|
上海老底子每天呈送精彩文章一组 打开尘封的记忆，寻觅往昔的岁月 叙上海老底子事 忆上海老底子人 诉上海老底子情 只有住勒此地、 再好看到爷爷个码头 来源：More城读 作者：董鸣亭 改写：边秦翌 讲述：牛美华 推荐：丁迪蒙 编辑：王乙其 前文回读： （二） 03 兄弟情深 阿国是搿几个兄弟里向长得比较登样个，伊个五官一看就是典型个苏北人，俗话讲：扬州美女苏北阿哥，伊身浪还有几块胸肌，勒苏州河里游好泳上来个辰光，身浪向个肌肉会得闪闪发光，引来女同学眼痒个目光。 阿国就住勒昆山路浪花园洋房隔壁个一条弄堂里——蟠龙街。 伊搭大卫同年同月生，听讲，阿国还勒伊姆妈肚皮里个辰光，伊个爷爷就摇了只小舢板从黄浦江一头轧进苏州河，伊个辰光，有交关小舢板从江浙一带逃难到上海来，大家侪认为，只要进了苏州河，就是到了上海。 阿国姆妈挺勒大肚皮拼仔命个摇船，摇到大卫爷爷个码头，阿国姆妈觉着自家个肚子实在是痛煞了，伊晓得要生了，就扑通一记头坐勒船头浪。大卫爷爷齐巧勒码头浪，伊看见阿国姆妈要生了，就搭边浪个人讲：快点去帮只忙伐。
阿国个阿伯当时辰光跪勒大卫爷爷面前讲：穷人没物事好谢恩人，但是以后，有需要我命个辰光尽管要就是了。 大卫个爷爷真是个好人，伊看到搿家人家三代人吃拉睏侪勒船浪，就动了恻隐之心，问阿国个啊伯：侬愿意到码头浪做事体伐？假使愿意，蟠龙街浪有间房间好借拨㑚住个。 乃末，阿国拉屋里就搭大卫拉屋里成了雇主关系，但勒阿国阿伯个心里，老板是个好人。后首来，勒人人闹革命，儿子揭发爷娘个辰光，有人要阿国阿伯立出来讲大卫个爷爷迭个资本家是剥削阶级，是个坏人。阿国阿伯拒绝立出来，还讲大卫爷爷是个好人，为此，阿国阿伯拨一帮人打屁股，让伊躺勒乒乓台子浪，四个造反派轮流用码头浪扛物事个扁担打伊，讲伊是资本家个狗腿子。
阿国阿伯拨打得奄奄一息，差点命也呒没了，但是伊搭阿国讲：侬生出来个辰光我搭老板讲过：穷人没物事可以谢恩人，但需要我命个辰光尽管拿去。 阿国也是个讲义气个人，当伊晓得有人去抢大卫勒昆山路浪个花园洋房个辰光，伊就叫了阿三阿四两个兄弟，抄起家伙直奔大卫屋里，拿强占房子个几个人赶出去了。大卫邪气感动，伊晓得，除脱阿国家庭出生好点，阿三阿四屋里也是泥菩萨过江，自身难保。 04 难念个经 阿三个爷爷是从宁波到上海来个，住勒塘沽路、乍浦路“红双子座”当中个小浦西公寓里，勒四川北路浪开了爿烟纸店，烟纸店个一些生活用品就是从大卫爷爷个仓库里批发来个，搿些小囡也是吃阿三屋里个烟纸店个糖果长大个，为此，大卫还保存勒交关糖纸头，后首来，为了阿国个女朋友，伊个欢喜糖纸头个小姑娘，大卫就拿糖纸头侪送拨勒阿国。勒讲阶级分子个年代，阿三屋里属于小业主，人家要斗侬随时随地侪可以个。
还算好，阿四屋里住勒拨称为“远东第一公寓”个河滨大楼，伊个爷娘侪勒市政府里工作，阿四个阿伯最早是勒大卫爷爷个码头学生意，学得蛮好个，突然有日天搭老板讲，要到苏北去闹革命。老板晓得留勿牢人，索介就拨勒阿四阿伯十几块银洋钿，叫伊囥囥好，万一有啥个三长两短，搿眼钞票好让伊从苏北逃回上海，继续勒码头做生活个。阿四阿伯邪气幸运，到苏北勿久，解放军就聚集勒长江准备横渡长江，解放全中国了。 阿四阿伯是上海人，晓得上海一些马路搭仔建筑，特别是一大帮解放军进城市之后，最大个问题就是哪能介解决大小便？上海是大城市，大城市里是勿好随地大小便个，乃末，首长就问阿四阿伯哪能办？阿四阿伯就领伊拉跑到一只有窨井盖头个地方，拿盖头翻起来，大家一看一记头侪觉着自家膀胱发涨，来煞勿及解裤子，围牢仔窨井解决问题。
解决好问题个首长拍拍阿四阿伯个肩胛，幽默个讲：原来上海马路下头囥勒介许多污泥浊水，要当心啊。 后首来，阿四阿伯因为搿桩事体立了功，安排工作辰光就到市政府部门去了，专门负责上海城市个环境，包括倒马桶咾啥。一家门呢，也就住进了河滨大楼里。 阿四是勒苏北出生个，是解放区个小囡，到了读书个辰光，伊就是班长，大卫、阿国、阿三侪是归伊管。 必过，阿四阿伯是讲义气个，伊呒没忘记脱老板拨伊个十几块银洋钿，上海解放勿到一年，伊就去看老板了，还拿儿子带勒海。就搿能介，阿四从小就搭伊拉勒一道白相。伊拉四个人结为兄弟，高中还呒没毕业，就一片红到农村去插队落户了。
作者：董鸣亭
讲述：牛美华 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。
转自：“启迪心田沪语”公众号 我知道你在看哟~ |
|
|
