|
▌宾馆早餐  上趟阿拉讲到蹲辣苏塞宾馆里向吃早饭，搿早饭勿是自助餐，还可以。阿拉选择苏塞呢主要苏塞呢是世界联合国文化遗产。阿拉呢先蹲辣老城里向走，阿拉要去只博物馆嘛，就是马赛克博物馆。蹲老城里向走呢，经过一个卖香肠个。我哪能看呢看勿出区别，就问伊了。伊拉呢就讲自家个香肠最好了，是牛肉个，是最好个香肠。难末我就跟伊讲了：瞎讲八讲，最好个香肠猪肉个好伐？然后阿拉伯人就开始神秘西西个笑笑了，伊讲：我也晓得猪肉个老好个，但是猪肉个勿清真啊。我心里想，老好个，吃过个一样讲得来。
其实呢搿只博物馆就老城走到底望右转，就是讲来老城个另外一头嘛。博物馆开馆个辰光呢是九点钟，阿拉到个辰光呢是八点半，然后呢阿拉就蹲辣广场高头去拍照片。最后到了门口。门口呢有只十三点勿晓得啥地方来个，一直呢举只手表讲拨阿拉听。伊讲老准作个，要到九点钟正点再敲门。然后呢，当时辰光呢还是八点五十八分，勿需要自家敲门。我心想阿拉伯人准作了，帮帮忙。等到八点五十九分，只赤佬自家屏勿牢了，穷敲门。隔手有一只老头子开了，葛末我看牢伊挂个牌子高头嘛，高头写馆长，难末我就帮搿馆长穷讲了，讲阿拉是天朝来个，特地来苏塞看马赛克个。搿老头呢也老感动个，还带了阿拉跟阿拉讲解唻。
▌美杜莎
搿只博物馆呢，门票是9D，加上1D个拍照片费用。我直接讲手机拨抢脱了，搿1D就勿付了。然后呢搿博物馆工作人员呢帮阿拉哎哟搿眼神哦，充满了同情。阿拉到了忒早了，搿只博物馆工作人员呢大部分还没上班，所以讲呢基本就阿拉两家头，占领了整个博物馆。搿里向也蛮有劲，还是有得凹进去个地方。凹进去个地方呢对过有只凳子放辣埃面搭，凹进去个地方呢当时辰光是空个，阿拉小朋友跟我辣海猜嘛，估计搿只凳子是存心放辣防止人家阿拉伯人跳进去汏浴个。 展品之外呢，搿只博物馆风景也是蛮好个。到底是世界文化遗产，外头有只园子嘛，搿只园子里向可以看到苏塞老城，还有港口。庭院呢本身就是城堡个一部分嘛，也蛮有意思个。但是呢可以爬得上去个部分呢全部锁脱，勿让爬了。我心里想：肯定是交交关关阿拉伯人个狗粮特地跑到高头去晒，难末联合国来看看噢哟，哪能介难看个，干脆锁脱，勿让㑚上去。
▌从博物馆眺望苏塞 入口个地方呢，有只漂亮个小花园，小花园里向呢种满了茉莉花，所以讲整只院子里向呢一股茉莉花个香味道。 出来呢阿拉就跑到艾杰姆。埃面搭呢有只古罗马个只剧院。之前呢有得人讲是古罗马个搿种斗兽场。难末搞得来突尼斯人老勿开心个，瞎七搭八，㑚再是斗兽场好伐，阿拉是剧院。其实呢宾馆个附近有一部公交车可以到个，为了搿呢，突尼斯人还老认真个帮阿拉画了张地图。伊搿车站呢就来老城外头个中央市场个城墙外头。阿拉呢赶到了，但是发觉一部刚刚开了跑，还有一部要一个钟头之后再开来。阿拉想算了，还是决定拦差头到小巴站去坐搿个Louage去。难末搿，拦了部差头呢，搿驾驶员呢还老有劲个，还问阿拉小朋友，讲有勿有兴趣嫁拨突尼斯人。噢哟，帮帮忙伐？讲起来呢，阿拉本生以为Louage老靠勿牢个，结果呢，整个突尼斯呢，最靠得牢个就是只小巴。到了艾杰姆只小巴站头之后，阿拉问了两个看上去像学生子一样个人，人家老认真个帮阿拉指路，伊讲，按照伊拉，就走到剧院了。 ▌艾杰姆古罗马剧院 艾杰姆是比较小个地方。所有个马路看上去像弄堂一样。最后呢，阿拉就到了艾杰姆搿只剧院。搿只剧院呢也是世界文化遗产嘛。门票10D。阿拉走到门口，还有只骆驼。但是呢阿拉准备要拍照片了，有人冲出来。先头搿个人勿晓得啥地方去，搿人冲出来讲拍照片也要付钞票。阿拉讲勿是，阿拉就随便看看。 ▌艾杰姆古罗马剧院内部
剧院个楼高头哦，三楼哦，噢哟喂，侪狗粮。伊正好就两条路，一条望左，一条望右。阿拉望左走，看到一对，搿女个还是戴头巾个。望右走，一对，哈哈。噢哟，阿拉吓得来，勿晓得，只好望前头走，假装拍照片，等伊拉两个狗粮跑脱，阿拉再去参观另外个地方。
出剧院之后呢，阿拉就回到小巴站头了嘛。但是搿手寻勿着只Louage站头了伊讲。搿辰光正好一部Louage个驾驶员进站头，阿拉问伊，Louage站头来啥地方？伊真个蛮好个，竟然直接拿阿拉开到Louage站头。阿拉问伊几钿啊？伊讲勿要钞票，哎哟。还是比较感动个。 坐满六个人发车，搿只老头呢一直来帮司机推销，伊讲因为伊也想快点发车嘛。一路高头呢，搿只老头子勿停个来帮驾驶员讲闲话。驾驶员哦，我倒觉着搿驾驶员烦杀脱了。然后呢驾驶员寻了只借口，伊讲我要加油了，就下车了。难末老头子回头来帮阿拉讲闲话唻。伊讲伊最欢喜天朝个毛泽东，伊讲伊觉着毛泽东老伟大个。
▌小巴回突尼斯的aleoua，价格9.5T 然后阿拉到了苏塞呢，本生想趁火车个。后首发觉来勿及了，后头再晓得。为啥来勿及，还好来勿及哦，搿班火车呢拨取消了。因阿拉本生要趁个搿班火车呢，拨取消了。因为呢坐个人忒少，就拨取消了。然后呢阿拉就拦了部差头，到宾馆去拿物事。搿驾驶员蛮结棍个，本生规定老城是勿通车个，搿只赤佬从老城个小弄堂里斜插进去，还跟旁边个小摊头讲：朋友侬摊头暂时收收哦，等到阿拉车子过脱侬再放出来。搿小摊头真个收收伊讲，等到伊车子过脱再放出来。然后呢拿了阿拉石榴之后呢，阿拉还是回到只Louage站头。搿只差头司机还问阿拉，问阿拉伊讲伊开车子是勿是跟舒马赫老像个？最后还帮阿拉讲，等到阿拉下车，伊还要去买香水。还叫阿拉闻闻看伊衣裳高头香水味道好闻伐？我心里想瞎难闻。 最后呢小巴回到突尼斯aleoua只站头，价佃一共九块五角。Louage回来个车子蛮好白相个，开出来个辰光呢还蹲辣烟纸店里向停一停，让烟纸店里向个小赤佬呢问侬，侬要买啥？哎哟，看看突尼斯个女人还是好呀。突尼斯个女人是好，帮阿拉买水，零头都勿要阿拉。 然后呢到了突尼斯，从苏塞到突尼斯南部只aleoua小巴站呢。然后呢，新问题来了，阿拉最后天调地方调成功靠近市中心个叫 Golf Royal。优点呢是安全了，缺点呢是忒近了，没差头肯去。寻了三部差头侪勿肯去。最后呢，因为我是女个，难末各种各样个就……我讲阿拉小姑娘老罪过个，哪能哪能。最后一个老头同意了，即使就搿能，伊讲伊只同意带阿拉到地铁个另外一边，叫阿拉自家提了石榴到另外一边去。跨过铁路到另外一边去。到了宾馆呢，晓得为啥差头侪勿肯去了。因为搿搭个宾馆对过就是内政部，周围呢侪是搿种当兵个人保护辣海。 一进宾馆就是一只WELCOME DRINK嘛，是突尼斯特色个柠檬汁嘛。摩洛哥也有特色，摩洛哥是橘子汁。进了房间，噢哟，到底是三星哦，就是勿一样。当然，突尼斯毕竟勿是迪拜啦，三星级酒店呢也可以讲上了一只老大个档次了。
▌WELCOME DRINK：突突特色柠檬汁 然后呢阿拉就去警察局了。其实呢我也晓得，像抢手机搿种事体警察是勿会得管个。但是呢出于好奇，还是想去警察局看看。我对人家讲呢，我讲因为我买了保险，叫警察局报案底单再好拿钞票。之前呢我也讲了，搿地方老难拦差头，叫了宾馆个人帮阿拉拦差头。最后呢阿拉因为还要到Dar ya拿行李唻，就是先头只老城宾馆嘛，拿行李。一只老头出来一趟就是20D，搿能也好，既然讲好要办搿点事体，所以讲随便伊绕，伊寻勿着侪告我勿搭界。反正我就拨侬搿点钞票。先呢我跟Dar ya老板哈立德讲好了，长了像活狲一样个赤佬。然后呢，因为心有余悸嘛，我跟老头讲：我讲侬想办法开进老城。苏塞个驾驶员都敢开，覅讲伊唻。开到一个老城里向空旷个地方。难末呢搿只哈立德呢拿阿拉行李送出来。实事求是讲呢，搿哈立德呢人还是可以个，但实在是搿环境是吓人。之后呢就是去警察局。到了老头哇啦哇啦冤枉鬼叫，伊讲要老长辰光啊？我讲要末搿能，侬想办法带阿拉小朋友先回宾馆伐，等到伊拉跑脱之后，我就一心一意跑到警察局去了。  搿只辣辣老城CASBAH个派出所呢有一个老警察跟两个小警察。我进去个辰光老警察带了枪出门了。两个小警察辣海，正好辣吃饭，还问我要勿要一淘吃。一只COUSCOUS。但是呢我勿欢喜吃鸡肉个。我还跟伊讲了，我还跟搿小警察艾哈迈德讲，我讲我来报案。然后伊一面孔啥物侪勿晓得。我讲㑚勿是讲好搿只警察局有我个材料个嘛。搿只赤佬讲我打电话问。打电话个辰光呢我拿伊石榴侪吃脱了，还呛牢了。搿只小警察还帮我倒水吃。 搿只艾哈迈德呢，小警察帮我记录，一边记录，一边讲问我几岁，伊讲伊自家88年个。我问伊嘛，我讲侬几岁，伊讲88年个，我讲侬结婚了伐？伊讲我结婚了，还拨我看一只咪咪小个一只钻戒。难末我问伊，侬小囡有伐？伊讲我还没小人。我讲侬努力工作一下。然后呢伊狂笑，然后趁机呢我送伊一只包里个套套。伊接过呢开始以为餐巾纸，悄悄地一看发觉是套套，然后开心得来勿得了，然后拿另外一个小警察自家带来个饭拨我吃，伊讲侬慢慢叫吃。伊讲侬随便吃，侬要吃啥我帮侬拿。然后伊讲问我石榴要吃伐？我讲好个，吃个。伊讲随便侬吃好唻。然后还讲拨我听，伊讲突尼斯个套套质量老差个，价佃还老高。我跟伊讲：天朝个套套侪是随便拿个，因为计划生育用品嘛。伊讲搿质量看上去蛮好个伊讲，伊回去试试看。 正好搿辰光呢老警察带了一群小赤佬进来，搿只小警察悄悄地帮老警察讲，咬耳朵嘛。估计呢就是讲我拨伊套套个事体。老警察马上一面孔个，哎哟激动哦，还帮我飞吻唻，我感觉觉着老莫名个。搿只艾哈迈德帮我讲，搿点赤佬侪是贼骨头。但勿晓得有勿有得抢我手机个只小赤佬啦。其中有一个黑衣裳黑裤子看上去蛮像个，但是好像勿是。我讲老像个，搿贼骨头也老莫名个。我跟伊讲，记录了之后嘛，搿搭地方拦勿着差头个，然后呢另外一个小警察，难末帮叫啥，老警察跟艾哈迈德两家头讲好，伊讲侬想办法帮伊去拦部差头。 哈迈德呢，搿小警察叫哈迈德，哈迈德帮我去拦差头。伊身浪向带个枪呢是小枪，但是呢，竟然搿只差头司机嘛，有眼勿识泰山。伊问伊到阿里搭，难末哈迈德帮伊讲到只宾馆。驾驶员讲勿认得勿认得，哗一记油门一踏跑脱了伊讲。然后哈迈德火大唻，就叫了附近一个警察，搿个警察，因为附近有得总警察局个嘛，搿个警察拿了一把老大个枪过来帮我拦差头。搿个警察比较活络嘛，搿警察拿了把大枪，先拿枪伸进去，帮伊讲：侬现在就送搿位女士去Hotel Gulf Royal ，一定要打表。搿驾驶员吓杀脱了，抖抖豁豁讲：我勿认得。警察一边帮我讲，伊讲侬快上去侬块上去，一边帮伊讲：勿认得好打电话问嘛，伊有宾馆电话。好，驾驶员没办法，只好乖乖地送我去宾馆。然后还主动打表，还帮我讲唻。伊讲：我晓得我一定会得打表个。正常打过去只要2D哦，是便宜，怪勿得伊拉要罢工。 到宾馆呢，小朋友穷笑，伊讲，伊本生呢想无聊，阿拉带两只套套防水，结果侪送拨警察了伊讲。勿愧是星级酒店，电视是蛮好看个。阿拉两家头呢去看法国个频道。突尼斯也蛮有劲个，就算是本地个电视台，法文台也比阿拉伯文台多。选秀看了一个夜到，阿拉小朋友讲估计再蹲几天伊好做法文翻译了。我讲侬算了，还是看看阿拉伯文台，毕竟阿拉是阿拉伯国家。结果一打开就刮三唻，搿电视剧是好看啊，讲啥两个，一对狗粮蹲辣墓地里向晒，拿死人都撒得来跳出来了。 搿宾馆呢还是三星，纯粹是随随便便想个，因为辣海市中心嘛，勿算老贵，各方面侪蛮好个，就是差头难叫着。吃个方面呢也总归是早饭囥好个酸奶加面包，夜到呢我到警察局里向去蹭个。 摄影：小女生施维雅 口述：小女生施维雅 听写：神死恸瞑 编辑：神死恸瞑 点击 |
|
|
