 
作者：海宁 电视剧《甄嬛传》播出有十年了，侬晓得伐，我对啥人印象最深？对阿里一段台词记得最牢？《甄嬛传》里敬贵妃并不起眼，但为人善良聪明，伊讲：侬晓得我宫里厢有多少块地砖伐？一共有一千三百二十六块，其中三十一块侪有细碎咯裂纹，每一块我侪数了无数遍，否则，漫漫长夜我将如何度过？ 一个人勒封闭空间里蹲了辰光长了，会做出让常人不可思议咯事体，就像敬贵妃数地砖。一家人关勒屋里一个月，夫人带着两个年轻人负责团购，阿姨安排饮食、卫生，只有我一介头勿愁吃穿。除了看书就是冥想，老底子咯事体勒脑子里翻来覆去。这几天“负能量”内容忒多，看多了心情勿大好，昨天开始一直勒想：“上海人最怕啥？” 搿问题年轻人蛮难搞清爽，而对老上海来讲，则早已混入了血液里。搿就是“勿要麻烦别人，勿要影响别人咯私生活！”阿拉外婆屋里，相对生活条件比较好，所以样样啥嚒事侪有备货。一是自有自便当；二是别人有急需可以帮一把。对勿要影响别人这桩事体，做到极致咯就数大翻译家傅雷先生了！当年阿拉屋里住勒江苏路朝阳坊，隔过“256弄”就是安亭坊，傅雷夫妇自杀这天大清早，阿拉就听讲了。据说傅先生交待好后事，上吊前还勒地板浪铺好棉花胎，生怕方凳倒下来影响楼下邻居休息。前几天我还看到一段大方仓里咯视频，一个八十几岁咯老太，伊呒没办法勒方仓床位边浪大便，只好麻烦四男一女，用一块床单布抬伊去厕所，我想这是老太搿一辈子最难熬咯辰光，相信比死还难过。电视新闻里播出一个杨浦区独居老人，呒没存货也勿好意思求救，当收到光明集团咯爱心包，反复作揖，像只不倒翁，猜想老先生搿辰光心里难过胜过感激！ 多少年来上海人养成了要面子，讲腔调咯习惯。胡子勿刮、头势勿清，绝对勿好出门；生活搞不定老是吃救济最呒没腔调；屋里厢再小也要螺蛳壳里做道场，弄得煞清，否则女主人会拨人家背地里骂“烂料胚”，一旦牌子做坍忒，搿是不得了咯大事体。讲实在，上海人一百多年来为了“面子”搭仔“腔调”喫煞苦头，阿拉小辰光看见过“清水包头”、“赤膊带领带，赤脚穿皮鞋”，“不怕屋里火烧，只怕出门拐一跤”咯种种死要面子咯事体。 如今疫情肆虐，城市封控，管理混乱，上海人就像倒做了一把欧洲石油期货，董事会意见不一致呒没加仓，一夜到输光面子搭夹里，弄得来腔调也呒没！老底子，就算勒弄堂里吵相骂也要讲腔调咯。虽然双方对各自咯底细侪煞清，但就是恶狠狠骂人，也勿好揭老底；假使万不得已伸拳头，也勿好打对方面孔，搿是规矩！啥人违反了规矩邻居会看勿起，勿管侬起先是否有道理。 这次仅仅用了一个多月，上海老规矩就被破坏得七七八八，特别是勿要轻易麻烦别人变成了经常麻烦邻居朋友。昨日，我困觉药快呒没了，因为小区抓牢一只“小羊”，估计十几天内还是勿好出门，只好请社区居委会帮忙配药，但是只听楼梯响呒没人下来。结果女婿勒小区群里一呼，即刻有邻居倾力相助。搿几天阿姨烧菜缺调料，就到电梯大厅“小小爱心超市”里去乃。搿是一个有出门证咯年轻邻居设立的，伊每天下班还会补货，使用者用微信支付，十分方便。 上海人最怕影响别人咯私生活，而此次疫情打乱了大家咯平静生活，个人隐私大曝光，仅有咯一点优雅也从天浪拐到地浪。但是我却从邻居身浪感到了久违咯温暖，而且令大家吃惊咯是，上海年轻人竟然如此热心、甘愿付出！搿真是上海咯希望，上海咯未来交给搿眼年轻人阿拉一眼也勿耽心！疫情下咯上海令人痛心，而邻里间咯友爱，年轻一代咯高尚情操，又使大家信心百倍。上海啊，上海！阿拉深深地爱着侬 
“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。 “闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。” 图：网络 | 编辑：渺渺 |
|
|
来自： 渺渺m69vnzsah9 > 《待分类》
