 作者：朱海洪 沪语改写，讲述：边秦翌 推荐：丁迪蒙 1959年也是新中国建国个10周年，庆典盛况更加勿得了，上海个庆祝活动是勒人民广场举行个。我有幸看到了国庆大游行。各行各业个队伍擎牢大型图表、模型、标语口号咾啥，排好队走勒马路浪，展示经济建设个成就，还展示未来发展个方向，群情激昂个向国庆献礼。夜里向，中山、虹口、复兴、闸北公园咾啥，以游园会个形式，开展文艺活动。市政府还组织群众性大联欢，从夜到6点钟一直搞到凌晨1点钟。各个街道挂仔彩灯，从9月30号夜到一直挂到10月2号。 最最好看个，肯定是国庆节搿天仔夜到放个烟火啊。 天气实际浪有眼冷了。我着仔粗个绒线衫，从王家伯伯伊拉屋里四层阁楼个老虎窗爬到屋顶浪，立勒人字形倾斜个灰瓦浪向看烟火。四周围个屋顶浪已经有得邻居屋里个人立勒海了，侪等勒海看烟火。勒搿能介个夜到，一眼就好看到邪气高个国际饭店搭仔漂亮个彩灯。 烟火勒勒天浪向呼啸迸飞，爆燃开来个烟花像煞是火树银花，又像煞是满天个星星。看得眼花缭乱。真是：缤纷烂漫个江南风光；国泰民安个祥和气象。 阳光过后，总会得有得风雨要来。勿知勿觉当中到了庚子年。《地母经》里向有得首诗讲到庚子年：太岁庚子年，人民多暴卒。春夏水淹流，秋冬多饥渴。 庚子是灾年。历史浪就有得交关记载： 1840年：鸦片战争，中国战败后割地赔款； 1900年：八国联军入侵，国土险遭瓜分，史称“庚子国难”； 1960年：三年自然灾害； 2020年：新冠疫情肆虐全世界。 1959年到1961年个自然灾害，加上“大跃进”个激进政策搭仔“中苏交恶”个外来因素，导致国家经济邪气困难。 最直观个印象就是饿，我饿煞脱了呀。 读书回来，中饭常庄是薄粥或者是“面疙瘩”，荤菜少来西个，一日到夜侪是眼豆腐渣、“光荣菜”咾啥。光荣菜是啥个物事啊？就是颜色看上去乌漆墨黑个卷心菜外皮啦。 物事实在忒少了，大清老早4、5点钟，还勒勒睏痴梦懂个辰光，就拨我姆妈拉起来到山海关路菜场去帮伊排队买小菜了。辰光忒早，还呒没开张，已经有得交关老头、老太搭仔砖头、篮头、小矮凳排勒伊面了。我眼睛也张勿开，迷迷糊糊个排勒砖头后头等姆妈来调我。 就算粮票再紧张，亏得还可以到馆子去吃饭。有段辰光，为了节约粮票，我搭仔兄弟跟牢姆妈到黄河路浪个“功德林”排队吃饭。 埃个辰光，粮票比钞票要吃香得多。“功德林”大堂里向坐满了食客，侪是缺粮票个，晏来个只好轧勒台子旁边，等人家吃好，碗盏还没收脱，就要快点坐下来。吃饭个呢，背后头有得介许多个眼睛盯牢仔侬，也勿好意思吃得忒慢，极吼拉吼个快点吃，吃好快点跑路。就算“功德林”呒没荤菜，但搭“光荣菜”相比，绝对算是山珍海味唻。 …… 五十年代风清气正，伴牢仔我度过了童年搭仔少年。可惜“文革”来了。阿拉屋里从新昌路搬到青岛路；呒没多少辰光，我也“上山下乡”，离开上海了。 多年之后，我又回到上海，结婚成家住勒另外地方。老底子住过个房子再也没转去蹲过，千年难板回到老房子去看看，也物是人非了。但是，烟雨迷离个江南故里又哪能能够从我自家记忆里向轻易个揩脱呢？“江南好，风景旧曾谙。日出江花红胜火，春来江水绿如蓝。能不忆江南？” 小辰光，有过终极三问：我是啥人？从啥地方来个？要到啥地方去？ 小辰光勿懂事体，寻勿到答案。长大之后，为了世俗生活而奔波，常庄会得有种想屋里个感觉，慢慢叫懂了，搿个，就是乡愁了。 乡愁是人类共有个情感。勿管是啥个原因背井离乡，总归会得有亲情牵挂，引发个是叶落归根个思乡情怀。 离别辰光老母亲个“临行密密缝，意恐迟迟归”；想念家乡辰光，游子个“乡书何处达，归雁洛阳边”。还有余光中个《乡愁》里向个闲话，拿我个家国情怀侪讲出来了…… 千百年以来，人世间有得多少情意绵绵个离愁别绪啊？《故里春秋》有我淡淡个乡愁！ 往期回顾： 图：网络 / 编辑：渺渺
|
|
|
来自： 渺渺m69vnzsah9 > 《待分类》
