 沪语朗读：刘时医 作者：胡展奋 沪语改写：边秦翌 沪语讲述：刘时医 热天介弄堂里向剥毛豆个场景，就算到了今朝还是蛮难忘个。 毛豆差勿多算是黄豆个小朋友版，伊个小名就叫做“毛豆子”。勒勒上海，拿一个人个小名叫做“毛豆子”个闲话，就显得有得一种特别的欢喜，因此用做小名个邪气多，阿拉弄堂里向当年叫“毛豆子”个至少有得三个人。我小学同学“六毛豆”，勒勒屋里排行第六，伊高头个阿哥阿姐，从大到小侪挨勒海，“大毛豆”、“二毛豆”搿能介叫下来噢。 大热天个上半日八九点钟，乘牢仔气温还呒没到最高，弄堂里个老头老太，前楼阿姐，厢房阿嫂就开始搬出矮凳，围仔小台子，或者两只方凳一拼，就勒勒阴凉头里剥毛豆了，常庄是一边剥一边嘎三胡，啥个亭子间囡囡个皮鞋覅凭票啦，前客堂夫妻个揩布忒龌龊啦，啥人“花擦擦”，啥人“嘭嚓嚓”，啥人“戆搭搭”咾啥。 剥毛豆大多数个辰光眼睛朝牢仔下头看，勿看人家个面孔，所以平常道理勿讲个闲话，搿歇统统侪讲出来了。 其实从剥毛豆个小动作里向，也是可以看人、看心、看脾气个。有个人手势老老急个，飞快个剥自家个豆荚、抢人家个话头，搿种人一般侪是心直口快，急扯乌拉，常庄拿毛豆虫搭仔坏毛豆统统撸进，做事体总归有眼马马虎虎个；有个人欢喜手里捏一把剥好个毛豆，一直要到手里已经拍拍满，实在拿勿牢了，再肯放手摆到碗盏里去，搿种人比较容易妒忌，赌性也重，欢喜搭人家叽里咕噜搞勿清爽，上海人讲起来叫做是“吃心大”，炒股票容易输，为人人缘差；也有人是笃悠悠个剥毛豆，手里有得八九粒豆子了，就一定要摆好，搿种人比较淡定，自控力邪气强，做起事体来是有理有据，差勿多算是弄堂里个意见领袖伐；还有一种人呶，伊剥好仔一只豆荚，就要拿毛豆一把捋清爽，马上就摆到碗盏里向，手里向是勿留个，搿种人呢，一般侪蛮自说自话个，还有眼洁癖，做人么一板一眼硬挢挢个，碰着事体呢，总归会得斤斤计较，口口声声讲起来是“桥归桥路归路”。 毛豆剥好，大家各自回去。热天介个过饭小菜，哪能可以呒没毛豆子呢？讲起来啊，迭个毛豆真正叫做是“百搭”，像煞是冬天介个冬笋丁，相声里向个捧哏，随便搭仔啥人搭档都要为对方加油，天生就是只“撬边模子”，侬想想看呶，一只咸菜炒肉丝里向哪能可以呒没毛豆子呢？除脱释放自家个鲜香，毛豆还要吸取人家个精华，特别是隔了一夜天个毛豆子，就是因为渍透了肉丝咸菜里个汤汁，味道邪气好，大家个筷子像落雨一样朝牢仔伊点过去。 阿拉小辰光常庄吃个是咸鲞蒸毛豆，或者臭豆腐蒸毛豆，搿歇已经勿大看到了。其实啊，老底子搿能介个配菜是邪气有得奥妙个，因为毛豆子既“吸咸”，又“除臭”，实在是两只主菜个“共享基金”，勿管味道太咸还是太“熏”，侪可以多吃几粒毛豆子来带带节奏。 面拖梭子蟹听上去是忒呒没意思了，十足像个小市民个样子，但是只要加一把毛豆子，立时三刻就碧绿生青，马上就是“遥望洞庭山水翠，白银盘里数青螺”个意境了。哎呦，毛豆吸足了蟹鲜，着腻又拿毛豆侪裹勒海，啧啧啧，迭个味道啊，真个是自家晓得。 茭白炒肉丝，假使呒没毛豆子帮忙，整只菜就软咚咚个呒没腔调了呀。丝瓜炒扁尖丁，如果侬勿摆一把毛豆子呶，就像煞是炒“萧山萝卜干丁”里向勿摆毛豆一样个，老上海人是勿会得搿能介做个。侬稍微瞄一眼就有数了，高头讲到个几只菜，侪是吃到一半毛豆子老里八早就拣光了。 热天介个毛豆子就是搿能介个吃香，勿要忘记脱噢，伊还可以做烤毛豆。迭个辰光，毛豆子总算当主角了，必过，搿也是伊唯一个一趟。 天气忒热，假使勿愿意花辰光去剥毛豆，呒没问题啊，简单来西个，拿把剪刀，嚓嚓两记，拿毛豆荚个两个尖角剪脱，汏汏清爽，摆勒盐水镬子里向一煮，哎呦，味道赞啊，筷子也勿用唻，直接上手，一吃就“刹勿牢车”，饭也勿碰了，一直到吃光为止。 烤毛豆，最好吃个要算晏熟个“牛踏扁”了。毛豆个品种邪气多，有名气个有得成都个白水豆，南京个大青豆，上海本地个慈菇青搭仔“紫香毛豆”，但是只有“牛踏扁”最适合做烤毛豆。老上海侪晓得，上世纪七十年代前后，上海郊区特产一种豆形像煞是牛脚掌一样、扁圆形个“牛踏扁”毛豆，中秋之后上市，因为“牛踏扁”个糯、酥、甜、大，就拨称之为最好吃、最正宗个上海毛豆。必过，由于伊个壳比较厚，出肉率比较低，每公斤毛豆剥好壳之后，只有300到400克，而且还容易倒伏，台风一来就碎了一地，所以伊个种植量是越来越少了。迭个“牛踏扁”个体魄明显比普通毛豆要结棍，扁圆而且浑身金毛——注意，一定是浑身裹满仔密密麻麻个金色毫毛，吃起来酥香无渣，回味甘甜，能够搭仔伊比一比个就是“紫香毛豆”。“紫香毛豆”迭个品种近年也看勿到了，伊一般勒勒每年个10月初上市，外表看上去搭仔普通毛豆差勿多，但开荚之后让人眼睛一亮：饱满，椭圆，老翠色个球面浪看得到一缕缕个紫线，丝丝绛脉，蜿蜒明灭冰裂状，粒粒侪是艺术品啊，外观如珠如釉，入口糯香两全，侬侪勿大舍得拿伊送到灶披间，搭仔镬子铲子厨子打交道了。 必过，讲来讲去，毛豆到底只必过是毛豆，讲了半天还是离勿开“吃”，就像青菜个幼年期是“鸡毛菜”，黄豆个少年就是毛豆，古代拿伊称之为“菽”，汉代以后再开始叫“豆”。 邪气可惜，眼下头，阿拉上海周边还有多少毛豆地呢？就像弄堂里剥毛豆个乐趣也一眼一眼消失了，超市里、菜场里，到处可以看到已经剥好个赤膊毛豆，就像开了膛个啥个物事一样，侬称了分量，包好就走人，啥地方还有老底子个弄堂情趣呢？ “热天介剥毛豆”，看勿到了，也呒没了。 作者 朗读者 往期回顾： 图：网络 / 编辑：渺渺
|
|
|
来自： 渺渺m69vnzsah9 > 《待分类》
