|
上海老底子每天呈送精彩文章一组 打开尘封的记忆，寻觅往昔的岁月 叙上海老底子事 忆上海老底子人 诉上海老底子情  我的演艺生涯 作者：徐慧敏 改写、讲述：知足常乐 审阅、推荐：丁迪蒙 编辑：王乙其 勒勒电影明星里，爱好京剧艺术个大有人在，我记得伊个辰光有个影星戏迷俱乐部。每逢周末，就要勒上海个电台浪向播音，演唱京剧。当年上海商业性个私营电台交关，只要有广告做，就能开唱，外加影星个号召力影响力邪气强、收听率也就老高个。我伊个辰光，算是有点小名气个娃娃生，除脱勒勒戏馆里厢演出外，偶尔也要跑跑堂会，堂会呢，就是有铜钿个人家，屋里开喜庆宴会，叫一点演员到屋里来唱戏，以此显示自家交关阔气。
有一趟我三爷叔徐剑鳌，伊是京剧个老生演员，來叫我到电台去唱“汾河湾”里个丁山。伊讲是陪电影明星个票友白相相，票友就业余个京剧爱好者。我觉着上电台播音，老新鲜老好白相个，于是就开开心心个跟老三爷叔去了，埃日天姆妈还特意搭我打扮了一番，拨我穿最漂亮个带花边个小旗袍，外头罩一件粉红颜色个绒线衫，头浪向扎了一只大红个蝴蝶结，我照了照镜子，样子老可爱个。因为勿用化装，勿用穿行头，阿拉老早就到电台了。 我记得上楼进了门，有里外两间房间，外头一间有一排沙发茶几老啥，里向一间是由一扇玻璃大门隔开个播音室，当年个播音条件，肯定呒么现在噶好，从外头一间可以清清爽爽地看到里向头正紧锣密鼓地勒海唱戏。我一记头就认出了程之先生，伊正勒海当打鼓佬，打鼓佬就相当于乐队个指挥，我轻轻叫搭三爷叔讲：“爷叔、埃个打鼓佬是勒勒电影里向专门演坏人个……”三爷叔马上用手指头摆勒嘴巴浪向，做了一个勿许出声个动作，然后弯子个腰，勒勒我耳朵旁边轻轻个讲“勿要瞎讲，埃个人是程之先生”。
讲起搿位程之老先生，可以算得上有专业水平个京剧票友了，伊勿但能字正腔圆，韵味十足地唱“黑头”， “黑头”就是净角，唱大花臉个，还拉得一手好胡琴，呒么想到伊还能打得一手好鼓，搿个生活可是場面浪向个重要绝活啊，京剧个乐队，用阿拉个行话，就叫“埸面”。 挨着我唱个辰光，爷叔再推开玻璃门，倷我送进了播音室，我机械刻板地把丁山个戏唱完，由于对播音个新鲜感，我专心演唱，怕唱豁变，所以连得我是陪哈利二位明星唱个侪呒么看清爽，却偏偏倷这位程之先生记得噶深刻，迭个也算是一桩怪事体来。 我只记得唱完以后走出来个辰光，正勒海打鼓个程之先生搭其他塲面浪个叔叔们，侪微笑个向我致意，眼光里还充满赞许个神态呢，一个长得相当漂亮个阿姨，勒门口外头等勒海、还撸撸我个面孔，听三爷叔讲她叫王熙春，是个电影明星。
我看到电台个一位叔叔，拨了三爷叔几张钞票，离开之后，三叔讲：“哪能啊，阿拉两噶头去吃点消夜好伐？”我当然老高兴个咯，跟伊一道进了一家小酒店，叔叔要了半斤花雕、一盘花生米、一点猪头肉，几块豆腐干，搭我勒酒店门口个小摊头浪要了一客锅贴。我一边吃一边听伊“噶三湖”，伊口才好，能说会道，紫花亚米个吹牛三。 回到屋里以后，伊连阿拉房间个门也勿敢进，就回伊自家屋里去了，姆妈问我：今朝赚了几钿啊？我讲呒么了，姆妈又问：哪能呒么了？我讲：三爷叔带我吃锅贴了!姆妈又问：伊一定又吃老酒了伐？当然，我讲吃了半斤花雕，一盘花生米，几块……………姆妈呒么听我讲完，生气个讲“搿只酒鬼，连小囡个铜钿也要揩油，真呒么出息!下趟还是跟捺大伯伯去唱堂会伐！ 唱堂会好啊？下趟再继续吧！
作者：徐慧敏
讲述：知足常乐 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。
转自：“启迪心田沪语”公众号 我知道你在看哟~ |
|
|
