 有诸人啊，平常辰光弗诚心，碰着事体末再想着要临时抱佛脚。家生器具侪备好，沐浴净身，名曰“生活要有仪式感”，端正吃斋念佛一个号头，求神仙老爷，各路菩萨保佑。  但不过啊，临时抱佛脚，抱弗好，佛还踢倷一脚。讲讲末一个号头，叫啥阴历也分大小月个呀，有辰光廿九日，有辰光要三十日得唻。临时抱佛脚重点就是个临时，弗会得去看历本个。 乃末好，搿一个号头齐巧三十日。倷覅看只多仔一日天哦，一日天得唻！要多吃一日素得唻！老发头吃素弗单单是弗能吃荤腥，油也弗能碰该！据说只好吃吃盐水煠茭白勒咸菜拌豆腐，啊要难行哦！浑身难过，无娘法念。 该个末就是“吃素碰着月大”。  苏州人一脚用该个说法来形容“弗落巧，弗碰巧”个情况。拣仔一个号头吃素，结果碰着大月里要三十日，啊是弗落巧？一般来讲呢，出现个也侪是比较差个情况。 譬方说，伲今年本来端正要想勒四月底五月初，天最好个辰光是西班牙旅游个。朆壳张，新冠疫情一来，全部侪泡汤，“吃素碰着月大”。 再看看西班牙呢，加二有劲。明明搿个毛病搭俚笃是浑身弗搭界该。先是中国爆发，通报全球，再是俚笃隔壁乡邻意大利。一月底个辰光西班牙就发现仔一个输入性病人哉，到后首来三月份爆发，当中横里有毛毛叫两个号头个辰光好采取措施，管控病人个。 结果全部浪费呀！ 现在倷去看看欧洲疫情榜，头一名已经弗是意大利哉，4月3号就拨西班牙超过去哉，死亡人数也是不相上下。  好好叫一个国家，捺亨会得弄成实梗，原因是多种多样个。但不过其中有一个倒是亦搭伲今朝个主题搭界个。 大家侪晓得，欧洲国家弗管倷阿有国王无不国王，政府领导人侪是要民选个，西班牙也是。但不过选出来仔首相以后，还要组成功内阁，再能算是正式当选，俚笃就搁勒该搭哉。 现在个西班牙首相弗晓得阿有人晓得是哪位，作兴有种人因为俚买相好看勒，倒是认得个，叫佩德罗·桑切斯。  西班牙首相 Pedro Sánchez（佩德罗·桑切斯） 俚勒2018年四月里个大选里就当选哉，但不过俚个政党社会工人党勒议会里一脚朆能争取着半数以上个席位，按照俚笃国家个规定，是弗能组阁个。实勒，隔仔无不几个号头，只能再开大选，结果还是俚，议会人数呢还是弗够，捺亨办呢？再选！ 选阿选，选到仔今年个1月7号。该个已经是第三次大选哉，情况还是原吞原样，变也弗变，动也弗动。俚想想末，算哉，覅烦哉，豪燥组阁吧！就寻仔另外一只政党，组成功仔联合政府，总算拿桩事体敲定当。 但不过政府机关，人员到位开始办公总归还是要点辰光个。而就勒海俚笃刚巧选完结束无不几化辰光，新冠病毒就来哉。 乃是真个“吃素碰着月大”，碰着仔个赤佬勒海。 政府反应慢，老百姓弗当桩事体，中央搭地方弗协调，老年人口亦多，多方原因叠加，缠勒个拌，就变成功仔欧洲疫情最严重个国家哉。  之前做的一个关于西班牙新冠疫情的视频 |
|
|
