識普拼，學粵拼 | 粵拼 Jyutping

識普拼，學粵拼

粵拼嘅設計大部分同普通話拼音（即《漢語拼音》，下稱「普拼」）相同，只需讀完兩者主要區別，就可以掌握粵拼同粵拼打字。

寫法區別 & 音系區別

粵拼同普拼嘅區別分兩類：寫法區別同音系區別。

寫法區別 即呢個發音喺普通話同粵語入邊都有，只不過喺兩種拼音入邊用唔同嘅字母來代表，呢類區別一睇就識。

音系區別 即普通話冇呢個音，得粵語獨有，呢類往往都係普通話母語者學粵語嘅重點難點。

本文講解發音個陣會用到國際音標（IPA），如果讀者唔熟國際音標都冇所謂，直接撳個 掣聽例字嘅錄音就可以感受到個發音嘞。

本文所有粵拼都用粗體顯示，每隻例字拼音後面嘅數字 1 - 6 係聲調，讀者可以暫時先忽略，或者直接跳到 2.7 聲調一節瞭解完聲調再開始讀本文。

1. 寫法區別

1.1 普拼 y → 粵拼 j

普拼嘅 y 喺粵拼入邊寫成 j。之所以寫成 j 係出於兩個考慮：一係呢個音國際音標入邊就係寫成 [j]（普拼嘅 y 係英文嘅寫法）；二係如果寫成 y，會同韻母 yu 撈亂（詳細解釋可見本站嘅 關於 j 同 y）。

例字	✔️ 正確寫法	❌ 錯誤寫法
一	jat1	yat1
以	ji5	yi5
夜	je6	ye6

1.2 普拼 ü → 粵拼 yu

呢個音嘅國際音標係 [y]。呢個韻母雖然係單元音，但喺粵拼入邊用咗 yu 兩個字母來表示，噉係爲咗避免好似普通話嘅 ü 噉要用到附加符號，另一方面都係前文提到嘅，防止同 j 撈亂。

例字	✔️ 正確寫法	❌ 錯誤寫法
豬	zyu1	zü1
村	cyun1	cün1
雨	jyu5	jü5 / yu5

1.3 普拼 gu-、ku- → 粵拼 gw-、kw-

普拼嘅 gu-、ku-，喺粵拼入邊用 gw-、kw- 來表示。不過要注意，gu、gun 仲係 gu、gun。

例字	✔️ 正確寫法	❌ 錯誤寫法
廣	gwong2	guong2
狂	kwong4	kuong4
昆	kwan1	kuan1
古	gu2	gwu2 / gw2

1.4 普拼 ong → 粵拼 ung

普拼中嘅 ong 同粵拼嘅 ung 發音係一樣嘅，國際音標都係 [ʊŋ]，而粵拼中嘅 ong 係普通話冇嘅發音，國際音標係 [ɔŋ]。

ung	ong
鍾 zung1	莊 zong1
公 gung1	江 gong1

1.5 普拼 ao → 粵拼 aau

粵拼以 u 而非 o 結尾，呢個都係遵循國際音標嘅寫法。

例字	✔️ 正確寫法	❌ 錯誤寫法
考	haau2	hao2 / haao2
包	baau1	bao1 / baao1

關於粵拼中 a 同 aa 嘅區別下面會講解。

2. 音系區別

2.1 韻腹 aa 同 a

普拼嘅 a 等同於粵拼嘅 aa，國際音標係 [a]。而粵拼中嘅 a 音喺普通話入邊冇。佢嘅國際音標係 [ɐ]。aa 同 a 係兩個不同嘅韻腹，唔好撈亂。讀者既然識粵語，噉睇下下面幾個例字就知道個區別嘞：

aa	a
三 saam1	心 sam1
山 saan1	身 san1
稍 saau2	手 sau2

2.2 韻腹 eo、oe

呢兩個韻母嘅國際音標分別係 [ɵ]、[œ]，普通話入邊都冇呢兩個音。

eo	oe
率 seot1	削 soek3
潤 jeon6	讓 joeng6

大家可能會覺得，點解要將 eo 同 oe 分開？呢兩個唔係同一個音來嘅咩？其實唔係。eot6 係「術」字嘅韻母，但係 oet6 字就係另一個音嘞。「食完飯 oet6 一啖氣出來」，就係呢個韻母 oet6。

再例如形容趕快嘅詞「coet4 coet2 聲」，好明顯唔係「出出聲」，所以呢兩個係唔同嘅音來㗎。

詳細嘅解釋可以參考粵拼答問第 F 問。

2.3 韻母 e

普拼嘅 e 國際音標係 [ɤ]，即係普通話入邊「餓」字嘅韻母，如果佢前面接 y 或者 i 則表達另一個音 [e]，例如普通話裏「夜」字的韻母。而粵拼入邊 e 永遠淨代表一個發音 [ɛ]，呢個音類似英語單詞 「yes」 嘅元音。

• 寫 se2
• 借 ze3
• 鄭 zeng6
• 石 sek6

2.4 韻母 i

普拼入邊 i 會根據拼寫音節嘅唔同會代表兩個唔同嘅音。例如普通話入邊「資」嘅拼音係 zi，呢度 i 代表嘅音係 [z̩]，而喺「機」嘅拼音 ji 度，i 代表嘅音係 [i]。換句話講，普拼中 zi ci si 入邊嘅 i，同 ji qi xi 入邊嘅 i 係兩個唔同嘅 i。

粵拼嘅 i 情況類似， 喺大多數時候都代表發音 [i]，而拼寫成 ik 或 ing 個陣發音就變成 [ɪ]。

[i]	[ɪ]
詩 si1	識 sik1
仙 sin1	星 sing1
知 zi1	即 zik1

2.5 聲母 ng-

呢個音嘅國際音標係 [ŋ]。普通話冇呢個聲母，而粵語入邊聲母 ng- 同零聲母 Ø- 係區分嘅。而家好多廣州人都分唔出嘞，例如將「我」字發成 o5，但係其實個發音係 ngo5。（好彩輸入法可以開模糊音，所以如果實在分唔到就開模糊音啦，冚唪唥打晒 ng- 開頭就得）。

ng-	Ø-
岸 ngon6	按 on3
雁 ngaan6	晏 aan3

2.6 韻尾 -m

普通話入邊鼻音韻尾淨得 -n 同 -ng（前鼻音同後鼻音），冇 -m。而粵語保留咗 -m、-n、-ng 三種鼻音韻尾。

-m	-n	-ng
三 saam1	山 saan1	生 saang1
含 ham4	痕 han4	行 hang4
尖 zim1	煎 zin1	精 zing1

2.7 韻尾 -p、-t、-k

呢三個韻尾就係傳統意義上嘅「入聲」。普通話冇入聲，但係粵語就保留嗮，所以既然讀者識粵語，下面幾隻字嘅發音應該都好容易區分得出來。

-p	-t	-k
湿 sap1	失 sat1	塞 sak1
接 zip3	节 zit3	脊 zek3
集 zaap6	活 wut6	六 luk6

2.8 聲調

提醒

如果淨係想學識用粵拼打字，可以直接跳過本節。粵拼打字唔需要打聲調，不過如果打埋聲調嘅話可以提高輸入速度。

普通話得四個聲調，粵語有六個。我哋先回憶下普通話嘅四個聲調：

總結出來普通話四個聲調嘅調值如下表：

第 1 聲	第 2 聲	第 3 聲	第 4 聲
55（高平調）	35（高升調）	214（曲折調）	51（高降調）

而粵語嘅 6 個聲調如下圖：

6 個調值如下表：

第 1 聲 55（高平調）	第 2 聲 35（高升調）	第 3 聲 33（中平調）
詩 si1	史 si2	試 si3

第 4 聲 21（低降調）	第 5 聲 13（低升調）	第 6 聲 22（中低平調）
時 si4	市 si5	事 si6

如果實在記唔住呢啲聲調都冇所謂，反正輸入法打字唔使打聲調。

可能會有人問，點解我覺得廣州話唔止六個聲調嘅？例如「私人」同「詩人」嘅音唔一樣喎，點解都係 si1？呢個係因爲粵語廣州話入邊嘅第一聲的確已經分化咗成兩個聲調，有啲字例如「詩」讀成 高平調 55，有啲字例如「私」讀成高降調 53。但係喺粵拼入邊我哋唔做區分，全部當成第一聲。

詳細嘅解釋可以參考粵拼答問第 I 問。

練習粵語聲調仲有一個好好玩又有效嘅方法，就係利用粵語歌，詳見本站嘅用粵語歌練習聲調。

2.9 普通話特有、粵語冇嘅音

粵語唔分平翹舌音，所以粵拼入邊冇 zh ch sh r 呢四個聲母，另外粵語冇普拼中嘅 j q x 音（粵拼嘅 j 等於普拼嘅 y）。

3. 搞掂！

恭喜你讀到呢度，粵拼同普通話拼音嘅區別就咁多，其他字母代表嘅發音，例如 b p m f、d t n l、g k h、z c s w 喺普拼同粵拼入邊都係一樣嘅。要查睇成個粵拼方案嘅完整聲韻母表，請見本站嘅 LSHK 粵拼方案。而家先來做幾個小練習，睇下你學識打粵拼未：

3.1 練習

寫出下面幾個詞嘅粵語拼音，可以唔理個聲調：

1. 粵語拼音
2. 廣州話
3. 稍等
4. 你哋
5. 我同佢
6. 香港
7. 語言學

答案（可以忽略個聲調）

1. jyut6 jyu5 ping3 jam1
2. gwong2 zau1 waa2
3. saau2 dang2
4. nei5 dei6
5. ngo5 tung4 keoi5
6. hoeng1 gong2
7. jyu5 jin4 hok6

3.2 工具資源

我哋已經講解晒粵拼同普通話拼音嘅區別，如果你想對成個粵拼方案有個全面嘅認識，噉務必睇下本站嘅 LSHK 粵拼方案 頁面。入邊有晒成個粵拼方案嘅所有聲母韻母，仲有埋發音示例。每個聲韻母都撳下粒 掣聽下聲，就可以好快熟悉成個粵拼方案。

啱開始用粵拼嗰陣，往往都會有啲字唔識點拼，呢個時候就一定要查字典。我哋推薦一個網上粵拼字典：

• 粵音資料集叢

如果遇到字唔識佢嘅粵拼，隨時用呢個字典來查。如果想要更多粵語學習資源，請見粵語學習資源。

附錄：粵拼注音文本示例《北風同太陽》

有jau5 一jat1 次ci3 ，北bak1 風fung1 同tung4 太taai3 陽joeng4 喺hai2 度dou6 拗aau3 緊gan2 邊bin1 個go3 叻lek1 啲di1 。佢keoi5 哋dei6 啱ngaam1 啱ngaam1 睇tai2 到dou2 有jau5 個go3 人jan4 行haang4 過gwo3 ，哩li1 個go3 人jan4 着zoek3 住zyu6 件gin6 大daai6 褸lau1 。佢keoi5 哋dei6 就zau6 話waa6 嘞laak3 ，邊bin1 個go3 可ho2 以ji5 整zing2 到dou3 哩li1 個go3 人jan4 除ceoi4 咗zo2 件gin6 褸lau1 呢ne1 ，就zau6 算syun3 邊bin1 個go3 叻lek1 啲di1 嘞laak3 。於jyu1 是si6 ，北bak1 風fung1 就zau6 搏bok3 命meng6 噉gam2 吹ceoi1 。點dim2 知zi1 ，佢keoi5 越jyut6 吹ceoi1 得dak1 犀sai1 利lei6 ，嗰go2 個go3 人jan4 就zau6 越jyut6 係hai6 揦laa2 實sat6 件gin6 褸lau1 。最zeoi3 後hau6 ，北bak1 風fung1 冇mou5 晒saai3 符fu4 ，唯wai4 有jau5 放fong3 棄hei3 。跟gan1 住zyu6 ，太taai3 陽joeng4 出ceot1 嚟lai4 曬saai3 咗zo2 一jat1 陣zan6 ，嗰go2 個go3 人jan4 就zau6 即zik1 刻hak1 除ceoi4 咗zo2 件gin6 褸lau1 嘞laak3 。於jyu1 是si6 ，北bak1 風fung1 唯wai4 有jau5 認jing6 輸syu1 啦laa1 。