崇岭伴侬去远方—— 作者:李海荣 西藏幅员辽阔,往往景点之间侪要经过长途跋涉才能到达。我伲经过邪气长辰光嗰旅途劳顿,才到达后藏地区最大嗰寺院——扎什伦布寺。雄伟壮丽嗰扎什伦布寺,规模仅次于布达拉宫,伊勒拉西藏嗰地位更搭班禅联系辣一道,是班禅四世之后历代班禅举行宗教搭政治活动嗰中心。扎什伦布寺,藏语意思是“吉祥须弥山”,位于日卡则尼色日山南侧。始建于1447年,以后经过历代班禅嗰修缮、扩建,现在寺院占地20万平方米,依山傍水,气势非凡。 从正门口进入寺院,呈现辣眼前嗰是一个邪气大嗰院落,直走左转就可以到达强巴康,搿是座高达30米嗰大殿,殿里嗰强巴佛是当今世界浪向最大嗰鎏金铜坐像。搿座强巴佛像仅勒拉大佛像嗰眉中央,就镶嵌好像核桃介大嗰钻石一颗,蚕豆大嗰钻石30颗。按佛教教典嗰理论:5亿年后,强巴佛将会接替释迦牟尼成为佛教至尊,噶咾又称伊为未来佛。为了方便信徒嗰瞻仰,大殿设置了四层环绕佛像嗰配殿,大殿是莲花座殿,二层是腰部殿,三层是胸部殿,四层是脸部殿,五层是冠部殿,佛像邪气大,单单鼻头孔里向居然竟可以容纳下一个成年人。 强巴佛嗰东面是“加纳拉康”,意思是汉佛堂,搿样嗰佛殿勒拉西藏嗰其它寺庙是绝对呒没嗰,伊是七世纪班禅辣乾隆年间建成,大殿里向专设一间专供奉乾隆皇帝画像原作,像前有“道光皇帝万岁万万岁”嗰牌位。汉佛堂嗰偏殿是过去驻藏大臣宣读圣旨嗰地方。强巴佛堂再朝东是十世班禅嗰灵塔殿,塔里存放了圆寂于1989年嗰十世班禅大师遗体。再朝东是措钦大殿,是整个扎什伦布寺当中最大嗰建筑物,殿嗰前部是大经堂,经堂嗰中央是班禅宝座,经堂后面嗰三间佛殿,释迦牟尼殿居中,西侧是弥勒殿,东侧是度母殿。大殿外面是由回廊围成嗰院落,是寺院嗰讲经场。过去班禅大师经常勒拉搿搭向全寺僧人讲经布道,也是喇嘛们经行宗教教育嗰地方。我伲搿次到扎什伦布寺参观,正好小班禅也勒拉寺里,但无奈门口有武警战士严密把守,呒没能一睹小班禅嗰尊容。 我伲勒拉西藏旅行好几次参观寺庙,对喇嘛们嗰日常生活起居十分好奇。导游娓娓向我伲介绍了喇嘛们嗰每日日程也邪气有意思。每日天早浪向,负责准备酥油茶嗰喇嘛,一般3-4点钟就爬起来烧火煮茶,诵经嗰喇嘛一般5点钟左右爬起来,然后整理僧房,点燃佛像前嗰酥油灯,焚香,供圣水,念经。7点钟,等集中念经嗰法号吹响后就侪到大经堂诵经。座位按照入寺嗰先后排列,资格老嗰喇嘛坐前座。全体喇嘛入坐后,由诵经师带头诵一段经文,然后大家就跟辣嗨齐声朗诵,直到20-30分钟后稍事休息,搿个辰光,准备好早茶嗰喇嘛会拿个大铜壶按顺序拨每位喇嘛分送酥油茶。喇嘛们才开始吃茶,并吃糌粑或者馒头。早餐过后,又继续诵经。足足有2个多钟头,早课才宣告结束。 早课完后,大家就开始做各自嗰本职工作,有嗰负责殿堂嗰日常管理,有嗰回扎仓学经,有嗰参加生产劳动。一般到中浪向1点钟后再下班,吃中饭搭安排自己嗰事体。下午3点半后再上班,继续自家嗰本职工作。 夜里向,全寺嗰喇嘛侪到大经堂去进行夜课,基本搭早课一样,也要2个多钟头,然后各自卧室休息,周而复始。当然,现今寺庙里并勿闭塞,也引进了邪气多现代文明嗰产物,譬如电视机、CD机、电脑、摩托车、汽车等一应俱全。从中我伲也应证了一句言话:勿要看和尚吃馒头好,还要晓得和尚受戒苦啊!仔细想想,喇嘛们搿样年复一年、月复一月嗰苦日脚,侬我等凡夫俗子啥人能承受得了呵?(待续) “言话”基本解释:说话,谈话。南朝宋·刘义庆《世说新语·赏誉》“天锡见其风神清令,言话如流。”宋·苏轼《归去来集字》诗之三“言话审无倦,心怀良独安。”此与今日上海话中“言话”的用法是一致的。 “闲话”基本解释:指闲谈;背后议论他人是非的话;不满意的话,有关私人的谣言、传闻、幕后消息等。见陆游《雪意》诗:“闲话更端茶灶熟。” 往期回顾: 摄影:赵有法 | 编辑:渺渺
|
|
来自: 渺渺m69vnzsah9 > 《待分类》