 作者：朱海洪 沪语改写：边秦翌 沪语讲述：汤伟民 推荐：丁迪蒙 民以食为天！ 的确，老百姓侪邪气看重吃到嘴巴里向去个物事，搿歇个空气居然有了雾霾，就特别念想小辰光埃种简简单单个食品。 勒勒“坤范”边浪个小吃摊头，我曾经吃过5分洋钿一盘子个重油炒面。 小辰光，差勿多每日天个早饭侪是泡饭。就是隔夜饭用开水泡泡，再弄眼隔夜菜，像油煎带鱼、黄鱼鲞咾啥；假使是冬天介，就拿吊勒窗子外头个鳗鲞扳一块下来，哎呦，过起泡饭来鲜得勿得了。万一呒没剩菜，也是便当来西个，切一眼海蜇皮，浇眼酱麻油；或者皮蛋拌豆腐；再简单点，弄块乳腐，来一眼酱瓜、萝卜干咾啥，侪可以个。 带鱼、黄鱼、鳗鲞、海蜇皮，搿眼物事摆到今朝个台子浪向，称得上是“高、大、上”，但是勒勒我个小辰光，只能算是家常菜，呒没啥个稀奇个。 泡饭爽口是蛮爽口个，吃多了也想调调口味勒呀。难难板板袋袋里有了眼“压岁钿”，嘴巴就要馋了，眼睛就去瞄马路对过个路边摊。 走进摊棚，迎面碰着了阿拉邻居、楼浪向个王家大伯伯：“哦哟！稀客呀，来、来，来，我搭侬炒盆面”。我一本三正经个坐了下来。 大伯伯最最拿手个就是炒面。只看到灶头浪个火邪气烊，照得伊面孔红彤彤个，两只手“呛-呛-呛-呛”个上下翻炒。过脱一歇歇，一盆金黄色个重油炒面就端上来了。 浓油赤酱个面条滴溜滚圆，比起搿歇店家里个细面神气交关。不粘不坨咬劲足，几根小菠菜碧绿生青，还浇了眼花生酱，一拌一吃，香味道直冲鼻头，搿歇讲起来，马上就想到伊个味道了。 必过，街头点心再哪能好吃，总归比勿过自家屋里烧个美食呀。 面拖黄鱼是阿拉屋里个头牌菜。 1956年，爸爸“支内”去了河南洛阳。每年回上海探亲，姆妈侪要做搿道面拖黄鱼来为爸爸接风。 姆妈到山海关路小菜场去买大黄鱼，汏清爽之后切块，拿只青花瓷碗，里向摆一点点盐搭仔味精，再倒眼黄酒，要拿鱼块腌脱一歇。另外还要准备一只青花瓷碗，放一把面粉，加一块鲜酵母，搿是一种用粉红颜色个纸头包成扁方型个发酵粉，4分洋钿一块；再加一眼水调一调，面粉搭仔发酵粉侪漾开来了；打只鸡蛋黄，撒眼葱花，就成了面糊，等脱一歇就要派用场了。鱼块摆到面糊里向，拖一拖，四周侪滚了面糊，就可以油炸了。 一般是勒勒门口个过道搿搭炸鱼。等到煤饼火头邪气烊个辰光，就起油镬子。搿种辰光倒油，姆妈比平常里倒得大方多了，油烧到七、八分热，伊就用筷子挟起鱼块，勒勒面糊里向拖匀，“刺啦、刺啦”个下到镬子里，翻上翻下，一直炸到金黄焦脆。 四层阁王家大伯伯个老婆正好下楼：“鱼香唻！阿是海洪爸爸回来了？” “是个呀，是个呀！”姆妈兴冲冲个挟了一块鱼塞到伊个嘴巴里。 “乖乖哩个咚！好吃，好吃。”大妈妈一面吃一面颠仔小脚走下楼去。 房间里个收音机开勒海，搿是爸爸买个，“红灯”牌，107块，老价钿了。收音机摆勒老式个夜壶箱高头，夜壶箱就是床头柜啦。阿拉屋里个夜壶箱是从乡下头带出来个，蟠龙雕花，古色古香。老式个夜壶箱浪向摆台收音机，倒是蛮特别个，传统里向透出眼时尚个气息。 爸爸欢喜听京剧，特别欢喜“四大须生”里向个杨宝森。听到杨派个“我本是卧龙岗散淡个人……”伊就会得闭勒眼睛，跟牢仔哼发哼发。伊还特别欢喜听姚慕双、周柏春个滑稽戏。姚、周两兄弟是宁波人，乡音乡情邪气亲切。 我拿煎好个面拖黄鱼端到房间里向，爸爸正好勒勒听《宁波音乐家》： “来发，棉纱线掇来…” “勿掇…” “来发勿掇沙发、勿掇棉纱线，来发，懒惰！” “来发勿懒惰，来发来发痧。” 伊听得笑出来了。 面拖黄鱼摆上台子，屋里小囡侪开心得勿得了，爸爸也眉开眼笑。我快点乘机挟一块鱼，先吃起来。咬开金黄色个外壳，一股热气冲出来，嫩白无骨个鱼肉、爽滑香脆。爸爸拿出山西汾酒倒上一小杯。 汾酒助餐，鱼香更浓。一家门坐勒一道，欢声笑语，其乐融融。 往期回顾： 图：网络 / 编辑：渺渺
|
|
|
来自： 渺渺m69vnzsah9 > 《待分类》
