|
苏白学堂,做最优秀的苏州话教学与传承平台。 本栏目由灬醉里吴音灬授权转发 上期节目提到了评弹，那么你想不想知道评弹学校毕业的孙悟空又是怎么看待评弹的呢？让我们一起看看评弹人对评弹的看法......  昏说乱话 第六期 浅谈评弹 Hiro孫悟空 昏说乱话开始哉~ 各位听众朋友大家好，欢迎收听今朝个昏说乱话。今朝是两月十八号，礼拜六，周末。周末日脚，大家侪勒外头孛相，我还勒屋里录哀个节目，说明啥，说明我是一个坚持不懈的人，啊，坚持不懈，有毅力，坚持做一桩事体，虽然该个是一桩很小个事体，但是倷要天天坚持啊，也蛮吃力个啊。但是我也想着个偷懒个办法，啥个呢，我会得今朝录两期，乃么明朝直接发一期就可以哉。哦哟，我像煞拿自家个偷死怪个事体讲出来则啘，弗碍弗碍，反正唔笃明朝听见个也是新鲜个啊。嗯，乃么今朝讲着我，嗯，讲讲我之前讲我唱只歌曲么里向讲到加入评弹元素么，今朝就来讲讲该个评弹。  乃么我呢，嗯，是学评弹个，学仔五年，评弹学堂。乃么，评弹学堂呢，应该讲读下来，马马虎虎，也总算毕业。乃么，嗯，不算哪哼顶好罢，唱得也还过得过去。乃么，讲讲，虽然现在呢，勒从事也跟评弹有关，但是呢朆进搿个专业团体。乃么，嗯，专业弗来三罢，而且呢也无不啥个关系，所以也朆说书，就太太平平，单位里上上班，也蛮好。虽然赚个铜钿呢无不说书先生实梗多，但不过呢也少弗了多少，至少人无不实梗爬则，也有空呢做我自家个事体。我有辰光也会想，假使我真个打破仔头，走上评弹该条路呢，我弗会得写得出一只歌，就算写得出歌，也弗会得有辰光去做，因为天天要码头浪，弗可能像我该个录音个设备啊一套，电脑，掮来掮去，也弗一定每一个码头浪侪有麦，阿对啦，所以，嗯，人生当中个选择呢，有辰光碰着弗好个事体就要想想，所有事体总归有好个场化，有坏个场化，覅单单只看俚坏个场化，也有看看俚好个场化。 讲着我学个评弹呢，我觉着俚，嗯，个人也身边总归有同学勒说书，应该讲好个呢也还好，弗好个呢，也就是一种应该讲是糊口个一个手段罢，嗯，现在听书个大家侪晓得，侪是，七老八十岁个老年人，我呢也去听过，总归坐勒里向呢我个人总归蛮个别葛，特别是搿种社区，倷像光裕书场该种人多个呢还有年轻人唻，年轻人啥个人呢，评弹学堂个学生子来学习葛，啊，来为仔提高自家个专业水平，考试能考个好成绩，阿是啦，总归要来像向搿个前辈笃学习学习，乃么，反正我听书呢也真个是无不劲，乃么，有辰光看搿种老阿爹呢听听总归侪要闭拢眼睛，要打脱歇昏，有种么要，阿是啦，打脱歇嗑充。  乃么评弹现在就是总归是两大块，一块是该个跑码头，还有一块么就是外头演出，茶馆店唱啊，包括各个商家个活动啊，阿对，跑演出呢，我也接过，嗯，应该讲呢搿种带队个人啊，我碰着个搿个带头人啊，唔倷并弗懂评弹，唔倷呢也朆帮搿个主办方有讲好啥物事，哀种人总归就是蛮坏个，蛮坏个，乃么，嗯，就是搿种女人压榨，压榨年轻人啦。乃么外头么，我看看哀个现象呢，想想下来也弗晓得唔笃哪哼办唻，一批一批勒嗨毕业出来，啊，就去外头接演出，压榨 ,乃么专业水平呢，实事求是啊，嗯，弗是哪哼顶顶顶高个，毕竟铜钿便宜么，贵呢，倷讲，阿是啦，也弗好讲特别特别好，特别好个么基本浪侪勒码头浪，有种么，老，趁老个一批弗真个退下来呢，总归，新个倷，现在想顶上去很难很难，倷弗可能有第二个高博文，第二个盛小云，阿是啦，该种很难很难，就算等到真个下头譬如讲，某某人，到仔搿个一日天，搿歇辰光评弹蛮惋惜个，我呢，觉着，我啥体要拿评弹加到歌里向去呢，我就希望该门艺术，覅听个朋友好听听，好晓得，哦，世界浪有评弹，哦，伲苏州人，苏州有评弹葛。假使永远是唱几只开篇，说几段书，啊，永远是玉蜻蜓，永远是珍珠塔，该场下去个说话啊，我也弗讲哉，自家想想看，十年过后，会得哪哼。我也是，我也是，希望大家能够重视起该门艺术罢，毕竟我自家是学个，一开始我也弗是欢喜，听听我也要睏着个，我弗是睏着，我听也覅听个，听也覅听，啥物事讲三国，我弗好看看电视剧，阿对啦，嗯，所以像搿种书，弄也弄弗清爽，慢得唻，赛过，有种么一，一层楼梯，阿是啦，讲起来走一层楼梯好说一回书得唻，就是评弹么，倷讲讲看现在啥人有空啊，天天两个钟头，啊，虽然铜钿覅，坐勒嗨，听说书，现在倷看手机、电脑，包括外头个娱乐活动，有种人么，现在苏州人很多越来越多欢喜啊，外头吃杯咖啡也蛮多，看看吃个下午茶啊，我看朋友圈一径有人发个，阿有人一淘吃个下午茶啊，吃杯咖啡，无不，无不人发啥个，下半日阿有人一淘去听回书啊，哀个肯定无不个啘，阿对啦。所以也希望大家可以重视，  乃么呢，也希望，当然咯，我身边比较熟个几个同学呢非常优秀，说书侪说得顶好，我也以俚笃为骄傲个，我也希望我也希望我能够凭我的努力有一日天成为俚笃个骄傲。嗯，虽然现在我还是默默无闻啦，天天就蹲勒个小房间里录点物事，乃么唱点歌，但是应该讲弗会放弃，大个大方向弗会放弃，也希望重视评弹个朋友们，唔笃也弗好放弃，多动脑筋，脑子动，覅永远书说脱，转去睏觉，明朝起来说脱，睏觉，天天两个钟头，哦，写意啊，哀个是弗对个。应该讲，要有点紧迫感，动动脑筋，哪哼拿哀个紧迫感呢去，去弄脱，去拿俚降低。苏州闲话，我闲话又要讲转来哉，苏州闲话能做个弗只是评弹，能做个很多。嗯，今朝呢就讲到该搭，过多个加深个物事呢我也弗讲哉，同学们呢，朋友们，假使听见有啥弗窝心个呢也覅，嗯，也覅对我有啥个埋怨啦，毕竟实话实讲啦。好，搿么节目就到该搭，大家明朝会，再会。
词汇说明： 日脚gniq ciaq：日子 偷死怪theu si kua：做事不踏实，投机取巧 明朝men tsau：明天 掮 jie2：用肩抗东西 打脱歇昏 tan theq shiq huen：打会儿鼾 打昏 tan huen：打鼾 打脱歇瞌充 tan theq shiq kheq tshon：打个盹儿。充记音，应做[目充] 打瞌充 tan kheq tshon：打盹儿 睏觉khuen kau：睡觉 窝心ou sin：心中满意舒适  听写 | 葉嘉劍 排版 | 可爱的昭昭 |
|
|
