 沪语朗读：钱爱娟
朗读者 包粽子是不灭的上海弄堂风情 作者：沈嘉禄 来源：侧耳SH 2019年6月6日 上海话改写：郭莉 诵读：钱爱娟 推荐：丁迪蒙 包粽子是阿拉搿一代人个童年印象。如今吃粽子，呒没啥稀奇，也勿一定要勒勒端午搿天吃，但每趟吃到伊，总归要想起从前个种种细节。交关风味之所以会得勒勒阿拉品尝伊个辰光，突然激起感情波澜，其实也就是因为通过食品媒介，想到了远去个亲人。 小小一只粽子，有交关匪夷所思个传说。不过只有屈原个故事最有影响力。“五月五日，为屈原投汨罗，人饬其死，并将舟楫拯之，因以为俗。”迭个是《荆楚岁时记》里向写个。从汉代开始，大家用五彩丝线包裹粽子，投进江水祭祀屈原。闻一多先生还认为，迭个是崇拜龙图腾个华夏民族特有个祭祖形式。 我姆妈是包粽子能手，枕头粽、三角粽、小脚粽侪难勿倒伊，再窄个箬壳也好拼起来用。嘴巴里咬牢麻线一头，另外一头紧紧地个拿粽子捆得石骨挺硬，搿能煠起来就勿会散，吃起来有咬劲。姆妈还会得搭我专门包几只袖珍小粽子，串成一串，煠熟后拨我白相。后来我倒是也学会了包三角粽搭仔枕头粽，有常时手贱了也会去轧轧闹猛，但小脚粽我一直没学会。小脚粽因为伊样子像从前旧时代妇女个小脚而得名，勿用绳子，侪靠箬壳穿插，拿一只粽子包裹周全，充分体现了劳动妇女智慧。 除脱大肉粽，上海人欢喜吃个是豆沙粽、赤豆粽、红枣粽咾啥。我顶欢喜吃赤豆粽，味道香，赤豆夹勒白米里，有一眼洇散，效果就像瓷器里向个釉里红，真是好看。阿拉屋里个豆板粽也蛮灵光个，新鲜蚕豆剥出来，拌勒糯米里，再少许放眼盐，为个是增加黏性，煠熟后有清香，蘸糖吃别有风味。我中学同学王文富，伊姆妈包个鲜肉粽里向加了一只咸蛋黄，迭个勒勒三十年前是邪气奢侈个，我吃了以后，心里居然涌起一种犯罪感！ 有一位老上海吃肉粽辰光，要蘸绵白糖，伊讲搿能滋味更崭，我试一试，确实是勿错。宁波人包碱水粽也另有一功，碱水粽不用粽箬，而是用晒干了个毛笋壳。碱水粽块头大，一只就足够侬吃饱了。因为加了碱，糯米个颜色有点微黄，赛过一抹北宋汝釉个天青色。明朝辰光个高濂，勒勒《遵生八笺》中写了一条经验讲，煠粽子，一定要用稻柴灰浸汁来煠，也可以用少量石灰来煠，为个是保持粽箬个青绿颜色搭仔特殊个清香。搿能看来，宁波人煠粽子辰光加点碱水就有异曲同工之妙了。 包粽子个日脚，满弄堂飘散出一阵阵清香。现在新鲜箬壳买大勿到，只有干箬壳，香气就推板交关了。 想我小辰光，上海弄堂里人家包粽子，侪要分送左邻右舍，所以一包起码几十只。当然，明后天侬也会收到邻居送来个粽子，礼尚往来，其乐融融，邻里关系就勒勒粽子飘香个季节得到发展。我姆妈用勿同颜色个线包肉粽，红线分送邻居，里向肉大，自己吃个肉小。阿拉弄堂里有一个脾气古怪个孤老头子，平常辰光深居简出，言话勿多，到了端午前头两天，就突然变得活跃起来，见人就拣好听言话讲。伊晓得迭个辰光要收邻居个粽子了，所以勒勒感情交流方面打提前量啊。还有一个性子刚烈个新妇，常庄为鸡毛蒜皮个小事体跟婆阿妈计较。有一年端午，婆阿妈让屋里人吃肉粽，剥到新妇碗里也是两只，但咬到当中，一块肉也呒没，原来是婆阿妈包到最后，肉用光了，就包了两只酱油粽，还暗中做了记号。迭个倒是实在有眼欺侮新妇个意思了，新妇勿买账，当场掼脱饭碗。 “白糖莲心粥……，火腿粽子……”迭个是从前辰光上海大街小巷个叫卖声，最近还拨英国啥个机构评为上海最动听十种声音之一。但是我认为，火腿粽只是一种夸大其辞个宣传，要是真个拿火腿包进粽子里，是勿好吃个，因为迭个火腿肉实在太硬了。侬讲是伐？
“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。 “闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。” 图：网络 | 编辑：渺渺 |
|
|
来自： 渺渺m69vnzsah9 > 《待分类》
