|
上海老底子每天呈送精彩文章一组 打开尘封的记忆，寻觅往昔的岁月
叙上海老底子事 忆上海老底子人 诉上海老底子情 只要“光明邨”还勒排队， 世界就还是光明个 来源：老周望野眼 作者：周力 改写：周红缨 讲述：金丽萍 审阅、推荐：丁迪蒙 编辑：王乙其 有句老话：寒天吃冷水，点点在心头。对迭句闲话个含义，我想搿段辰光，大多数上海人侪勿会呒没感受。无论如何，马路浪向有了点人气，高峰时段甚至还开始堵车了。 昨日仔，有朋友告诉我：伊路过淮海中路个“光明邨”，看到排队个人还是交关，立时三刻有种“恍若隔世”个感觉。是个呀，勒“光明邨”排队买鲜肉月饼、买熟食卤味，曾经让人觉着是邪气俗气个。但是，现在搿种日脚，“光明邨”就像伊个名字一样，用门口排队个人流，来带拨大家一点光明搭仔希望。
勿晓得阿里位朋友勒文章里写过：只要“光明邨”还勒排队，就感觉世界还是光明个。迭句闲话曾经是某种调侃或者是嘲讽，现在看来却是千真万确个。勒“光明邨”排队个，大多数是老年人。上海是个老龄化社会，老年人恢复活力了，城市个活力也就会慢慢叫转来。 今朝，勿妨用点笔墨，讲讲“光明邨”迭家创造了淮海路“人气传奇”个店家，希望“光明”时刻搭每位读者朋友相伴。
淮海中路原来叫霞飞路，近百年来，伊始终引领上海个时尚潮流，搿是风水呢，还是其他啥个原因？啥人晓得过呢。但是，就像歌词里唱个：“成功，失败，浪里看勿出有没有”，淮海路浪个店家潮来潮往，真正可以长盛勿衰个并勿多。想当年，勒淮海路浪吃点物事，广帮有得“大同烤鸭”，川扬帮有得“绿野饭店”，西域风味个有得“天山回民”，西餐呢，有得“天鹅阁”，还有老松顺、茅山酒家、上海西菜社、江夏点心店……实在是数也数勿过来，绝对是挂一漏万个。 但是，搿些名字，侪已经是上海人心里向个回忆，再也看勿到了。相比之下，位于淮海中路近成都南路个“光明邨”，既勿是百年老店，也缺乏有别于其他品牌个“独家拳头产品”，但是，介许多名气更加大、历史更加悠久个商家侪消失了，介许多新个品牌、新个商家，从开始个人头攒动到后首来个门可罗雀。“光明邨”，至少勒近三十年来始终屹立勿倒，讲伊是淮海路浪个传奇，一点也呒没夸张个。
“光明邨”个房子原来搭食品并呒没啥关联，是时装店搭仔首饰行。1956年公私合营，利用淮海中路586-590号三家门面，拿淮海中路搭仔成都南路附近个几家小点心摊贩合并勒一道。“光明邨”个名字本来也有个，是开勒现在TX淮海位置个一家锅贴店。另外加入个，还有成都南路浪个点心摊搭仔烘山芋摊、长乐路浪个酒酿饼等。搿些商家本来侪是小本经营，合并勒一道，称为“淮海食堂”，顾名思义，走个是大众路线。 我曾经勒一本淮海中路个画册里寻到一张“卢湾区淮海中路合作食堂”个旧照片，以为是“光明邨”个前身，后来经卢湾老档案人汪志星老师指认，搿张“淮海中路合作食堂”个照片是勒淮海中路淡水路附近拍个，后首来改名为“淮海食品店”，九十年代中期造南北高架个辰光拆脱了，搭“光明邨”并呒没关系。不过，从搿张“卢湾区淮海中路合作食堂”个照片，大致可以想象“光明邨”个前身“淮海食堂”是哪能样子个。 “光明邨”最早是做锅贴个，还有烘山芋搭酒酿饼个基因，交关老上海对伊个印象则是肉馒头搭仔菜馒头。以鲜肉月饼搭仔熟食卤味出名，好像是九十年代以后个事体了。
1993年，淮海中路为建造地铁一号线而进行了一次大改造，本来只有门面房个“光明邨”抓牢机遇，拿楼浪个居民动迁脱，再有了今朝个“光明邨大酒店”，隶属于丰裕集团，从此开启一段传奇。有人讲，光明邨个熟食卤味味道搭丰裕生煎个差勿多，但是，光明邨个选料更加精，定位还是勿一样个。 我记得九十年代个“光明邨”，二楼曾经供应火锅，价廉物美邪气受欢迎。现在“光明邨”隔壁个真丝大王，曾经是上海个第一家麦当劳餐厅。还记得当年经常搭同学勒“光明邨”二楼吃火锅，嘴巴干个辰光，到楼下头麦当劳去买草莓奶昔解渴，曾经是大学时代难得个享受。现在，搿家麦当劳老里八早就停业了，草莓奶昔也从麦当劳个菜单当中消失了多年，大学时代简单个快乐老早就成为了过去。 再后来，“光明邨”突然就火爆起来了。有人讲，伊拉打个是价格战，同样是鲜肉月饼搭仔熟食卤味，“光明邨”个价钿比对过个长春食品店便宜。也有人讲，确实是价廉物美值得品尝，总之，“光明邨”成为了传奇。每趟路过伊面，总归拨伊搭个人流所震撼。看看电视里，美食节目采访阿姨爷叔，迭位是早浪向三点钟从郊区赶过来个，一定要买只光明邨个酱鸭带转去。伊位是带仔小矮凳半夜里就排勒海了，买鲜肉月饼要送人个。我勿晓得收到伊盒鲜肉月饼个朋友内心是啥个感受，搿是老人个一份心意搭仔七八个钟头个付出啊，要哪能还礼再可以问心无愧呢。
“光明邨”个火爆带动了整个街区个繁荣，啥个美式炸鸡、京味点心……搿一段淮海路诞生了交关生意火爆个“网红”，但是，年轻人个热潮老快就过去了，只有“光明邨”靠仔排队个阿姨爷叔，始终是人气勿减。年轻人是多变个，而老人个忠诚搭仔执着常庄让人感动。 从事创意产业个朋友欢喜谈“未来”，却勿懂得只有抓牢了过去，再是抓牢了现实，未来？毕竟是虚无缥缈个。光明邨个二楼提供点心，面条、馄饨咾啥。三楼四楼有炒菜，据说，想订只“光明邨”个包房邪气难，想想也是望而生畏，根本就呒没动过迭个念头。 只要“光明邨”还勒排队，世界就还是光明个。现在我深刻个领会了搿句闲话所隐藏个意义。排过其他队个人再能真正理解，能够排队买点吃个，搿是多少幸福个事体。我想，今后我勿会再用嘲讽个语气来讲“光明邨”，我希望“光明邨”门口永远有得介许多人，我希望上海个其他店家也像“光明邨”一样生意兴隆、早夜排队。
有机会，我要再到“光明邨”楼浪去吃碗辣酱面或者大馄饨，当然咾，假使可以到传说里向个“光明邨”包房去体验一下，搿就更加好了。当然，为了吃一口鲜肉月饼或者酱鸭、糟货排长队，我仍旧有点吓势势个，拥挤个人群，或许看看就好了……
作者：周力
讲述：金丽萍 迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。
转自：“海上梦叠”公众号 |
|
|
