 题记：吾是一个土生土长个上海人，写一篇关于上海电话机个历史，以及与之相关个各类人事物情搭各类趣闻轶事，文章极有可能写得交关多，还会有眼冗长啰里八嗦，但愿欢喜写文章个爱好者、欢喜上海滩各类历史个网友，要是还能看得下去，还愿意去看一看。但凡是涉及上海滩各类人事物情个文章，侪是吾邪气好个写作题材库，多多少少能留存一眼眼上海故事，去保留迭座城市历史个记忆……  吾查阅到有关于上海滩个电话史料以后侪晓得，实际浪向上海勒老李把早就已经是拥有电话，拥有第一部电话个辰光就是勒1882年，也只畀过比英国人亚历山大·贝尔勒1876年发明电话迟到6年。  当时光跨入到1882年个辰光，“丹麦大北电报公司”勒上海外滩7号，开通有人工电话交换所，迭家公司是专门经营租界内电话业务，迭个是上海迭座城市顶早个市内电话。勒相当长个一段辰光里向，电话只是某些极少数邪气搛铜钿人家以及各类大商家个通讯工具。  依据上海滩有关于电话历史资料个统计以后侪晓得勒，自从1949年05月27日上海解放以后，全市一塌刮子拥有电话机437部。到1951年时，全上海市也只有公用电话机1512部，勒掰搿辰光，绝大多数个公用电话机侪是安装勒弄堂口烟纸店里向个，是由买卖杂货个老板代为看管个，迭类人是覅负责“传呼”迭项业务个。从1952年起，勒拉部分市区开始试点并执行传呼电话服务，一年以后陆陆续续向市区全面推广迭项业务，到1960年时，全市个公用电话达到3293部。  从1952年开始向全市推广传呼电话业务以后，陆陆续续开始设立“各种类型个电话亭子间”，依据相关部门个统计，当时光进入到1985年，全市一塌刮子设立传呼电话服务亭有3257处，伊个营业收入占市电话局年收入个9%，年话务量顶高个辰光达到1亿多次，占全市通话总量个10%，覆盖市区1000多个居委会，服务人员有得1万多名。到1991年，整个上海市安装有2000多部夜间应急电话，伊个服务辰光从夜到头10点钟开始，一直要服务到翌日早浪向7点钟，基本浪向遍布上海市所有个区域范围内，能够满足市民夜间紧急通信个需求。  上海迭座城市有一种独特个建筑叫做－－“石库门”，勒每一幢“石库门”房子侪有“一间亭子间”，伊个位置就勒“灶披间”个上头、晒台下头个空间，高度大约莫是勒2米，面积大约莫是勒6到7平方米，伊个朝向是朝北面个，大多数是用唻堆放杂物，少部分是拨屋里向个佣人居住个。老底子个上海迭座城市，“电话亭”遍布勒上海城区每一个角落个里向，就连每条街道侪拥有“电话亭”，一般唻讲是交关狭小个，伊个平方大约只有2到3个平方，只有少部分规模少许大一眼，因此上海人邪气欢喜拨“电话亭”叫作“电话亭子间”。或许，勒有关于老上海各类人事物情个电影搭电视（连续）剧当中，吾伲还有可能会看到“各种类型个电话亭子间”，还就算是拨90后搭00后个年轻人看到以后，像迭能个一类人还覅一定就会认得的。  从上海迭座城市拨解放以后，辰光一直要跨越到20世纪90年代个初期前头，除忒各种类型个大小商店、各级政府机关搭某些大人物会去“拥有电话机”以外，“电话机”勒普通老百姓个眼睛里向，并覅是属于啥个必需品哦，而是属于绝对个奢侈品。勒通常情况唻讲伐，要是呒没啥个交关要紧搭重要个各类人事物情，几乎可以讲是用覅着电话机，而且勒绝大多数个辰光，就可以通过写信唻解决各类问题个，吾还记得勒老里八早，市内通信只需要四分邮资，外省市是八分邮资，等到吾也会写信以后，曾经就拨自家个尼表姐沈清写过一封情真意切个信，侪因掰搿辰光伊是搭尼姨妈倪榴英居住勒一道个，伊个屋里距离外婆张榴妹家是顶近个，顶多只有半站路之远，希望伊搭伊个老娘能多去看望照顾外婆一家。畀过，勒掰搿辰光邮资已经涨到两角洋钿。勒掰搿辰光，吾之所以要去写信，侪是因为国家规定，每一个小学生侪要去学会写标准个信，今早恐怕通通忘记得一干二净，已经覅会写信！只有是碰到交关要紧个事体，侪会去使用电话。另外就是，男女青年到勒谈恋爱轧朋友个年龄侪会去用电话机。即使是迭能样子、又因是上述两个原因要用到电话机，也会尽可能去做到长话短讲，用顶顶简练个语言，去拨一桩事体个前因后果讲清爽，只因勒掰搿辰光，绝大多数个老百姓手里向，是呒没多余个铜钿去煲啥个电话粥。  各类电话亭子间为老百姓服务个人，基本浪向侪是属于一些退休以后“实在呒没事体做个”兼职老爷叔搭老阿姨。既发挥着迭些人个余热，又多少可以去补贴一眼家用。一间“电话亭子间”起码有两个人，还要分两班制，即分早班搭夜班。迭一类人是从早浪忙到夜浪个，也有空闲个辰光。比方讲一旦碰着空闲个辰光，要是两个老阿姨个闲话，就会得一边结结绒线，一边搭另外一个人嘎嘎讪胡谈谈山海经；要是侪是两位老爷叔个闲话，就会得一边喫香烟、喫香瓜子之类个小零嘴、大口喝着泡好个一大杯浓茶，一边搭另外一个人嘎嘎讪胡谈谈山海经；讲一些张家长李家短、电话亭子间人唻人往个各类事体。到后唻，又增加一批下岗男女工人，参加到电话亭子间队伍中唻。  就勒掰搿辰光，传呼电话又是哪能为老百姓服务个呢？！顶早个电话机多数是黑颜色个，拨号键盘是圆形个，需要去旋转拨电话号码数字。还勒起初个辰光，打一通电话，是三分钟四分洋钿，人工叫一次电话要三分洋钿。居民一旦需要打电话搭对方联系通话个闲话，就要事先打电话到对方所在地个传呼电话亭子间里向，再由电话亭子间里向个老爷叔或老阿姨记录唻电电话个号头，抑或简单个内容以后，所写个内容通通是拨记录勒三联（连）单子上头个，再上门去通知“被叫户”，只有“被叫户”接到电话单子以后，再去跑到传呼电话亭子间回电话。辰光一长，有一些人搭电话亭子间关系交关要好个各位老爷叔或老阿姨，彼此之间又是邪气熟悉个人，很有可能就会覅开电话单子个，还会直接去对“被叫户”讲，侬有电话需要马上去回电。  每当各位老爷叔或老阿姨到“被叫户”个门口以后，会拿一只电喇叭用沪语哇啦哇啦喊：“某某弄（里）18号里亭子间嫂嫂啊，侬女婿打唻一只电话，需要侬马上去回一只电话啊！”“23号里向个张家姆妈，倷个伲子唻过电话哦，伊讲今早仔厂里向要加班，夜饭就覅回唻吃，覅需要侬回电话！”“31号客堂间里向个老王，侬单位唻电话，讲有得要紧事体，需要侬马上去回一只电话啊！”……勒掰搿辰光，上海滩还建造有层高6层楼高个新工房，去新工房服务是按照楼层唻结算，一楼是一角洋钿，依此类推，每上一层楼再加一角洋钿……  至今为止，吾依旧还能够清爽个记得迭能个一桩事体唻，迭桩事体就是－－勒起初个辰光，吾个大姨父沈小兔搭大姨妈倪榴娣是居住勒虹口区东汉阳路上头个，离伊拉屋里向顶近个一间“电话亭子间”，走路过去，顶起码也要走一站路之远哩，吾个屋里向掰搿辰光是居住勒拥有八百多年营造之乡美誉个高桥古镇浪。大姨父曾经就对吾是迭能唻讲个，因为伊本人搭电话亭子间里向个各位老爷叔搭各位老阿姨个关系是邪气好个，还会发香烟拨老爷叔喫，时覅时搭各位老爷叔各位老阿姨嘎嘎讪胡谈谈山海经搞好关系，每趟要是有事体需要搭伊联系个闲话，只要报出伊名字，迭些人就会晓得并及时通知伊个。 由于国家从1978年开始搞改革开放以后，老百姓个日脚也是越唻越好，就像芝麻开花一样节节高，传呼电话个服务价钿也是水涨船高，由最初个三分洋钿，就涨到一角洋钿、两角洋钿、三角洋钿…… 也正因为是迭个原因个缘故，大姨父伊还对吾唻讲到，每趟需要伊去回各类传呼电话个辰光，电话亭子间里向个各位老爷叔或各位老阿姨就是直接去通知伊个，而且每趟也是覅开啥个电话单子个。 伊还告诉吾，之所以那些老爷叔搭老阿姨会迭能唻操作，是由如下两个原因。第一个原因是因为：伊搭迭些人关系相处个邪气好；第尼个原因是因为：辰光一长迭些人侪知道，姨父屋里经济条件搭其他人比较起唻覅是顶好，相比较而言要稍许推扳一眼眼，能够省一钿是一钿。迭些人还对姨父讲单子免开，每趟侪能便宜一角洋钿…… 还据吾所获悉到个情况，迭个就是－－之所以迭一类人就要迭能唻做个闲话，就是有如下个四个原因哩。第一个原因就是：作为向“被叫户”收取铜钿个凭证搭依据；第尼个原因就是：凭着开具个三联（连）单子搭打电话个频次以后，等到辰光过忒一个号头，就搭邮电局唻一趟总结账，看看营收方面个账目到底有得多少，是属于交关繁忙个，还是属于邪气空闲个，迭间电话亭子间到底要付拨邮电局多少铜钿；第三个原因就是：勒掰搿辰光，电话亭子间是受到邮电局管辖个，邮电局是随时随地要唻查账目个；第四个原因就是：老爷叔搭老阿姨们凭电话单子及一个号头唻打电话个频次，结算工资报酬个依据。 还是勒掰搿辰光哦，电话亭子间，既拥有空闲个辰光，还拥有繁忙个辰光。一旦忙碌起唻，排队打电话是经常性会发生个，假使公用电话机交关少，夯不啷当也只是拥有两部电话机，打电话个人又是交关多个闲话，自然就要排起长长个队伍，还要是弄得覅好就很有可能要排十几米长，勒一般情况下头，凡拎得清个朋友，彼此之间还要空开一定个距离。嘎么，彼此间距离又会有多远呢？！大约就是勒二三十公分。要是有人打电话个辰光，要是有那么一眼眼个冗长，后头个人自然就会去催促前头个人，还会采用沪语方言搭对方唻讲道：“朋友，侬电话打好勒吗？！还需要多少辰光侪好能够去结束忒啊？！”……意思是搭对方讲，侬电话打得有一眼长，何时侪能通话结束啦？！ 呒没经历过掰搿年代个人，侪是覅晓得迭能个一桩事体个，因为吾是有去经历过个，所以或多或少还是晓得一眼眼个。还因为电话亭子间就好像是一个又一个个情报站一样，勒掰搿辰光，电话亭子间里向个那些传呼老爷叔们搭老阿姨们，绝对就是属于“消息灵通人士”，而且像迭能个一类个人或人群，对各条弄堂里向个情况，可以讲像小葱拌豆腐一样搞得一清二楚。如果讲要是有探亲访友个人来探望人，勒辣末生头忘记掉门牌号头以后，只要到电话亭子间去问一问就侪是可以晓得个。就勒掰搿辰光，居住勒一条弄堂里向个人，相互之间是呒没“隐私”好讲个，覅管啥个事体想要瞒瞒囥囥，也绝对是做覅到个，邻居隔壁之间假使少许有一眼眼个矛盾，相互之间眼扳数姚吵相骂，畀过吵过以后会“忘记得一干二”净，一旦对方有碰着问题，自家又能去解决个闲话，亦会相互关照照顾对方帮忙个……像迭种事体一到第尼天，电话亭子间里向个老爷叔搭老阿姨，保证会得连唻龙去脉也能晓得勒清清爽爽。迭种情同一家人个温馨场面，是上海人弄堂生活中一道独有个风景线，覅仅能够令人刻骨铭心，还是交关能令人回味无穷个，今早恐怕就难以再看到。有些大嘴巴、喇叭嘴个老爷叔搭老阿姨，还会得拨晓得个各类事体搭消息，覅管是好还是坏，通通侪会讲出唻，因此有些家庭还会搭迭些人搞好关系，希望迭一类人嘴巴搭口风要紧一眼，覅要到处去乱放喇叭，到外头去瞎讲八讲！ 吾第一趟认得并晓得“电话机”，就是勒吾上小学一年级个辰光，勒掰搿辰光，家母倪榴珍是勒中药店做生活个，药店里向就拥有一部黑颜色旋转拨号电话机。有一天，吾要拨一块红双喜牌乒乓板搭一只红双喜乒乓球拿到学堂里向去白相，家母生怕会得影响到学习，就坚决覅允许带到学堂里向去，还拿起电话机假装打一通话，讲侬个老师覅允许侬带到学堂里向去，带去个闲话就要没收忒个，吾就搭家母争吵吵闹起唻，结果家母实在是拗覅过吾，也只好让吾带到学堂里向去，等放学以后还对家母讲：“老师根本呒没没收过吾个乒乓板搭乒乓球！”之所以吾会搭家母去争吵吵闹，是因为吾晓得勒掰搿辰光电话号头是六位数字，家母假装去拨三到四个电话号头，就是勒骗野人头！ 20世纪90年代初期，吾还居住勒高桥镇，邻舍隔壁过房爷汪世洋家里购买一台日本进口个21寸彩色电视机，掰搿辰光吾个吾里只有一台上海产个“飞跃牌”18寸彩色电视机，还到伊个屋里向看过两三趟电视，总觉着比自家屋里向个电视机就要唻得清晰好看，色彩度也显得更加真实。但畀过，伊拉打开迭台电视机看电视个辰光，也是有一个小缺点个，覅晓得啥个原因，每日夜快头辰光大约是勒五点五十分到六点十五分，总归有人勒拨打电话个，勒迭个辰光是看覅到电视个，电视机屏幕也会转变成为黑颜色，只能听到打电话个声音，而且双方之间个通话音能够听得清清爽爽，只能等到通话结束以后，侪能显示出屏幕、侪可以去看电视，要覅然绝对是看覅到电视个，基本浪向每天侪是迭能个，后唻经过研究，侪晓得打电话会得干扰看电视。 像“程控电话”拨世界科技发展史认定：“属于第尼趟科学技术革命”。“程控交换”勒1960年由美国贝尔公司开始试用“程控交换机”并获得成功，于1965年5月开通世界上第一部程控电话交换机，标志自动电话交换控制技术，从机电制布线控制发展到电子制程序控制。吾至今还能记得，勒20世纪90年代中期，上海市全面使用程控电话，拨号时长顶快缩短控制勒20秒，只要对方勒打电话或者电话打得繁忙，能听到忙音声。程控电话，既会显示拨打个电话号头；还会显示唻电号头；更会记录打电话个时长；打一通电话是每分钟一角洋钿。 吾又哪能会晓得打程控电话是一分钟一角洋钿呢？！侪是因为勒掰搿辰光，吾个三姨妈倪金英搭伊两个尼子【备注：大表哥朱琪搭二表哥朱彬。】是暂时借住勒吾大娘舅倪榴发借拨伊拉个老式新工房里向，迭个新工房是有六层楼高，一梯有六户人家，左右各有三户人家，厨房侪是公用个，勒房间个里向，既呒没卫生间设施个，也是呒没啥个电话机个，每趟要打电话勒，需要跑十分钟左右个路程到老镇上去打。某一天尼表哥就噱吾搭伊一道到老镇去白相，讲到今天晚上家里要搞聚会咪一点小老酒，就到老镇买一点熟菜伐，实际浪向伊顶主要个一桩事体是去打电话，电话打五十分钟左右，包括等待个辰光算勒其中，伊花费四到五块洋钿。后唻还是等过若干年以后，吾侪晓得伊勒掰搿辰光正勒热恋当中，打电话拨伊个女朋友，搭女朋友煲电话粥。 到1997年以后，全上海市一年安装有住宅电话70万门。自从迭一年起，全市个各类传呼电话业务量开始逐年往下降。至千禧年以后，上海迭座城市，全市传呼电话服务站拢共有得近4000个，电话机1.2万部。也就是从千禧年开始，各类公用电话亭子间，纷纷关张歇业，各位老爷叔搭老阿姨们只好打道回府。取而代之个是，建造一大批仿照英国红色电话亭个新型电话亭，最初所安装个电话机侪是属于投币电话机，打电话一块洋钿一趟，超过辰光还需要另外加铜钿。后唻伴随着科技个再一次进步，就改为插电话卡式个电话机。今早仔，因为每户人家个电话机搭手机已经全面普及，像迭能样子个电话亭，反而是成为一种摆设品搭装饰品，几乎是呒没人再到电话亭打电话！ 讲起唻千万覅要覅信，勒吾个屋里搭其他个人家就是属于覅大一样个哩，勒吾个屋里侪是率先拥有“大哥大”，后唻侪拥有个电话。“大哥大”实则就是“手提电话”个一种俗称，又拨国人称之为“砖头机”，只因“大哥大”看上去像一块大个砖头，故而就拨大家称之为“砖头机”。勒迭个前头，吾也只畀过勒各类香港电影当中看到过“大哥大”，其中若是有香港黑帮电影，黑社会老大就会手提一部“大哥大”手机，而且自家是覅拿“大哥大”手机个，一般情况下侪由跟班小阿弟拿勒手里向个，也只有需要打电话个辰光，侪会得去问跟班拿过唻。 “大哥大”是由美国摩托罗拉公司个工程师马丁·库帕勒拉1973年发明出唻个。1987年“大哥大”拨引进到中国，成为加速人们信息沟通搭社会交往个重要工具。吾所在个城市上海市是从1988年开始引进大哥大个，一部“大哥大”手机个价钿是人民币2万块。勒掰搿辰光，就算拥有去购买大哥大个铜钿，还是要去等待排电话号头。 吾还收集到迭能一条有关于“大哥大”方面个历史信息，勒吾所在个城市上海市，尽管讲勒掰时，有得覅少个各类企业或个人，虽讲是拥有全款支付“大哥大”手机个铜钿，还预先拨全部所需要支付个铜钿侪付忒以后，还需要整整等待一年以后，侪拿到手机号头。 吾仍然还能去记得，辰光要到1989年下半年个辰光，家父陆吉良也终于拥有一部“大哥大”手机，单位还另外拨伊配备有两块电池，就勒刚刚开始个辰光，还勒绝大多数个辰光，迭部手机始终侪是身处勒关机个状态下头，每当只有拥有要紧事体个辰光，侪会去开机打电话，等打好电话再拨手机关忒。为啥事体要迭能唻做呢？！只因充一趟电需要十几个钟头，即便充满勒电顶多只好去使用两个钟头。而且电话费也是邪气贵，有一趟覅小心拨打天气预报电话，等到下个号头唻账单，单子上显示出天气预报电话每分钟价钿就要两块洋钿。 勒掰搿辰光，据家父对吾讲过，勒上海市“大哥大”手机还出现供覅应求个情况，市政府为此还专门发过一个红头文件，要拨一些交关特殊个单位、工作与业务浪侪邪气繁忙、的的刮刮是需要用“大哥大”手机个企业优先去使用。勒掰时家父所在个单位，市政府优先就给予两部大哥大手机，其中个一部就拨家父唻使用，就是因为掰时家父已做高级会计师三四年时长，还分管着“财务”“后勤”“工会”“人事档案”部门，工作交关繁忙，寻找伊办事体个人又是邪气多。 到20世纪80年代中后期，属于“旧时王谢堂前燕”个电话机，亦拨“飞入寻常百姓家”，极少数有能力个市民，就陆陆续续开始排队申请安装电话机。一直到90年代初中期，全市市民开始装电话机个人数变得越唻越多。一直要等到1993年上半年，吾个屋里向也安装有一台电话机，勒掰搿辰光也的的刮刮是因为出于家父个工作需要。 勒掰搿辰光，每户人家安装一台电话机是需要“初装费用”个，为啥事体要迭能唻作呢？！为个就是弥补电信建设资金方面个覅足哦！据吾查阅到有关于中国电话机个历史资料以后，让吾晓得迭能个一条信息哩，吾伲国家就是从1980年个下半年起，开始收取市话“初装费用个”，迭个“初装费用”就是作为电信建设专用基金唻使用个。等到增收市话“初装费用”个政策对通信个发展起到邪气重要个作用以后，有三分之一个电话建设资金就是源自“初装费用”，“初装费用”成为支撑国家通信网持续高速发展个一个重要个资金唻源。像吾所在个城市上海市，一直要等到2001年7月1日个辰光，全市侪全面个取消“初装费用”。最初个“初装费用”就是人民币六千块钱，等到吾个屋里也安装好固定电话个辰光，价钿就降低到四千五百块钱。 据吾获知，勒掰搿辰光家父虽然的的刮刮工作是交关繁忙个，可以讲是一天比一天要忙，寻伊办各类事体个人也是有交关多，伊个领导袁公惠希望就算家父下班，一旦有事体还能马上联系到伊。但是勒最初个辰光，伊对装固定电话多多少少还有一眼心覅甘情覅愿。伊还对领导讲过个，勒单位里有公用电话，伊个办公室也是有电话机个，到屋里又有得“大哥大”手机，就覅需要去安装啥个电话机，又何必要去安装电话机啊，覅仅是属于浪费个，又是用覅着个嘛！伊对吾讲过，还要想去公私分明，认为下班以后就跟上班呒没关系，就覅要再联系伊，伊好借此休息休息，否则一天忙到晚就忙覅过唻，是邪气沙度！一直坚持到后唻，实在是呒没办法勒，侪去安装电话机…… 虽讲勒1993年上半年度就已经装好固定电话，但是勒1992年下半年度就已经开始向邮电局申请安装固定电话，与此同时铜钿也全部付清。由于勒掰搿辰光，安装固定电话是需要排线、电话“总机门子”搭每户“分机门子”个，【备注：老底子安装固定电话是需要“门子”，个，“门子”是有数量个，一个电话号头占总机个一个门子数，专业个名称叫“端口”。】只因为勒掰搿辰光，勒吾家个附近已呒没电话“总门子”搭每户“分机门子”哦，已经拨率先申请个人安装，需要去耐心等待，还要去排新个线搭新个门子，啥个辰光能好还覅晓得。 吾还清楚个记得，当电话机安装好以后，是呒没电话号头个，还是过一个礼拜以后侪拥有个。邮电局还向吾伲赠送一本电话号码本，本子里向记录有高桥镇所有私人安装电话人家个号头以及电话户主个名字，就连吾伲吾里向电话号头以及户主个名字也拨印勒上头。 覅仅仅是迭能样子哩，等到电话机安装好以后，家父只为测试电话机性能以及打电话所产生个效果到底是哪能个，第一通电话就打拨黄锦荣老伯伯，伊要比吾个屋里早一年先安装好电话机。伊既是家父同一个单位里向个同事，与此同时又是吾姑父黄锦民同父同母个亲阿哥。只畀过，彼此之间所在个区域是覅一样个，伊是勒浦西地区上班个，家父是勒浦东地区上班个。就勒打电话个全过程当中，黄伯伯还趁机教育过家父个，因为伊老早就收获并晓得，起初家父是覅大愿意去装电话机个，讲家父是覅领市面个人，要去多领市面，今早只要是有条件个人家，通通侪去安装电话机，浦东搞改革开放到今早也已经有三年辰光，新区政府也已经成立，一旦拥有各类公私要紧事体，联系起唻，覅是交关便当吗？！侬哪能还是嘎么落伍跑勒后头…… 每一个时代侪有其独一无二个特征，而且处勒覅同个时代、覅同区域个里向，其特征搭特点覅但是覅相同个，更覅可能是一色似样个。比方讲：勒20世纪70年代流行趋势之一就是：结婚需要“48条腿”搭“三转一响”；到80年代个流行趋势之一就是：男女朋友开始流行“跳跳各种交谊舞”“唱唱各种流行音乐（歌曲）”；到20世纪90年代初中期个流行趋势之一就是：家庭开始去安装私人固定电话…… 因为勒掰搿辰光“电话”是属于交关流行个，又加之每户人家陆陆续续个普及电话，电话费也逐年逐步下降，亦是一个邪气好个题材，因此北方个相声演员搭上海个滑稽戏、独角戏演员侪创作并讲过有关于《打电话》个段子。比方讲：马季、郭启儒讲过一个相声段子叫：《打电话》；相声演员回婉华、胡仲仁讲过传统相声段子《打电话》；王双庆、吴双艺、童双春讲过滑稽戏《打电话》个段子；刘福生、周艺凯讲过滑稽戏《山东人打电话》……凡是种种真个可以讲是不胜枚举啊！就连后唻侪出现个新个曲艺形式“电视小品”，也有《打电话》。 迭些各式各样个、有关于《打电话》个段子，侪是勒讲眼啥么事呢？！所讲个内容就是－－勒覅少打电话个人群或个人当中，有一些打电话个人，覅管自家个事体是属于邪气要紧个，还是属于交关一般个，每趟打起电话，讲起各式各样个话语个辰光，就是属于啰啰嗦嗦覅管覅顾个，哪怕就是属于一些覅是交关要紧个事体，伊本人也要去打一个电话个，覅仅是迭能样子，伊会影响到那些有要紧事体、需要打电话个人；还有一些电话亭子间里向个或老爷叔或老阿奶，只因听覅大懂打电话个人所勒讲个各种类型个方言土语，覅仅仅是有闹过笑话个，还拨一些事体侪耽搁，还使得双方侪是闹得覅大愉快…… 吾始终侪是迭能唻理解、认得并去认为打电话迭桩事体个，既覅管是身处勒何种社会阶层里向个人群或个人；也覅管去操作何种类型个事体；更覅管伊本人勒讲讲哪能个闲话；既覅管勒操作各种类型个事体个辰光；也覅管是勒讲各种闲话闲话家常个辰光，自家就要尽自家顶大个一个可能性，顶好能去做到简明扼要交代清爽就好，只要拨“事由”“日脚”“辰光”“地点”“人数”搭需要带好“多少铜钿”就行，实则是覅需要去啰里八嗦个去讲讲一大堆呒没用个费话。 但畀过，就有一些人，平时勒打电话搭其他人勒交流个辰光，就是主次分覅清爽个，就会勒前头啰里八嗦废话连篇讲一大堆，要等过三五分钟，还呒没拨顶重要个一桩事体讲出唻、讲得清爽明白，让人覅是感到有些丈二和尚摸覅着头脑，就是覅晓得伊到底要讲啥！ 比方讲：几十年老友长时间呒没见面，打电话邀请老朋友见面聚会，是邪气简单个一桩事体，只要拨“日脚”“辰光”“地点”侪交代好，再去讲“聚会理由”“铜钿要带多少”就行。打电话个人并覅是迭能个，固定电话接通以后，先用变声变调让对方去猜，直等到猜正确以后再继续讲。接下唻用沪语方言讲：“侬迭只抽筋赖棺材夜饭喫过勒吗？侬真覅是么事，吾近抢把听到阿六头老娘勒讲，前抢把侬勒拉打喷嚏个辰光拨老腰弄伤勒，为啥就覅能对吾讲，吾就好唻探望侬勒，侬哪能介覅够朋友，连得几十年唻老朋友也覅告诉一声！”…… 【备注：①：文章为作者原创；②：各种电话机图片、传呼电话图片以及电话亭子间侪是唻源于网络上头，末脚四张电话亭子间图片侪是作者拍摄于家里附近个；③：万分感谢原创图片。】 杜老倌侠客居（陆伟）写于2019年07月17日礼拜三夜里向 |
|
|
