|
阿拉老底子每天呈送精彩文章一组 打开尘封的记忆，寻觅往昔的岁月
叙老底子事 忆老底子人 诉老底子情 作者：己丑老牛 改写：郭莉 朗读：潘慧芳 文字、语音审核：丁迪蒙 编辑：王乙其 前文回读： 闲话老上海（一）新城隍庙搭仔连云路闲话老上海（二）“哈尔滨”个记忆（四） 最近看到微博“上海老照片”浪向，发布了张照片，还配了段说明： 五芳斋得名于清朝道光年间，创始人姓沈，是江苏吴县陆墓采莲人。沈氏膝下有五个囡儿，分别取名玫芳、桂芳、莲芳、荷芳、芝芳，齐巧跟店里常用原料名字勒字面浪有相通之处，所以街坊邻居就开玩笑，拿伊个店叫作'五芳斋’。沈老板索介将错就错，正式拿店铺取名'五芳斋’了。 搿段微博并呒没说明，照片浪向到底是阿里只“五芳斋”，所以段子下头个跟帖，侪当是讲个是做粽子个“五芳斋”，一个个瞎七搭八评论起“五芳斋”大肉粽来了。
其实从照片来看，迭家“五芳斋”应该是上海个老“五芳斋”，伊是上海最早经营苏式糕团点心个一家百年老店。迭个“五芳斋”，开始辰光叫“姑苏五芳斋”，是1858年，苏州人沈敬洲勒勒上海山西路盆汤弄附近创办个。 勒上海，“姑苏五芳斋”首开，用水磨粉做汤团糕点，使得糯米粉吃口更加细糯香甜；同时又用莲心、芝麻、桂花、玫瑰花、松子咾啥苏州个传统原料做各种馅头，所以店名叫“五芳斋”。至于老板是否真个有五个囡儿，倒是也讲勿清爽了。 老“五芳斋”个看家产品有“赤豆糕”“黄松糕”“方糕”“定胜糕”搭仔各式甜个、咸个汤团，还有种苏州人特别欢喜个甜点——“桂花糖芋艿”，老上海一定侪晓得个。
1933年，“五芳斋”点心店搬到南京东路391号，发展成为当时上海最大个、名气最响个苏式糕团店。文革辰光，“五芳斋”牌子改成“红芳点心店”，直到文革结束再改回原名。九十年代初，我搭太太还去过，为屋里长辈买过“寿桃”“寿糕”咾啥。后首来听说伊又搬到四川中路了，我倒是再也没有去过。 小辰光，我总归要拿“五芳斋”搭另外一家有名个点心店混起来。伊家店叫“五味斋”，一字之差。“五味斋”勒上海有两爿：一爿勒“大世界”隔壁，专门做糟田螺、面筋百叶、鸡肉馒头、小笼、花色面，因为就是迭个五样，所以叫“五味斋”。另外一爿勒“大光明”电影院隔壁，也是做迭个五样点心。后来，大光明隔壁头个“五味斋”改成饭店了，迭个，就是大名鼎鼎个“人民饭店”，里向还出过一对全国劳模师徒，3号服务员桑钟培搭仔伊个徒弟瞿蕙均。
可惜，上头讲个“五芳斋”也好，“五味斋”也好，现在个上海年轻人搭仔新上海人侪已经勿晓得了。上海滩现在家喻户晓个“五芳斋”，是爿浙江嘉兴个粽子店。不过，要讲起迭爿粽子店，倒也真个是有点来历个。 1921年，是嘉兴“红船”扬帆之年，齐巧也是迭个“五芳斋”创业之年。勒勒嘉兴迭座江南小城里，一爿叫“荣记五芳斋”个粽子店开张了。“五芳斋”个意思是“五谷芳馨”。杭嘉湖平原自古以来农耕发达，经济繁荣，此地个官绅富豪生活闲适优裕。当时，江南一带以“嘉湖细点”最有名，各种茶食、点心、糕团咾啥侪做得邪气精致。嘉兴粽子就是传承了“嘉湖细点”精益求精个制作工艺，通过勿断改进，“五芳斋”个粽子名气越来越大。 当时，嘉兴叫“五芳斋”个粽子店有三家，相互之间竞争激烈，大家勒选料配料、工艺外观各个方面勿断创新，使得“五芳斋”粽子品种更加丰富多彩，大受欢迎。1956年，三家合并为一家，成立了公私合营五芳斋粽子店。 其实，嘉兴粽子老早顶顶出名个，是勒火车站卖个“嘉兴粽子”。伊搭无锡油面筋、苏州豆腐干、杭州小蒲桃一样，侪是火车站月台浪个畅销品。火车个乘客拿迭眼物事带到四面八方，迭眼地方特色产品个名气就越来越响了。火车站月台个“嘉兴粽子”当然勿好搭“五芳斋”味道相比。但是，外地乘客又哪能会晓得呢！只是最近几年，到嘉兴参观“红船”个多了，“五芳斋”也拿自家个分店开到火车个站台浪了，乃末，伊个名气终于是更加扩大了。
我有个娘舅，住勒嘉兴少年路，屋里出门一转弯，就到勤俭路浪个“五芳斋”粽子店了。几十年来，每趟到嘉兴去，我板要带几袋粽子回来。屋里人侪邪气欢喜，我连“中肉棕”也勿大买，只买伊个大肉粽。买个辰光，还一定要认好是“鸡牌”商标，因为只有“鸡牌”，再是的的刮刮个嘉兴“五芳斋”粽子呀。
朗读：潘慧芳 丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。
来源：“海上梦叠”公众号 |
|
|
