|
该个冷天，蛮难行，冬至夜也是冷清清，瀴冻冻。瘟情下头，无不一个人能独善其身。  屋里向一个挨一个侪躺平哉。先是娘舅，觉着有点弗适意，量一量，38.3°，眼看仔小队长变成中队长，舅妈搭妹子豪稍嘴套戴起来。但不过有啥个用场呢？中浪向一家门还勒一只台子浪吃饭勒。 第二个打场葛是妹子，弗晓得是单位里过着葛还是拨俚笃爷传染葛，第二日也弗来三则。温度飙到38度，搭爷作作堆，新房子报到。 妹子买仔新房子，九月份刚正装修好，本来端正吹一吹，到明年热天过脱再搬场。朆壳张提前启用，当隔离病房哉，但不过总归比困栈房要好。  第三日是舅妈，隔日夜里刚巧齐仔点物事担到新房子里，单位里就来电话哉：下晚昼混管阳性，来做单管吧。单管等到夜里，宣布中奖。 屋里躺倒仔三个，只挺下来老好婆搭仔我。妹子困倒以前，用退热药换仔人家葛小儿退热悬浊液以备不时之需。 弗管怠慢，早浪起来豪稍拎仔消毒水搭外婆消杀，量体温，量血压一条龙。再搭勒住勒独墅湖葛爷娘互报平安。 现在想想，幸亏得今年大热天，四十几度葛天里拿房子装修好，弗然该歇辰光烧饭葛地方也无不，覅说还要拿猫咪做隔离哉。 妹子早浪吃仔药，困仔歇，该歇辰光寒热亦起来则。讲困下去葛辰光冷得要死，该歇末热煞快，搭俚说死话：生仔该个老鬼三，就晓得啥体苏州人喊“发烧”叫发寒热哉。 老话还有一句，叫挨着弗是轮着，讲葛是挨得着挨弗着，侪看运道。老早点侪眼热额骨头，该趟顶好碰弗着。 拿药齐齐好，触祭葛物事囤好，消毒水灌好，登勒屋里度死日吧。 闲作一篇，无心翻译，随便看看 祝大家身体健康 |
|
|
