 来源：老周望野眼 作者：周力 沪语改写：冯济民 文字修正：丁迪蒙 今年2月26日，我勒公众号里发了一篇《今夜，阿拉听杨振雄》，文中插了一段杨振雄、杨骢父子八十年代个作品《海峡两岸盼明月》，其中有句唱词：“当初家住何方地，靠近城隍庙，街名叫棋盘”，引起我个注意。因为据我晓得，老上海个棋盘街是现在河南中路个南段，从南京东路到延安东路迭一段，哪能讲侪是老城个外头，搭城隍庙好像呒没啥关系。为此，我请教了勿少朋友，后来我想算了，一方面迭是弹词开篇个唱词，又勿是历史地图集，作者为了合辙押韵，写啥个街又有啥关系？另一方面，海外归来个游子离开家乡几十年，记忆或许有偏差，迭也是正常个。过了几天我勒“魔都白领群”公众号看到薛理勇老师发表个《上海个“棋盘街”勒啥地方？》，写得邪气详尽，疑问基本解决。 晚清时代，“棋盘街”作为地域搭街道，是勿一样个概念。读者朋友到南市老城厢转转，难免拨伊搭七转八绕个路所迷惑。因为上海是江南水乡，老城个街道大多数是沿河而建个，参差勿齐，其中勿乏羊肠小道。1845年英租界（当时还呒没“公共租界”一说）成立“道路码头委员会”，先后以南京路搭界路（今河南中路）为纵横轴心，横向个有二马路、三马路、四马路、五马路……纵向个有四川、江西、河南路等等。假使讲，上海传统个中式马路像蜘蛛网，葛末迭眼租界里个马路横平竖直，看上去更加像一张棋盘，所以老百姓就称伊为“棋盘街”了。薛理勇老师文章里写赛金花一到上海，出火车站马上直奔棋盘街、采购绫罗绸缎，迭搭讲个“棋盘街”应该就是“英租界”个代名词。差勿多要到19世纪80年代，“棋盘街”特指当时个“界路”，即现在个河南中路。按照1989年版《黄浦区地名志》个讲法，“棋盘街”个范围大致勒现在个延安东路搭福州路之间个河南中路两侧。由于商业兴衰等原因，区片范围时大时小。 勿止上海有棋盘街，北京、武汉、济南、南京……交关城市侪有“棋盘街”个。其中，北京棋盘街清朝辰光个位置，勒正阳门搭大清门之间，差勿多现在纪念堂前头个一片区域，北京老地图一看就晓得了。 早期个上海棋盘街是鸦片烟馆、二等妓院搭旅馆、茶馆集中地区。上世纪初开始开设新旧书店、文具店搭教学仪器店，九江路到汉口路一带有朵云轩、九华堂、戏鸿堂等笺扇装裱店。中华书店勒迭搭开设发行所，陈独秀担任主编个《新青年》杂志，最初是由群益书社发行，地址印得清爽，就勒“上海棋盘街”。 上海个市面一向是由东向西逐渐延伸，到了30年代，“棋盘街”作为一个街区已经萧条。抗日战争之后连得路名也呒没了，只剩下来“东棋盘街”搭“西棋盘街”两条东西向个小路。再后来，西棋盘街勒旧区改造当中率先消失，原址成为了一兆韦德城市会馆个一部分。东棋盘街作为道路也消失了，但因缘巧合，还剩下来老小个一段，勒威斯汀酒店个南面，甚至还有得几家住户，挂勒海“东棋盘街”个门牌号。迭几个残存个门牌号，大概可以作为是晚清上海一段繁华最后个残留，像盲肠一样存在了伐。 朗读者 往期回顾：  图：网络 / 编辑：渺渺
|
|
|
来自： 渺渺m69vnzsah9 > 《待分类》
