2月24号,华为勒西班牙巴塞罗那发布仔俚个头一只5G折叠屏手机Mate X,乃是闹猛「热闹」煞,上到新闻媒体,下到身半边人,QQ群、朋友圈、微博侪勒「在」讨论该项黑科技。 大家个关注点也从手机功能转到仔柔性面板,再转到仔捺亨「怎么」贴膜,舌割乱拌「嘀嘀咕咕」,昏说乱话,闹闹猛猛,赛过「好像」人人侪「都」端正仔「准备」要买。 但不过再看一眼价钿「价钱」,也是蛮结棍「厉害」,售价2299欧元,折合人民币要一万七出头,弗是一般性人买得起嘎。 该趟「这次」华为手机最吸引人个就是俚个折叠功能,搿末「那么」,倷阿晓得「知不知道」苏州闲话里,捺亨说“折叠”呢? 确实,伲「我们」可以直接讲“折叠”,大家也侪听得懂,但不过该个是强读,听勒海总归有点硬乔乔「生硬」。 苏州人讲着“折叠”这个动作,一般会叫“iau3”,譬方讲:
该个“iau3”是啥个字呢? “夭”个本义是“屈、折”。 《广韵》上声小韵於兆切:“~,屈也。” 《说文·夭部》:“~,屈也。” 而伲苏州人讲个“iau3”,有拿平摊个物事「东西」两头翻折起来个意思,所谓“折叠”,是屈、折个引申义,搿勒「所以」伲好“夭衣裳”“夭被头”“夭纸头”等等。 《乾隆昆山新阳合志·方言》:“折纸曰~,~亦折也。” 实梗「这样」来看,伲一个口语常用字“夭”,也是相当有文化内涵搭仔历史渊源个啊! 搿勒,用苏州闲话解释一下,华为个新手机就是“两半爿,摊开来就是只平板,夭起来就是只手机”,所谓“折叠屏”。 “折叠”就是“夭”。 文 | 予安 版 | 予安 |
|