上海人爱吃个 “酱油肉” 作者:王智琦 沪语改编、诵读:和沁 上海人现在勿大吃酱油肉了,呒没想到搿趟疫情封控里倒是酱油肉救急了。 三月初来,上海新冠疫情突然严峻起来,先是隔壁栋楼发现有密接者,门口马上搭起蓝色帐篷,大白们神色严肃个走来走去,勿远地方还停仔部警车,车顶浪警灯无声个闪发、闪发,气氛邪气压抑。“上海发布”每日侪辣及时发布疫情消息,我所住个小区也常庄列进,被临时封控了。 居委干部搭志愿者为每家每户送来一大包蔬菜,有洋山芋、卷心菜、胡萝卜唠啥。我打开冰箱看看,春节辰光买个存货差不多也吃光了,里向空荡荡嗰。我迭个人平时勿欢喜冰箱里囥交关吃个物事,怕窜味道。再拉出冷冻盒逐一查看,竟然寻到了一块酱油肉。我想起来搿是辣春节前头,大阿姐看菜场里肉价钿便宜,就勒屋里腌制蛮多酱油肉,还送一眼拔我吃,当时还不想要,现在才晓得金贵了。 我把酱油肉切得像纸头一样薄,薄到可以清晰看到猪肉个丝丝肌肉纹路,放辣卷心菜、胡萝卜里一道大火煸炒,味道喷香,胃口大开。每次切肉片辰光,我暗自数好10片勿敢多放,就怕吃光就没吃唻。 看着眼前个酱油肉,我倒想起小辰光姆妈做酱油肉个情景。辣物资短缺个年代,猪肉侪要凭票购买,三张手指掐大小个肉票,分上、中、下三旬,就是有钞票,也买勿到猪肉嗰。姆妈平常辰光邪气节约又精打细算,只能从牙齿缝里一眼眼省下点肉,放到春节头里做眼酱油肉,可以多囥眼日脚。 西北风呼吹起个春节前,姆妈买来一整条五花肉,开始制作酱油肉。记得要拿整条五花肉浸没辣酱油里,腌制几天后,捞出来挂勒天井个墙壁浪慢慢阴干。天井个墙壁老宽老高,冬天个太阳正好晒勿进来。 我看酱油肉颜色慢慢较由鲜红转为暗红,最后到酱红色,肉头收干到摸上去硬邦邦。每次蒸酱油肉辰光,姆妈总会邪气当心个切下一小块,汏清爽再切成薄片放到小碗里隔水蒸熟,碗底下渗出一滩油亮个汁水,淘进大米饭里吃,味道鲜得来,覅太赞哦。姆妈用筷子蘸蘸肉汁,算是尝过了肉味道了。巴巴结结个姆妈是勿舍得一记头吃脱酱油肉,虽然酱油肉看伊一眼眼少下起,但还会长远看到伊挂勒墙头浪……。 配图来源:网络 |
|