雪花膏，一个交关中国交关文艺个名字，伊老容易让阿拉回忆起阿娘搭外婆个老式三面镜个梳妆台浪，一只绿盖头白瓷身个小瓶头，只是现在勿大有人用搿个名字了。讲实在，“雪花膏”迭个名字要有味道多了。雪花膏是舶来品，《红楼梦》里阿拉根本寻勿着雪花膏个影子，勿晓得林妹妹宝姑娘是哪能保护皮肤个，听我外婆讲，伊拉小辰光垃绍兴乡下，冷天界揩好面以后，就用点猪油搨垃面孔浪，一样可以令皮肤雪白粉嫩。自从有了雪花膏，中国女人个梳妆台浪，涂上了一层现代个色彩。  重彩画 《女人花系列-妩》 2015年 李守白 雪花膏作为舶来品，早百多年前，美国旁氏、英国夏士莲、德国妮维雅咾啥洋护肤品已经登陆上海，搿种白雪雪个带香味个洋膏药当然价钿昂贵，一般极少人用得起。上海开埠后，西方生活方式随之进入。女学兴起，女性开始进入社会。上海女性特别注重仪容仪态，搿个是因为上海个职业女性群体个数目为全国之首，伊拉个一举一动无形中令女学生乃至家庭主妇纷纷看样学样。从纺织女工到公司女白领，侪会自觉恪守搿一点，但搿搭讲个仪容并勿是浓妆艳抹，显得风尘味十足。其实当时有交关大机构侪有明文规定，女职工要穿深色宽身旗袍，鞋跟勿能超过一定个高度，勿可以浓妆，但需平头正脸。  坊间俚语讲：一白遮九丑，就是讲女人只要皮肤白皙嫩润，拨人个第一眼感觉就是清秀端正，上海话讲起来“长得清爽相”。而搿种白雪雪个洋膏药就有搿种功效，热水揩一把面后挖一沰【dok，一点】朝脸孔上一搨，面孔马上会白起来，细腻起来，还会时隐时现散发阵阵香味。当然，搿种花头一般平民百姓是消受勿起个。但是上海个商家老早就懂得“女人个钞票顶好赚”铁律。  早辣上世纪初，一些上海本土厂家就纷纷仿效生产搿种白雪雪带有香味个洋膏药，还特地起了老上海个名字——雪花膏，搭【和】“可口可乐”个译名一样，又雅又朗朗上口，易记易传。就迭能，第一代Made in Shanghai个护肤品问世了。其中以广生行（今家化厂）个双妹牌雪花膏及家庭工业社个“蝶霜”最广为人知。顶早个雪花膏外形是仿效美国个旁氏包装，绿盖白瓷身，后来精明个生产商分析了各阶层女性个需要，得出越是层次高个女性越是抗拒雪花膏忒香味浓烈个结论，上海人称之为“一股拗味道”。  但一般小市民包括女工、保姆，从经济角度出发，自然一物多用最合适，越香越好，所以生产商以勿同颜色个盖头来区分同一牌子勿同成分搭勿同档次勿同香味个雪花膏，特别针对曹家渡杨树浦搭普陀个大自鸣钟一带个消费群，因为埃搭纺织厂比较多，女工集中，伊拉一般侪欢喜香气浓烈个雪花膏。针对伊拉比较省俭个习惯，商家推出简易包装个雪花膏，譬如铁盒装。同样铁盒装个还分大盒中盒和迷你盒，迷你盒因为价钿相对低，又譬如口红样方便携带而广受女白领搭女学生欢迎。  还有大瓶零拷个，搿个辰光街头巷尾个烟纸店侪有零拷雪花膏，价钿就更加便宜。乃末对上海女性来讲，每日早夜汏好面搨一层薄薄个雪花膏，根本勿是啥个奢华之举。哪怕最简陋个小亭子间里，辣窗台或者五斗橱个一角，侬侪会看见有一面鸭蛋形个镜子，前面摆一瓶或者一小盒雪花膏。整个房间显得老老温馨个。严格讲，雪花膏只合适春夏季，秋冬就要用较肥润个膏体，后首来就有了“冷霜”“面友”搭可以除雀斑个“百雀羚”，迭个名字也取得好！商家亏本生意勿做，化妆品生产是一个流程，就像笃鸡汤，头潽个原汁原味，自然也卖得顶贵，大都垃大公司出售，然后一潽又一潽，落脚个就送到烟纸店做零拷，卖得最便宜。雪花膏造福了上海女人，伊拉享受了化妆个乐趣。只要揩一把热水面，搨好一层薄薄个雪花膏（上海人简称为搨油，外省人称为“搽香”），整张面孔就会生出光泽，生动精神起来了。  有段辰光化妆被视为资产阶级生活，不过雪花膏并勿禁止。当时冬天还用一种蛤蜊油来护肤，价钿也便宜。蛤蜊油个外包装用个是真个天然花蛤，要寻介许多大小一样个花蛤还真勿容易，现在想起来，某种程度浪比埃种瓶装或铁盒装个要金贵。倒是工厂女工自信十足，身浪带有一股雪花膏香，依然故我，特别一推进伊浴室，各种百雀羚冷霜友谊香脂夹着热腾腾个水蒸气扑面而来，现在想起来倒是一种十分典型个五六十年代上海女人味道。勒拉缺乏时尚个年代里，搿种强烈个香味反而点缀了阿拉单调个生活。  到了60年代，一种香气比较清雅个面霜——柠檬霜问世了，伊个香味是柠檬味个，邪气淡，包装也老可爱，是浅淡色柠檬黄玻璃瓶浪同色个盖头，售价1块6角一瓶，从此我跟姆妈就跟伊结下不解之缘。改革开放后，美加净面市了，1.90元一瓶。后来，露美护肤霜问世，2.50元一瓶，还有啥个珍珠霜、银耳霜，迭个霜埃个霜，包装也越做越精致，品种也越来越繁多，价钿也越来越贵。勿过，令人感到欣喜个是，阿拉搿代人勒垃超市个货架浪，重新发现了年轻辰光用个护肤品——旁氏夏士莲妮维雅等。时过境迁，当年被视为高勿可攀个洋雪花膏，现在摆垃超市货架浪。从包装外观到香味实体，一点呒没变，令老上海个外婆们真有老朋友别来无恙之感。勿过现在个时尚姑娘对迭些老古董牌子是瞄也勿瞄一眼了。   市场浪世界大牌个化妆品琳琅满目，我勿晓得现在还有勿有零拷个雪花膏出售。搿个伴了阿拉几代上海人个老派雪花膏还存在伐？ |
|
|
