|
杨剑龙 上海人放风筝叫放鹞子，阿拉小辰光，有交关做鹞子放鹞子的经历。 人大概总做梦要飞。看到蝴蝶、小鸟勒了蓝天里飞，总想，人为啥勿能长翅膀飞起来，飞的梦就交把了飞机。放鹞子就成为阿拉这些小八辣子飞的向往。城市里空地少，最初放鹞子常常勒了弄堂里，小朋友用一截线，拎了一只小小鹞子在弄堂里奔，一群小朋友跟了伊屁股后头，又叫又笑。弄堂地方小，不是撞翻了脚踏车，就是撞到了买菜回来的阿婆，或者门口拣菜的阿姨，遭到一顿臭骂：“小赤佬，充军去呵？” 弄堂里放鹞子的结局，要么是听到邻居骂声，老娘在楼琅厢伸出头来叫转去；要么是鹞子飞上去挂了电线上拉不下来，一场游戏才算结束。 伊个辰光，小朋友大多自家做鹞子。当时阿拉做的鹞子老简单呃，基本只有三角形、衣形两种，不像现在鹞子有老鹰、蝴蝶、金鱼、蜻蜓、蝙蝠。做鹞子，要有竹篾子，晾衣竹竿、竹扫帚就拿来做材料，锯成需要的长短，用刀劈开，成三分宽，削去篾黄，留下篾青，用刀刮光。再用线将三根篾子扎成一个“干”字形，两根横的篾子一样长，再用线把“干”字的周围拉紧，就有了三角形鹞子的骨架。衣形鹞子要多一根篾子。然后，就用纸头糊上架子，在篾子架子上头两个接头地方系上线，这两根线必须下头长、上头短，否则鹞子飞不上去。还需要在鹞子下面贴两根尾巴，是控制鹞子平衡呃。阿拉常常去弄堂口胭脂店买几角一团的线，用一根筷子拿几个线团的线，八字形地绕在筷子上，就像纺织厂里的一只纱锭。 有了放鹞子挂弄堂电线的教训，做成鹞子后阿拉常常去寻空地放，人民广场成为首选。伊个辰光袋袋里呒么几张钞票，连公交车也舍不得乘，常常是“11路电车”步行去。阿拉邀弄堂里的小朋友一道去，一个小朋友两只手举着鹞子，鹞子的主人就拉长线，在举鹞子的小朋友松手后，拼命往前奔，如果有风，鹞子就腾空而起，飞上蓝天。有辰光，看看鹞子飞上去了，却一个倒栽冲撞勒地上，有辰光是鹞子两根线的角度呒么调节好，有辰光是鹞子的尾巴太轻，经过调节修整，鹞子还是能够飞上去呃。 放自家做的鹞子有一点成就感，手里不断牵动这根线，望着鹞子晃晃悠悠地往上蹿，心里头那种得意呒么闲话讲了。有辰光还可以拿一张张练习本的纸头，当中撕一只洞，穿进放鹞子的线上，让风拿迭张纸头吹上去，一直吹到鹞子那头，迭个叫“拍电报”。有得意，也有失意。有辰光不当心，线断了，半空中的鹞子就不知去向了，迭个叫“逃鹞”，侬追出去老远老远，看到自家的鹞子要么挂了树杈上，要么挂了电线上，侬只能“望鹞兴叹”，灰溜溜地回家了。 文化大革命期间，人民广场经常成为革命小将宣传“革命”的地方，再到伊面放鹞子不现实了。阿拉屋里住勒了六楼，我就想能弗能勒了楼上放鹞子？就用一根晾衣竹竿，在竹竿头上绑一只铁钩，拿放鹞子的线穿过钩子，用竹竿拿鹞子举到房顶上。上头风大，鹞子果然晃晃悠悠地飞起来了，我收了竹竿，立勒了窗口头不停牵动线，让鹞子飞上蓝天，等鹞子放稳了，我甚至躺了勒靠窗的床上，得意洋洋地勒了床上放鹞子。 有一年冬天，落雪了，慢慢地树上白了，屋顶白了，地上也白了。我突发奇想，迭个辰光放鹞子一定老有意思呃。我就拿出一只鹞子，举起晾衣竹竿，让迭只鹞子勒了风雪中悠悠地飞上天。雪大，风也大，鹞子勒了风雪里像一个斗士，勇敢地在风雪中不断升腾、不断摇摆。我收了竹竿，拿窗合上，仅留一条缝隙给放鹞子的线，躺了勒靠窗的床上，望着风雪中升腾的鹞子。后来在人生碰着坎坷与磨难时，我总想起这只风雪中的鹞子，不断挣扎、不断升腾…… |
|
|
