|
▌传说中的Spartel灯塔  阿拉上趟讲到阿拉到丹吉尔，丹吉尔呢有得只景点叫非洲洞。就是辣海非洲个最角落头个地方有得一只非洲地图形状个洞。最早晓得搿桩事体呢是正好听一个复旦大学一个葛教授蹲辣一只栏目叫《走进非洲》里向讲个。当时辰光就有得想去看。终于呢过了介许多年，等来了搿一天。交关攻略高头讲呢，包车来回250D，再加上只灯塔，就是50D。但是之后阿拉发觉呢，搿只攻略是写拨搿点赚欧元美金个人个。阿拉两个人赚人民币个，最后阿拉谈定个价佃是五十块洋钿单程，然后坐公交车回来。加起来是六十七D。阿拉过去辰光趁个是grand taxi。 grand taxi个地方呢辣海穆罕默德五世清真寺个附近。辣海MAPS ME高头标辣海个。其实伊当时辰光标个地点叫achakar。伊搿只地方个地区名字就叫achakar。但是呢地图高头标个方向是反个。侬标个地方回过头来看到一排差头排队就对了。搿辰光呢因为呢要讨价还价，其实呢我讲勿大来别个闲话。就拼命个背经，啥穆斯林侪是兄弟咾，啥犹太人跟穆斯林侪是有得经个人咾，搞到后头阿拉伯人笑是笑得来勿得了。 最后其中有得一个犹太老头驾驶员。但是呢伊讲阿拉伯文个，是当地个犹太人。最后决定五十块洋钿阿拉就去。到灯塔仔看一看，最后到非洲洞单程。不过搿个犹太老头老有劲哎。一定要听我手机里向个歌，但是我手机里向没中文歌个，然后搿老头一边听歌一边跳舞来。还一边开车子一边跳舞。本事大伐？大概半个钟头个辰光呢阿拉就到了一只灯塔。
▌非洲洞 搿只灯塔呢是对牢大西洋个，专门来引大西洋高头个船个方向个。之后阿拉蹲辣灯塔搿搭看了看之后呢就到了非洲洞。非洲洞是门票勿要个。搿里向交交关关个旅游团，还有得交关当地人过来钓鱼个。其实呢搿只非洲洞是蛮好看个，真个我觉着放辣搿只地方还是蛮有眼感觉个。是蹲辣只角落头里向，非洲个角落头里向，正好一只非洲个地图个样子。
▌公交車站 从非洲洞出来呢，对过马路高头就有只公交个站头，搿只公交车呢叫2A，刮三了。标志辣海马路个搿头，其实2A个车子是停了马路对过个。就是讲伊拉随停停个。标志是高头写2A个搿地方呢是另外只公交车停辣海个。反正是当地个公交车是蛮混乱个。丹吉尔公交车跟马拉喀什一样是西班牙阿尔莎公交公司个。上海个我看到长途汽车也有得阿尔莎公司个。不过呢搿地方是也蛮管理混乱，我也是也算开眼界了。车票3.5D一个人。因为搿把车子呢是勿到丹吉尔市区个，所以讲阿拉到了站头之后就趁了一把Grand taxi末，一个人五块洋钿到市区。有桩事体蛮噱个，就辣海副驾驶座高头，有个阿拉伯个头巾阿姨嘛，帮一只阿拉伯个老头子，坐辣一只位子高头，侪坐辣副驾驶高头。两家头还抱辣一淘，噢哟两家头，夫妻两家头啊？后头结果到了只地方，老爷叔先下去了，老阿姨继续趁。阿拉再问驾驶员再发觉勿是个。哎呀，原来搿两个人勿认得个。还两家头摸屁股，瞎腻心！ 到了丹吉尔城区之后呢，阿拉想上厕所了。但是呢阿拉呢一路高头侪晓得个，厕所间要收费阿拉是勿去个。小个就寻清真寺，大个回宾馆。搿只宾馆到了之后呢，搿服务员讲叫阿拉去经理办公室，阿拉两家头就跑进去了。搿经理呢勿晓得算礼貌还是啥，还跑出来了。跑出来侬跑到一半还讲了，哎？搿是我办公室呀？我为啥要出来？我心想又勿是我喊伊出来个。又勿是阿拉喊侬出来个。自家要出来，阿拉就上只厕所呀。等阿拉回来就蹲辣booking高头看到讲搿个经理看勿起天朝人，嗯，估计就讲搿个。但是我觉着搿种讲法有眼戆，勿就是只厕所嘛？ 之后呢阿拉就走到丹吉尔老城。老城附近有得只犹太人墓地，墓地附近呢是只专门卖义乌小商品个市场。义乌小商品市场到处侪有噢？阿拉搿趟呢还是吃个路旁边个摊头。吃个是PAELLA。PAELLA就是西班牙海鲜饭。但是我觉着海鲜是蛮好个，但是搿饭勿来三。搿饭忒烂了，摩洛哥个全城饭侪忒烂了，价佃是便宜呀，廿五块洋钿两个人。
▌PAELLA 后头阿拉就到伊本·白图泰墓地了。伊本·白图泰搿只搿人阿拉最早是辣初两个辰光历史教科书里向看到个。伊就是丹吉尔人嘛，伊个墓地可以通过导航导着个。有专门条路通过去个。搿门口其实是勿开个，要打只电话号码过去个。来了只老头子，盲人。具体呢啥个样子呢，网高头有，我就勿讲了。反正要拍个，最后呢付了十块洋钿，也勿大好意思人家介老远个，介远过来开门个。然后下头勿晓得为啥就有只牛停辣海，小朋友摸来摸去，勿晓得搿算啥路道啦？
▌伊本·白图泰墓 丹吉尔呢正好辣海地中海跟大西洋当中，对过就是西班牙，实事求是讲还是蛮壮观个。拍海洋拍搿个海嘛，大西洋跟地中海最好个地方其实就是丹吉尔老城KASBAH。搿搭呢阿拉辣海寻搿个伊拉埃面搭个外滩，应该也叫外滩哦。就是辣海大西洋旁边一条路，搿条路个辰光呢又寻出来一条路，搿导航软件侪没个。就是拨伊拉当地人走出来个。一路通到下头。因为搿条呢其实是山路，周围没公交车个，只有差头。后头来呢阿拉看看，本生走过去也没多少路。走回宾馆也没多少路，阿拉就走回去了。搿只外滩呢有眼跟上海外滩像，伊旁边有只情人墙。基本浪五米一对，五米一对，侪是狗粮。阿拉搿种……其中还看到有一对是老太跟一个年纪轻个人。勿晓得是娘两家头呢还是狗粮。
▍外灘
▍情人墻
▍艾西拉火車站 走回宾馆之后呢阿拉就朝火车站走了，宾馆呢勿肯帮阿拉叫车子个，实际高头伊拉没车子，伊拉叫车子比阿拉叫贵，而且呢火车站确实也没多少路，主要阿拉有行李，一人一只箱子勿大方便。然后阿拉就一边朝火车站走一边寻车子。搿辰光呢还好阿拉小朋友眼睛比较尖，碰着个差头司机，差头司机呢副驾驶座位高头有个女个。阿拉问伊了，到火车站几钿，伊就讲十块洋钿。阿拉马上跳上去。司机呢搿一路高头跟搿女个，就除脱阿拉两家头还有个女个嘛，就互相介绍。而且呢搿女个穿来老暴露个，就一路高头呢阿拉还看到搿司机摸了两记搿女个。车子呢开了老快老快个。火车站旁边侪是宾馆。阿拉我跟小朋友马上晓得了，怪勿得搿，人家侪讲搿丹吉尔差头司机老是要斩人个，搿司机十块洋钿肯收，而且到火车站介近个差，后头晓得了，肯定是去开房间去个。 到了火车站呢，阿拉下车。而且搿，人家交关丹吉尔司机侪要收行李钞票，伊行李钞票都没收。阿拉下头就乘到艾西拉。艾西拉到丹吉尔其实勿算远嘛。车子高头有一对小赤佬，硬劲抢了要跟阿拉讲闲话，其中一个还讲要到中国去学武术。伊拉娘勿让伊拉去学。其中只小赤佬还问我要水吃，我讲侬勿许碰着阿拉瓶口，阿拉嫌鄙腻心哦，自家隔一段就倒下去，因为火车比较颠嘛，还倒辣自家面孔高头，笑来瞎开心。伊讲伊拉爷铁路工作人员。勿是伊拉爷，伊拉阿哥是铁路工作人员。没多少辰光就拨伊拉阿哥赶了跑了。然后呢伊拉个阿哥就坐辣伊原来个位子高头，伊拉阿哥还帮阿拉拿行李唻。 到了艾西拉火车站呢，先是买了第二天一早到拉巴特个火车票。之后蹲了车站门口十块洋钿一个人拼车去宾馆。车子高头还有得一对天朝个狗粮。反正拼车侪十块洋钿一个人，阿拉近就先下去了，伊拉继续。
▍艾西拉老城的塗鴉 确实呢就像booking高头讲个一样，艾西拉个城市比较小嘛，所以讲就算勿住辣老城，走过去也没多少路。就是走过去过条马路个事体。到了之后呢，搿宾馆门口一个前台辣海卷头发，辣海汏头，还辣卷头发，叫阿拉过脱歇。阿拉讲，阿拉勿要紧个，反正阿拉先拿行李寄脱就到老城去了。我觉着网高头写个丹吉尔老城个特色，勿是丹吉尔，是艾西拉老城个特色，就是墙壁高头个画，其实真个没啥。我看看阿拉小朋友画个作品还比伊拉好了。艾西拉伊搿搭有只大西洋个日落，真个是最好看个。我觉着搿种日落无论侬有勿有啥手机，无论p得出p勿出侪好看个。
▍艾西拉海灘的日落 艾西拉吃个也蛮有劲个。阿拉一路过去呢根本还没到伊拉当地人吃夜饭辰光。伊拉摩洛哥当地人是吃夜饭是辣海七八点钟之后，比阿拉晏。一路高头侪吃茶个。其中一个摩洛哥人，还对阿拉飞吻，飞吻一下，还用中文讲我爱你伊讲。 然后也老有劲个，老城门口呢有得人卖新鲜海鲜，但是伊因为没烧烤加工个地方，人家侪是当地人买了回去自家加工个。然后呢阿拉就沿了卖义乌小商品市场就讲走了一段嘛。走过一只叫ALIBABA个烤海鲜店。旁边呢有一个天朝老阿姨，就点了一只烤海鲜个拼盘。不过阿拉想，一只地方而且又是搿种路边个小摊头，啥海鲜侪好勿大容易个，所以阿拉就点了一只图片高头个烤鱼。勿管伊叫啥，反正有得图末，总归是好……伊当地特色再放辣图片高头个咾？顺带便看到一只叫PIL PIL个一只词，还问伊拉阿拉伯人叫啥。伊拉讲就是虾仁。
▍烤魚
▍harira 点了两碗汤，一碗是鱼汤，一碗是harira。鱼汤是蛮好吃个，里向侪是鱼。还有只harira呢，搿里向是也蛮好吃个，蛮有当地特色个。烤鱼蛮嫩个，还送薯条唻。然后有一只老有劲个。烤鱼个辰光，阿拉呢以为是一条鱼劈成两片嘛，后头阿拉想，阿拉一翻过来发觉其实是两条鱼伊讲，阿拉觉着老合算个。所有个一共加起来67D。看了隔壁头个天朝老阿姨，伊只海鲜拼盘要80D，还只有一眼眼，还一边吃一边骂山门，我觉着阿拉是赚了。 吃好之后阿拉还去吃薄荷茶。薄荷茶是摩洛哥特色。辣海老城回宾馆个地方，正好是转角嘛，一只茶店。吧台高头我跟一个摩洛哥女人讲阿拉伯文，竟然讲女个没听懂伊讲。后头还是个男个听懂了，帮我讲7D一杯。还跟交交关关摩洛哥男个一样坐辣外头。估计第一趟看到两个天朝女个吃薄荷茶，还跟一群男个一淘坐辣外头，两个大摩兴奋得来勿得了。
▍薄荷茶 吃好薄荷茶呢，阿拉就回宾馆了。等了第二天到拉巴特去。 朗读：Silvia ZHANG 听写：神死恸瞑 排版：神死恸瞑 点击 |
|
|
