（本文用吴语上海市区话撰写，遇俚语则用现代汉语普通话注释）  正文共：4202 字 9 图 预计阅读时间： 11 分钟 一、引子 勒吴语个领域，太仓是一块宝地，为啥是宝地？因为太仓个吴语语言资源相当丰富，一个666平方公里个县级市，就有至少三种弗一样口音个吴语，而且各具特色。2019年12月，因为一次突发奇想，“80后”个我搭我个同好们，来到了“宝仓”，邂逅了几位优秀个“80后”发音人。此地两个“80后”弗一样，阿拉个是1980年以后出生个人，而发音人们则是两位80岁朝上个老人。 二、屋檐下个偶遇 2019年10月20号是一个普通周末，阳光明媚。我勒末生头（突然之间）心血来潮，想搭朋友一道踏摩托车去兜马路。朆料着侇回头我讲，忒突然了，今朝弗来三（不行）。我心里向想，已经做出决定了，随便哪能今朝也要去跑一埭摩旅。葛末假使要出去，去何里面呢？我对牢手机地图划，一看附近太仓有只沙溪古镇，摩托车过去2个钟头弗到，我也从来朆去过。我也呒没多想，就穿戴整齐，踏仔我部“大绵羊”摩托车上路了。
大概跑了2个钟头一刻钟，我总算到了沙溪。勒马路旁边停好摩托车，我就开始随便兜兜孛相相。走景点，我是欢喜另辟蹊径个，外加对吴地文化情有独钟，葛咾（因此）我就走到了当地人住个弄堂里想开开眼界，看看可有啥新鲜个物事（东西）。我兜到一家人家屋檐下头，看见一块有雕花个瓦当，齐巧屋檐下头坐仔位阿太，看上去大概80岁横里（左右），精神矍铄。我问侇，侇告诉我瓦当是假个。迭能一来一去攀谈，主客双方就热络起来了，阿太姓倪，我就喊侇倪阿婆。倪阿婆喊我到侇屋里坐仔歇，讲拨我听侇屋里只二眼灶个故事。侇讲，侇屋里只灶头是沙溪古镇里唯一只挺下来个。我搭倪阿婆三胡茄（聊天）仔大约摸半个钟头，话题涉及古镇变迁、家长里短，还有养狗个事体。起身道别前头，我问侇，因为我勒做保护方言个事体，可弗可以下趟我再来，带学生来调研语言状况，顺带便听听侬用当地闲话讲故事？侇毫不犹豫答应。当时我也只是随口一讲，到底是弗是可能来调研我心里实际呒没数目，我想侇大概也脱我一样呒没当真，但呒没想着迭个一趟偶遇竟然促成仔阿拉两代人后来3个号头4趟个人生交集。 三、二访沙溪获信息 出于习惯，我当天回转去以后脑子里侪是倪阿婆个口音搭词汇，古镇个景致倒是一眼眼也朆记得。当日夜头我拿自家当天个经历，搭想对沙溪方言、文化进行调查个想法讲拨了两个人听，一个是我语保圈里个朋友S君，另外一个是我指导过个学堂里沪语社个社长L君，是一个90后。两个人侪（都）表示支持，同时S君还推荐我圈里一个90后阿根廷小伙子Fede，听说侇对方言个音系、词汇记录邪气有兴趣，Fede讲太仓个音系几乎是空白，只有词汇个书，侇蛮想去做迭桩事体个；L君则帮我向两位也勒社团里个00后学生，侇拉想做一只“言传三代”个吴地口述史项目。 第二天我拉了一只微信群，拿两批人统统摆进来商讨。大家你言我语，计划探讨个比较热烈。弗过，语言、文化个调查是一项比较专业个事体，又要年纪大又要识字，还要体力搭得够，迭个弗是茄三胡好比个。我想着，实质浪我自家也确弗准沙溪个倪阿婆到底能弗能够胜任阿拉个调查对象。当日，我也呒没留阿婆个联系方式。想来想去，我只好勒群里向讲自家再去跑一垯，搭侇约约看算了，让其他朋友等我消息。
10月27号我借带家母到沙溪去孛相个因头，再次驾车开到沙溪。家母搭我分头行动，侇孛相侇个，我就直冲倪阿婆屋里去了。到侇屋里门口头，看见倪阿婆勒搭隔壁邻舍茄三胡。我远远较招招手，大概眼睛弗好，倪阿婆笃悠悠走过来，到跟前头面孔尴尬，好像意思：像煞认得又想弗起来。我豪𢜶（立刻）自我介绍，阿婆想起来了。我就拿来意讲出来，本来还担心倪阿婆回头（拒绝）我，后首来侇倒还记得侇答应过我，并且问我被调研人个要求。讲拨侇听之后，侇讲侬稍为等一歇，就出去了。1分钟后头，另外一位阿太来了，倪阿婆介绍迭位是镇浪个知识分子——姚老师，是一位退休小学算术老师。迭位姚老师身长四尺半超过眼，样子也有80岁朝上了，思路搭倪阿婆一样清爽。阿拉几介头（几个人）就到倪阿婆屋里客堂里坐下来商量。姚老师耳朵好像弗大灵光，我坐勒侇对过也听弗清爽，有几趟侪要坐勒侇旁边个倪阿婆传言话。也是迭个辰光，我晓得姚老师已经88岁了，倪阿婆也已经86岁。 听说我是想来调研沙溪方言个，姚老师也交关爽快个答应了。我又问了侇屋里个语言情况，侇讲沙溪镇本地人已经侪出去工作了，留下来个本地人侪是老人，小朋友相当少，就算有也侪讲普通闲话了。 迭歇，我总算相信，方言保护者们担心个事体——方言跟随老人灭亡，真个是勒我眼门前要发生个事体。 因为具体调研日脚还朆确准，我就留仔倪阿婆屋里个电话。搭两老打好招呼，后首来我就转去了。转去后我马上勒群里拿今朝个情况进行仔说明，几番讨论后，伲决定12月8号过去正式调研。第二天，我就拿确准个结果打电话讲拨勒倪阿婆听。 四、水到渠成个调研
12月8号，由我开车，搭我两个00后学生还有Fede一道，带仔特为发音人买个“沈大成”糕团到沙溪去了。到仔沙溪伲兵分两路，留侇拉几位稍作休整，我一个人到倪阿婆屋里去招呼。到仔以后我发觉，侇拉两个人已经勒门口等好了。攀谈几句之后，侇拉马上拿我带到预先撤空个居委活动室，我也豪𢜶电话打过去喊侇拉过来。大概一刻钟以后，大家就侪会合了。 10点多钟辰光，调研开始了。出乎意料个是，还来了个50多岁个男士，徐先生。侇是倪阿婆特为寻得来个。因为上趟去我曾提着过一句，顶好有男女有老年搭中年人。没想到阿婆听进了，还成功物色仔一个口音纯正个发言人。徐先生本人业余唱沪剧，还会得英文，作发音人个辰光充满自信。一直到12点钟勿曾到，徐先生个发音记录结束了。经过中饭，下半日1点钟姚老师个发音记录开始了，倪阿婆也勒侇后头“参谋”，3点多钟姚老师个发音记录也结束了。作为记录人Fede对结果比较满意，因为迭趟调研非但拿沙溪话中个发音谱系、连读变调、词汇用法进行仔比较完整个记录，而且得到了男女弗同人个发音。大家还相当有兴致个拍了一张合影。
迭趟调研活动因双方侪准备充分，而水到渠成。 离开之前，倪阿婆相当开心，拿阿拉统统喊到侇屋里客堂，拿点心拨阿拉吃。侇养个小狗母女两介头也出来迎接，气氛相当热烈。阿婆讲，外头到沙溪来个人客弗多，阿拉来实际侇也蛮开心个。关照阿拉下趟再来，来个辰光带照片来。
两个多钟头阿拉侪到了自家屋里，Fede当夜就着手做音系图谱绘制。两位00后则意犹未尽，过仔一个多礼拜，我收到其中一个人个微信。侇拉感觉迭趟经历相当有意义，已经想好了一只以“口述历史，言传三代”为名字个项目准备向学堂申报。争取搭阿拉一道，模仿当天个模式，想办法拿长三角别个地方个语音、故事也进行记录、整理，再候机会摆到暑期社区托班个课程里去。让“长三角”一体化个触角伸向地域文化领域。 不过，调研活动并呒没结束。 五、四访沙溪查遗补漏
过仔3个礼拜，Fede告诉我，还有几个疑问需要澄清，可否再去一趟。我厚牢面皮再打电话拨倪阿婆。不过我倒毫无担忧，晓得倪阿婆必定会得答应我。事实也证明了我个想法是对个。12月30号，2020年新年前夕，我带好上趟调研个照片，以及一眼小礼物，搭Fede一道第四趟回到沙溪。 一样个路线、一样个地方、一样个人，一切侪驾轻就熟。姚老师一介头接受阿拉个调查。经过我搭Fede通力合作，所有个疑问侪得到解答。调研活动顺利结束。 第二次话别，倪阿婆搀牢仔我搭Fede个手连声道谢。我讲，应该感谢个是两位阿婆，几次三番个拨阿拉麻烦，一眼眼也弗动气。我强调，迭趟调研结束，不过绝对弗是阿拉见面个挨末（最后）一趟。希望两位老人保重身体，我还会得来望侇拉个。活动个双方应该心里侪晓得迭趟告别绝弗是人生个诀别，伲会得再相见个。 六、调研经历个感想
迭是我人生当中头一趟进行语言方面个田野调查，勒学习个过程当中，我觉着自家开了眼界。同时，调研后期个工作当中个新情况，让我作为一个语保者，感觉担忧越加深重了。头一个是因为太仓介大个县级市，居然市面浪朆看见一本可以详细介绍覆盖全市音系个著作；第二个是当地人口老龄化相当严重，外来人口导入，方言个消失赛过是倒计时；第三个是后来翻阅了1991年个太仓县志，发觉伲调研沙溪语音出来个结果搭县志记载个已经有出入了，但是阿拉调研个是姚老师1931年出生个老年人，更何况倪阿婆也勒背后，侇拉两介头个发音搭书浪记载个侪弗一样，外加徐先生也是。迭三点，足可见地方政府对当地语言个重视程度、老百姓对方言个依恋程度、传承效果，迭个几点侪用一个“弱”字可以形容。 两位“80”后老人，搭5个“80”后出生个年轻一代个迭趟奇遇，让人最欣慰个是大家对方言个眷恋是如此相似，不过迭个眷恋也只是局限勒阿拉迭眼人之间个眷恋。实在是弗清爽，其他当地人是啥个感想，移民是啥感想，当地政府又是啥个感想。文化灭绝，绝对弗是危言耸听，大家侪认为文化灭绝两个字好像看上去只搭一个民族搭界。阿拉中华民族是大民族，弗可能有文化灭绝个。不过大家是否想过，民族个概念是上级概念，下头还有民系概念，阿拉老百姓个身份应该有两重，弗单单阿拉是中国人，阿拉还是东北人、河北人、福建人、广东人，阿拉还是东北大连人、河北唐山人、附件泉州人、广东梅州人。民系个文化、语言才是大家身份个细胞核，脱离细胞核，细胞就是死个，是没办法自我复制个。阿拉民族假使弗是一个一个活生生个“细胞”——当地人构成，阿拉个民族就弗是有机体，就像没生命特征个人工智能一样。灭绝个虽然弗是中华民族个文化，但民系文化灭绝很可能从侬个家乡闲话开始，一直到习俗。 请大家醒一醒，让充分为阿拉个家乡话腾出空间，通过一个一个个体个努力让阿拉五彩缤纷个地方文化生生不息。 新浪微博：吴语学堂微博 |
