 
作者：李海荣 现在阿拉司空见惯马路浪，弄堂里穿梭着各色各样嗰快递车，车厢、车兜里叠满各种各样嗰待送件，貱阿拉老百姓嗰衣食住行带来了极大嗰便捷。葛末搿种非常便民嗰物流形式勒拉老底子又是哪能吤个呢？ 说来话长，搿个还要从六七十年前聊起了。勒拉搿个辰光，交通工具搭物流行业还处于偕气落后个早期。因为阿拉屋里个小囡多，爷娘又侪是双职工，所以拿阿姐搭我留勒拉上海，其他阿哥、阿弟搭阿妹侪拜托外婆寄养辣浙江宁波贵驷桥乡下了。当时我屋里住辣邑庙区（现黄浦区）小东门十六铺码头附近。当时阿拉上海脱宁波之间嗰物资交流勿是靠邮局来完成嗰，而是靠“信客”来实现嗰。 记得老底仔阿拉沪甬两地个兄弟姐妹每日天侪翘首以盼嗰一个人就是“信客”颜立章伯伯。伊貱我嗰印象大约有50多岁，皮肤黝黑，面孔浪布满饱经风霜嗰皱纹，廋高个背略微有眼驼。伊经常乘坐宁波轮船夕发朝至穿梭于沪甬两岸。伊用一根磨得油光锃亮嗰扁担，两头分别挑辣两只沉重嗰火油箱。我勒拉屋里向是个出了名个“馋咾胚”，当时个各家屋里侪呒没固定电话搭手机，就连BB机也呒没，有辰光屋里收到外婆来信，讲伊已经托信客带来谺气好吃嗰吃场（食物），貱外孙囡外孙吃。乃末好了，挨下来我就会每日天伸长头颈，默默期盼信客颜立章伯伯快眼到上海来。因为阿拉屋里就勒拉宁波轮船抵沪个十六铺码头附近，噶咾也自然而然成了信客送物事个头一站。每当听到宁波轮船拉响清脆嗰汽笛声，我就会跑出孙家弄，朝轮船码头嗰方向眺望，姆妈看到我搿副急吼吼嗰馋相，经常嘲我“头颈贼细只想啜哜”，假使等了半个钟头仍然呒看到颜立章挑担而来嗰身影，就会失望嗰回到屋里；假使远远望见伊熟悉嗰身影，我就会飞奔跑回屋里禀报喜讯：“颜伯伯来喽！颜伯伯来喽！”讲句心里嗰真言话，我从心底里并呒没对信客情有独钟，只是对伊火油箱里向嗰吃场急勿可耐而已。有辰光盼星星、盼月亮，总算盼到老老远瞄见信客来了，馋咾虫索落落个从肚皮里爬到喖咙口。 其实老底仔个信客搭阿拉现在看到嗰快递有一眼是完全相同嗰，就是阿里家人家先送达，就阿里家物事摆辣上面。所以，一等颜立章踏进屋里嗰门槛，开开火油箱嗰盖头，摆辣最最上面嗰物事，肯定就是阿拉老外婆带貱阿拉嗰吃场（音：强、吃的东西）。记得外婆带貱阿拉最多个就是松花团、山北盐炒豆、印糕、黄鱼鲞、虾干咾啥。而阿爸姆妈带貱外婆搭弟弟妹妹嗰多数侪是上海嗰糖果、糕点、城隍庙五香豆咾啥。每次阿爸姆妈从信客手里收下外婆带来嗰各种乡下土特产，再拿上海嗰糖果、糕点称了分量后，拿托运费按分量付貱信客，装进火油箱箱底，颜立章立刻挑起两只沉甸甸嗰火油箱匆匆赶往下一家。伊嗰工作效率一眼也勿比现在嗰快递低。 后来我放寒暑假，常庄到贵驷桥外婆屋里孛相，听阿哥阿弟脱阿妹讲：“阿拉外婆谺气做人家咯，有辰光上海爹爹姆妈托信客带来嗰吃场，刚刚送到嗰辰光，外婆总叫阿拉：“冇吃、冇吃，㑚爹娘上海吤远户荡带来咯。”但囥了一段辰光，有眼长毛霉了，伊就会连忙催促阿拉：快吃！快吃！㑚爷娘辛苦铜钿买来嗰，坏塌罪过嗰……”。 一晃六十多年过去了，虽然阿拉周边侪发生了翻天覆地嗰变化，但是只要看到到处辛勤穿梭辣各条马路浪向嗰快递小哥嗰辰光，就会自然而扰联想起小辰光帮阿拉带送好吃物事嗰颜立章伯伯来，再细想一下，虽然当年个信客侪只是单打一，远呒没现在嗰快递吤有系统嗰协作脱配合，但再追根溯源，当年信客嗰全部流程弗真是阿拉现在快递嗰雏形吗？
“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。 “闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。” 图：网络 | 编辑：渺渺 |
|
|
来自： 渺渺m69vnzsah9 > 《待分类》
