  
马路——盆菜出世，哲学落地 作者：白米 平常日脚拨人匆匆来匆匆去，过后勿想再提起个小菜场阿有啥新闻好讲啦？哎，侬还覅讲，小世刚开始工作就碰着两桩稀奇事体唻！ 搿年仔，本区西北角一家室内菜场就真出新闻了。前两年刚刚从露天菜场调过去个张书记有过部队经历，伊从事地方工作倒也蛮有心个。伊发现新菜场地处工人新村，双职工居多，伊拉侪为每日天个买小菜发愁，早浪向要赶勒上班去，没工夫买菜，落班辰光，天色勿早了，小菜场里也呒啥啥了，总归买勿着称心物事。书记看勒眼里，一直勒想哪能解决伊。伊想是勿是好事先捺小菜加工加工，再按份出售呢？召开各大组长会议，好主意，一拍即合。说上手就上手，各大组抽调人手，辟出只专门零售柜台，添置了大大小小粗瓷白盆子，蔬菜汏沃削削，去皮去根，荤菜改刀切切，再是搭配装盆，分大小份。荤素菜按上海人家常菜口味装盆，像蕃茄炒蛋，茭白炒肉丝，土豆炖牛肉，咸菜黄鱼汤，豆芽油豆腐咾啥，r肉丝肉片二三两一份，花色品种二三十样。赶早要上班个人到摊头手一指嘴一张，一盆盆菜就倒落小菜篮里，拎篮头就走，再勿要一只只摊头去排几只队了，省时省力，称心满意。居民就盆菜盆菜介叫开来了，盆菜横空出世了。 方便了居民群众，必然辛苦了营业员，伊拉是半夜就来上班了，整理工作量是老老大个，不过加工费是勿计算个，勿加重消费者负担。 区公司抓住典型，各家菜场侪闻风而动，全面推广。盆菜是窗口里吹喇叭，名声在外。勿多时，传到外省市，惊动了报刊杂志，《人民画报》就从北京赶过来，采访上画报，图文并茂，交关大报也跟勒报道了。一时里风头无两。外省市同行种也来现场取经，回转去也学了做，搿再叫为人民服务了。张书记自然成了新闻人物，全国先进了。 搿一年，四清运动还末完全结束，又开始了工农兵学哲学，本公司党委章书记（立早章）带头。章书记早年拉过黄包车，做过地下工作，追求进步，政治觉悟高，一步步升到区公司党委书记。伊个口才老有名气，做报告脱稿一口气好讲毛两只钟头，说话幽默风趣，但又道理尽在其中。小世有趟听章书记报告，印象老深。伊批评有些营业员业务勿精又想贪小便宜，讲卖豆腐个“出兵三十六，回兵十八双，看看是勿少，个个侪受伤”，零售豆腐划勒七歪八起，还赚一小块拨自家，损公肥私，损害群众利益。大会场一阵哄笑，也有人面孔红了。 章书记学哲学老有心得，常桩有文章勒系统内传播，侪用个是群众语言，让人看得懂乐意听，又受了教育。伊个《卖菜中个哲学》（大概是），用伟人个矛盾论实践论思想运用到商业零售工作中去，深入浅出，市里个大报侪发表了。搿叫哲学落地为工农兵所用。章书记也因此获荣，伊勒全公司职工当中威信蛮高个。 但是，啥人会想得到明年仔章书记就拨“打倒”了。
“言话”基本解释：说话，谈话。南朝宋·刘义庆《世说新语·赏誉》“天锡见其风神清令，言话如流。”宋·苏轼《归去来集字》诗之三“言话审无倦，心怀良独安。”此与今日上海话中“言话”的用法是一致的。 “闲话”基本解释：指闲谈；背后议论他人是非的话；不满意的话，有关私人的谣言、传闻、幕后消息等。见陆游《雪意》诗：“闲话更端茶灶熟。” 图片：原文 | 编辑：渺渺 |
|
|
来自： 渺渺m69vnzsah9 > 《待分类》
