 沪语朗读：边秦翌 作者：郑自华 沪语改写、诵读：边秦翌 搿一枪，听到交关关于“嗲”个议论。一开始有人讲，“嗲”搿个字拨最最权威个英文辞典，就是诶个《牛津英语大词典》收进去了，后首来又讲呒没搿桩事体了。但是勿管哪能，大家用到“嗲”个机会是越来越多了。 “嗲”，本来是上海人用个口头语，搿歇有眼北方人也欢喜用“嗲”，认为“嗲”勿单单有上海个味道，而且还能表达其他个意思。甚至还有人讲，“嗲”搭仔北方闲话里向个“撒娇”老像个，实际浪啊，搿是勿一样个。 “嗲”个意思比“撒娇”要多眼，撒娇么，是一种声音搭仔态度个外露，而“嗲”呢，勿单单包括了“撒娇”，而且要比撒娇使用个范围更加宽泛。 比方讲，看了一只电影，读了篇小说，有人讲伊“赞”，上海人就可以讲成功“嗲”，搿个侪是勒勒表示“好”个意思。到朋友屋里想去参观新房子，会得讲：“伊拉屋里向勿要忒‘嗲’噢！”搿是指硬件装修、软装布置侪邪气温馨，用“嗲”来评价，就显得特别到位。 侬看呀，搿个“嗲”搭仔“撒娇”是浑身勿搭界个。 上海人侪蛮认可“嗲”搿种评价个，觉着评价邪气准确，拿要表达个意思侪清清爽爽个讲出来了。讲个人、听个人互相之间邪气理解，勿会拎勿清个。而且，好像也呒没其他更加适合个词语可以替代“嗲”了。 “嗲”可以组成个词语是老老多个，像嗲勿煞，嗲声嗲气，嗲劲，嗲溜溜，嗲妹妹，看到伐，“嗲”比“撒娇”要来得传神。 嗲，一般用勒小人搭女人身上，小人对大人发嗲，搿是让大人来宠伊；女人对男人发嗲，搿是让男人来爱伊呀。小朋友发嗲，比较随意，邪气天真，大家侪欢喜个。女人发嗲，一般就要看看环境，看看对象，看看对牢啥人发嗲了，事实浪，男人也老吃嗲个呀。 朗读者 嗲，是一种添加剂，生活当中有了眼嗲，就有了眼色彩。 嗲，搭年龄呒没关系个，任何年龄侪可以嗲。 有趟开会，我齐巧坐勒著名艺术家秦怡女士个后头，我快点捉牢机会，搭秦怡女士一道拍了一张照片。后首来，我拿搿张合影个照片挂勒自家个QQ空间高头，有网友评论：90岁个老太，还介嗲，真正是勿容易啊。搿个“嗲”，是对秦怡女士最好个评价，是海派女人最高个体现；伊个大方得体，气质高雅，实在让人眼热得勿得了。 比“嗲”还要好个，就是“瞎嗲”，搿个“瞎”，就是十分、邪气、非常、相当个意思。我曾经看到一对耄耋老人，老先生耐心个拿橘子剥好，再一瓣瓣个送到老太太个嘴巴里向，老太太对牢仔老先生发嗲，要拿橘子个核吐勒老先生个手心里。哎呀，这种嗲邪气有情趣，也是老夫妻之间个一种生活方式。 勒生活里向，阿拉常庄会得听到搿能一句闲话，叫做是：“吃了洋籼米，发了糯米嗲”。所谓洋籼米，就是老底子米店里向卖个一种米，吃口比较差，现在勿大看到了。米有洋籼米、大米搭仔糯米咾啥，洋籼米个涨性比较好，糯米有粘性，假使讲硬劲要讲洋籼米也有糯性，就有眼勿伦勿类了。就像煞是勒现实生活当中，吃小米就发发小米嗲，吃糯米么，就发发糯米嗲；发嗲，定位要准确。假使“吃了洋籼米，发了糯米嗲”，搿就好比是历史浪向个“东施效颦”，忸怩做作，让人看到听到，鸡皮疙瘩也要竖起来了。 男人千年难板也可以发发嗲个，但基本浪只能限制勒搭仔伊之间，而且一定要掌握分寸。否则，男人“吃了洋籼米，发了糯米嗲”，乃末，会得看到其他男人对牢伊翻白眼，还会得到女人对牢伊敲拳头个呀。  图片来自网络 上海言话叙身边事体 往期回顾： “上海言话讲起来”旨在传播沪语，若有不当之处，敬请留言指正。 感谢您的支持转发，欢迎关注本公众号
|
|
|
来自： 渺渺m69vnzsah9 > 《待分类》
