敏 我年纪轻个辰光，老欢喜看三毛写个《撒哈拉个故事》，书里向对撒哈拉沙漠里个人、骆驼、汏浴等等个描写活灵活现，我当时就想：有机会一定要去一趟！我还拿书里“每想你一次，天上飘落一粒沙，从此形成了撒哈拉”搿句闲话贴勒床头搭仔冰箱浪向，提醒自家覅忘记脱搿桩事体！呒没想到，真个去成功，已经是退休两年以后了。 今年2月份个春节里，我终于跟仔旅行团去了一趟撒哈拉。阿拉到沙漠里个辰光已经是夜快头了，红通通个太阳挂了西面个天浪向，地浪向个黄沙看起来像煞是粉红颜色，走勒上头觉着暖烘烘个。天色越来越暗，半圆形个月亮慢慢叫升起来，星星勒天浪向一闪一闪，温度是越来越低，身浪也觉着越来越冷了，大家侪拿羽绒服拿出来披勒身浪向，沙漠里向个气候就是迭能样子个。 离阿拉帐篷勿远个地方，有一大群单峰骆驼，看驼驼个人勒边浪忙来忙去，导游讲，搿眼骆驼就是阿拉明朝到沙漠里去个代步工具。 第二天老清老早起来集合，一道到昨日骆驼睏觉个地方，有一只骆驼还勒睏痴懵懂，就拨驼倌拍醒过来，伊“嘎啦”叫了一声，听起来就像是小毛头发出来个声音。碰巧个是，搿只骆驼就是驼倌分配拨我个坐骑。刚刚爬上去，就感觉伊勒动来动去，像煞要拿我摇下来，我对驼倌讲：“唉，好调只老实点个伐！”可惜个是，驼倌听勿懂中国闲话，朝我笑笑就忙其他事体去了，旁边个人听了侪哈哈大笑。我朝四面看看，发觉别人家骑个骆驼侪是老老实实，像我个室友杭州人丽雅，伊坐勒两米高个骆驼身浪，又是叫人家帮伊拍照片，又是叫我胆子大点覅吓，看得我眼痒唻，唉，呒没办法，只好搿能样子了。 驼倌用绳子拿骆驼连勒一道，每5只骆驼一队，我排勒阿拉搿支队伍个最最后面。哒、哒、哒，驼队进沙漠了！看到我搿只骆驼老是拿鼻头碰前头骆驼个屁股，看起来邪气活络，我心里向觉着勿太平，勿过，我又想到，埃及个双峰骆驼、国内个沙坡头、腾格尔个骆驼我侪骑过，眼门前搿只单峰骆驼应该勿会出啥事体伐？为了壮壮胆子，我轻轻叫搭伊讲：“骆驼娘娘小宝贝，侬乖一眼噢。”伊像啥晓得我个心情，刚刚开始表现还勿错，我也开始抬头欣赏沙漠日出。 走走停停，我东张张、西望望勒看野眼，周围高高低低个沙丘就像是海浪，怪勿得骆驼拨叫做“沙漠之舟”，真个是蛮形象个！ 突然之间，搿只骆驼嘴巴里向发出“吭哧、吭哧”个声音，身体还摇来晃去，我虽然心里向一直是有所防备个，但实在呒没想到伊会得突然发脾气，一记头掌握勿牢平衡，“咕隆咚”，搿只头皮撬个骆驼就拿我掼勒沙地浪向了呀。 掼下来个辰光，我个脑子还是蛮清爽个，两只手抱牢仔头，身体也用力卷起来，常怕伊个脚来踏伤我。 还算好，沙地比较软，骆驼呒没踏伤我，只不过右面小腿个皮破脱了，有点出血。 听到我哭出乌拉个声音，驼队停下来了，领队搭仔驼倌看我老半天也爬勿不起来，以为我骨头跌断脱了，侪老紧张个。还好我勿是辣末生头掼下来，骨头呒没断，就是身体像捏面粉一样播恶狠狠叫个肉勒一圈，浑身酸痛呀。伊拉一听没啥就放心交关了。驼倌拿我抱起来，呜哩哇啦讲了好几句闲话，勿不过我一句也听勿懂。我通过领队搭伊讲：“我覅勿骑骆驼了，实在是吓煞脱了！” 驼倌看我坐勒沙地里向发抖，以为我冷，就讲要拨我烤火取暖。看伊两手空空哪能变得出火来？想到伊做点生活也勿容易，我就拿出20个第纳尔（摩洛哥货币）拨伊。驼倌一记头邪气感动呀，勿停个讲“恰那（China），果德（good），三克油(thank you）!”乃末我佝头缩颈、一跷一跷，实在是走勿到沙漠最好看个地方了，只好靠领队帮忙，慢慢叫退出了沙漠。 接下来个五六天，我侪蛮苦个，睏下去、爬起来侪要用手勒床头柜浪向借把力道，勿敢咳嗽，勿敢打喷嚏，也勿敢笑，否则身体里向就会得闷痛。搨了药膏，头颈感觉好点了，但是腰伸勿直。亏得我带了登山杖，走路可以借力，但是总归是慢吞吞个。到菲斯老城观光个辰光，我一个人勒城门口等伊拉。哎，出了介许多铜钿银子乘仔飞机到北非来晒太阳！不过呢，城门口西洋镜也蛮多个，最稀奇个是小毛驴驮液化气罐头。咖啡店里还有勿少像我一样个外国游客，还有做游客生意个当地导游，当伊拉来问我，“是否需要陪同”个辰光，我邪气老鬼个用英文讲：“阿拉是团队，我勒勒等人！” 回到上海，第一桩事体就是到医院里去拍片子，骨头呒啥问题，吃药舒舒筋骨，止痛，总归要捱脱一抢，就是买汏烧只好歇搁了。 朋友讲我一跤掼到撒哈拉，下趟勿好再瞎走八走了。囡儿讲：“阿拉姆妈全世界个沙漠侪走好勒呀！”我回答伊：“阿拉搿趟走个地方离三毛住个阿雍镇差了六七十公里，下趟我想自由行，到伊面去看看。” 看我笑也勿敢笑个尴尬样子，囡儿是摒勿牢哈哈大笑了呀！ 图片来自网络 往期回顾： “上海言话讲起来”旨在传播沪语，若有不当之处，敬请留言指正。 感谢您的支持转发，欢迎关注本公众号
|
|
|
来自： 渺渺m69vnzsah9 > 《待分类》
