|
上海老底子每天呈送精彩文章一组 打开尘封的记忆，寻觅往昔的岁月
叙上海老底子事 忆上海老底子人 诉上海老底子情
来源：夜光杯 原创：俞亮鑫 沪语改编，讲述：朱友好 推荐、审阅：丁迪蒙 编辑：王乙其 捧一眼井水汏面孔，拎一桶井水汏浴，石库门个热天也有得清凉个记忆。
老底子，上海交关老弄堂里侪有一只井个。到了大热天，石库门个居民邪气欢喜迭个冰凉个井水。大家捧一眼清凉个井水，揩把冷水面；或者拎桶井水，汏把冷水浴，迭种感觉邪气好！但是，迭种石库门弄堂里个水井，随牢仔岁月个变迁、社会个发展，现在只存在勒童年个记忆当中了。 勒电风扇、空调进到千家万户之前，我个印象当中，用井水就是石库门居民最好个降温办法。伊个辰光，生活物质缺少，弄堂里有只井会得拨居民带来邪气多个欢乐。 我屋里个石库门弄堂叫崇仁里，是条百年个老弄堂了。弄堂勿大，但是有只圆个井。井口浪向个盖头是弄堂个一个制高点，勒搿搭可以唱歌、打牌、掼沙包、比手劲、着四国大战。白相弄堂游戏——骑马打仗赢个人，还可以鲜夹夹个立勒井个盖头浪，接受小朋友个掌声，拿伊看作小囡王。大家围牢仔小小个水井，其乐融融。
让居民有更加多个收获个当然是井里个水，伊覅出一分洋钿，冬暖夏凉。井口个木盖头浪平常辰光还要挂把锁，防止大人勿勒海个辰光，小囡勒井旁边白相，一勿当心落到井里向去，是邪气危险个。 水井最闹猛个辰光是热天，到夜快头，就会得有大人来开锁勒井口浪个锁。大家排好队用铅桶接水。乃末，一桶一桶拎转去，拿木桶、面盆侪装满。揩面、揩身，迭个是防暑降温个好办法啊！ 假使屋里有西瓜、汽水，就马上拿伊拉浸勒迭个冰冰瀴个水里，让伊拉慢慢叫变凉，变成功防暑降温个佳品。有眼聪明个还会得动出脑筋，用一只大个网兜套牢仔几只西瓜、几瓶汽水，然后用长绳子拿伊拉慢慢叫放下去，放到井水深一眼个地方去“冰镇”。过脱一歇，“冰镇西瓜”“冰镇汽水”就可以捞出来了。伊种冰凉个味道，就一个字，爽！
阿拉小辰光呒没空调，电风扇也邪气少。勒屋里做好功课，热煞脱了，用扇子用力扇还是汗搭搭渧，迭个辰光，就会得想起来弄堂里冰凉个井水。拎眼井水上来揩把面，脑子马上就清醒了，呒没介热了。最爽快个是勒高温勿退个烧烤天，拿一桶冰冰瀴个井水，从头顶浪浇下来，浑身就冷透了，有辰光还会一记头冷了吃勿消，浑身发抖，有辰光身浪向起鸡皮疙瘩。 伊个年代邪气注重节约，滴水像滴油，随便浪费水，爷娘要打屁股个。阿拉看到有井水，就像得到宝贝一样，会得勒井旁边喊几个同学、好朋友，用小囡个“塑料水枪”白相，打水战。衣裳裤子侪湿透了，满面孔是水，满弄堂也侪是水迹足。 有大人看到会得讲：“小鬼头，千万勿要浪费自来水啊！”迭个辰光，阿拉也哇啦哇啦讲：“迭个是井水！阿拉帮侬屋里门口浇浇水，侬好风凉眼！”讲迭句闲话真个是有道理个。滚烫个水门汀浪浇盆冰凉个井水，确实降温明显。到夜快头了，阿拉常庄会得用井水浇出一块块清凉个地方，搭块门板，就可以当吃饭个台子了，也可以当床乘风凉睏觉了。 现在，上海最热个天，大家侪躲了屋里“孵空调”了。但是，勒上世纪六七十年代，天热屋里闷了，实在蹲勿牢。弄堂里个人就会越来越多，成千上万个“乘风凉大军”就侪到弄堂里来了，慢慢叫延伸到了马路浪、路灯下头。记得伊个辰光最热个三伏天里，弄堂里个井水一直是勿够用个，有辰光还会打出一眼带烂泥、又浑又黄个井水。埃歇横里，大家侪觉着，热天呒没冰凉个井水，迭个热天勿晓得哪能过哦！
上海是江南水乡，石库门居民也侪保留迭种江南个民俗习惯。搿搭虽然到处侪有河流，但是，因为人口慢慢叫多起来，河道慢慢叫也变成了马路。井水对居民个生活，慢慢叫也就变得邪气重要，尤其是勒勒自来水还呒没普及之前。有眼石库门人家，还会勒自家天井里打只井，烧饭、汏衣裳、打扫咾啥……侪要靠伊。碰到大冷天，井水是热个，汏衣裳汏菜，呒没冰冰冷刺骨头个感觉。辰光长了，还好省下来一笔水费！弄堂有水井，也是居民个福气。
改革开放，让上海发生了沧桑巨变。老里八早，上海市民常庄看到个弄堂水井，现在大多数已经填脱或者废脱了，越来越少，甚至老难看到了。迭个是上海石库门居民忘记勿脱个记忆啊！
讲述：朱友好 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。
转自：“启迪心田沪语”公众号 我知道你在看哟~ |
|
|
