 沪语朗读：陈飞 作者：丛奇 来源：夜光杯2020.8.8 上海话改写：郭莉 讲述：陈飞 上世纪八十年代初，我跟我太太还勒勒热恋个辰光。我屋里搭仔伊屋里侪勒勒环城个中华路浪，当中就隔了三站路，伊歇辰光中华路16号信大祥绸布店楼浪个“登山”电影院，齐巧就勒勒阿拉两家人家个当中，乃末“登山”就成了伊歇辰光阿拉“轧朋友”经常光顾个地方。 南市小东门一带呒没啥顶级电影院，但是有三家电影院偏生勒勒上海电影界小有名气，搿就是最老个中华剧场、最小个文化电影院，搭仔最高个“南市俱乐部分部影剧场”，也就是大家侪晓得个“登山电影院”。 用现在个眼光来看，迭个影剧场实在忒简陋忒推板了。像根带子一样狭长，舞台下头就摆了一排一排个靠背长条椅子，头顶浪装个是老式电风扇，开起来吱吱吱声音老老响个。剧场还有一扇安全门，从舞台边头个一只狭窄个水泥扶梯盘旋下来，出口就开勒信大祥绸布店个旁边。 “登山”电影院是挨勿进头轮电影院个，只好放眼老电影，或者是新电影个二轮三轮，所以电影票也勿紧张，可以随到随看，一般电影已经开场了，还勿断有人买了票子摸黑进来。因为放个是老片子，“登山”个票价也比别人家个要便宜，譬如，跟勿远地方个沪南电影院相比，总归要低1角或者低5分。伊歇辰光，轧朋友个年轻人好去个地方勿多，所以冷天介阿拉“荡马路”约会侪欢喜到“登山电影院”去避寒，勒勒电影院暗头里还好讲点私房闲话，至于到底放个是啥个电影已经是勿重要个了。电影散场，阿拉就勒勒隔壁个点心店里吃一客生煎馒头，再加一碗小馄饨或者咖喱牛肉汤。 不过，大热天里大家是勿敢到“登山”去个，因里向屋头顶老老高，老式个吊扇也就吊得邪气高，扇出来个风有气无力。虽然进场辰光每个人会得发到一把纸头扇子，其实是一眼用场也呒没个，一个多钟头个电影看下来，热得侬汗嗒嗒渧呀。 我跟太太恋爱个进程，就是勒勒“登山”看电影过程当中勿断发展个。眼看就到了谈婚论嫁个阶段了，但是啊，婚房就成为了“拦路虎”，有一段辰光为了房子，搞得两家头心里向老烦个。有一日天夜里向，我又拉伊到“登山”去，看个是苏联电影《列宁在1918》，电影里，瓦西里搭太太讲：牛奶会得有个，面包也会得有个！我跟太太也受到了感染，两家头情勿自禁个握紧了对方个手。电影散场以后，阿拉勿知勿觉走到了黄浦江边，商量起婚事个安排，打算，也好好叫个感受了夜上海个魅力。 结婚以后，我跟太太有一段辰光是住勒浦东个。有趟带了小囡到十六铺搿搭来看我个爷娘，阿拉特地到“登山电影院”看了场电影。当时，上海一般性电影院个设施已经邪气现代化了，但“登山”变化还是勿大，里向个是观众寥寥无几。一家门坐勒电影院里既熟悉又陌生个、硬邦邦个长条木椅子浪，真叫是感慨万千。“登山电影院”，就像一位苍老个长辈，见证了老百姓看电影个环境条件、搭仔文化生活个巨大变迁呀。 往期回顾： 图：网络 / 编辑：渺渺
|
|
|
来自： 渺渺m69vnzsah9 > 《待分类》
