【原】人老了，开心就好！

上海言话讲述：与人为善

    

人老了，开心就好！

作者，上海言话朗读：与人为善

   九月廿七号，学堂组织退休教工到青浦曲水园＋朱家角一日游。拨疫情封勒屋里六个号头呒沒出游过个我，开心得象小囡一样：隔日叫先生搭我拿小番茄汏好沥干，袋袋里装好；兴冲冲个到《全家》拿零食买好；再末，口罩，酒精纸，纸巾，保温杯……一样一样，舒舒齐齐个侪放好，乃末定定心心睏了。

   为了上车勿迟到，大清老早我就出发到学堂了。上海个早晨是个繁忙个早晨。阿拉个车子出发并勿妟，开出校门一路浪蛮爽气，上了卢浦大桥就“笃姗姗咾勿犯难”了。必过，迭个一眼勿影响阿拉搿眼老小囡个心情，大家一面看看车窗外头久违个中国馆世博园搭仔黄浦江浪来往穿梭的大大小小个船，一面唧唧喳喳地谈兴正浓……下了卢浦大桥路况良好，也勿晓得是路途勿远，还是说说讲讲勿觉着：勿长远就到了目的地曲水园了。

   曲水园虽远不及苏州园林，但伊个静谧，伊个蜿蜒幽径铺青石，伊个秀色可餐，伊个娇小玲珑，着实让阿拉迭眼老小囡欢喜得笑逐颜开：或驻足，或落座，更多个是摆pose拍照，不乐亦乎！

   如果讲，曲水园里个消遣让我伲交关日脚郁闷个情绪得到了舒解，那么，朱家角个兜一圈让我伲尝到了市区难得个“小辰光个味道”！兜发兜发，一家拨电视台采访过个家庭式饭店吸引了我伲，禀持“灶头间，厕所间干净个人家是勿会龌龊到啥地方”个理念，大家进包房落座点菜吃饭。鲜嫩个白斩鸡，美味个白水鱼，农家老蚌豆腐汤，嫩菱炒毛豆，炒鳝糊……饱了口福，享受了勒辣市区难得个美味！临走，我还勿忘记买了钟爱个粽子带回去！

   可怕个疫情使得我伲老年人“固步”自封半年之久，再“封”下去，勿搭社会接触，我个人也要疯脱了！联想到阿拉屋里个一只鹦鹉🦜，开始落户到伲屋里先生让伊蹲勒一只精致个画眉笼里，后首来，小儿子勒网浪搭伊买了间别墅。看来，🦜搭人是一样个：交关辰光勿看见人，就会唧呀唧呀叫勿停。

   人，是群居动物，老了更加需要接触社会，需要交流，迭能才会身心愉快身体好！迭日天回到屋里，先生搭儿子侪觉着我精神状态相当勿错，我开心，伊拉也开心。

   “醉了光阴不问年”。人老了，开心就好。

朗读者

    

方言是文化的活化石。每种语言都能表达出使用者所在民族的世界观、思维方式、社会特性以及文化、历史等，都是人类珍贵的无形遗产。当一种语言消失后，与之对应的整个文明也会消失。保护汉语方言，有利于人类文明的传承与发展和社会安定。

在上海，爱上海，讲上海言话。

“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。

“闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。”

图：网络   |   编辑：渺渺