|
国宝级的文物， 曾养育两万人才， 却遭此惨劫。 拆山南祠之痛， 我们不能遗忘！ 南海沙头崔氏大宗祠（俗称山南祠），不仅係崔氏宗族祭祖嘅场所，更係养育一方人才嘅教育基地。崔氏大宗祠嘅建筑规模同格局喺岭南十分罕见，有极高嘅历史和艺术价值，但却因为人为嘅因素，俾人拆毁！ 山南祠究竟有几巴闭，究竟係掂俾人拆嘅，等我嚟话你知！ （一）山南祠究竟有几巴闭？ 崔氏大宗祠面积4270平方米（占地七亩），深118米，宽43.8米，大小堂室30多间，仲有五进殿咁多！（一般祠堂最多四进，即係入完一个门口，又有一个门口，又一重，再一重咁！）一共有108个门口，堂内恢弘宽敞，气势非凡！大家假设穿越到以前，想象一下当年嘅山南祠係几咁宏伟！ 首进 崔氏大宗祠首进係牌楼式嘅“五凤楼”。“五凤楼”係古代嘅一种固有规格楼名，建筑威仪，以石柱、木柱及木横梁等砖木石结构建成，分头门、仪门、殿堂等布局，飞檐翘角，画粱雕栋。三层五檐歇山式屋顶高高翘起，每个檐脊都有一陶彩凤，架上饰以精美嘅砖雕、木刻同石刻，人物故事、木雕花鸟，警世文字等图案，手工精巧，造形生动。喺岭南十分罕有，有极高嘅历史和艺术价值。门楼“崔氏宗祠”四个大字係明朝广东监察御史蔡结亲题（已失传）。 二进殿 “山南世家”嘅石牌坊係明朝巡抚、广东监察御史陈联芳所题。牌坊的花岗岩石柱雕成抱鼓形，石柱顶部的灰塑形似凤凰，中间的飞禽走兽，栩栩如生。灰塑下方，是雕刻精细的云海，两条盘龙活灵活现。 三进殿 “永思堂”的金漆牌匾係明朝两广总督王守仁亲笔落款（已失传），高大威武，气派非凡。呢度係崔氏族人婚姻喜庆祭拜嘅地方，有可容纳800人嘅礼堂，左右两边仲有两层嘅钟楼和鼓楼。 四进殿 高厅係供奉历代祖先神位嘅地方，庄严肃穆，两边墙及樑柱楹联林立，左右两边配有烧猪房和东厅。 五进殿 魁星楼係一座三层嘅楼宇，内设藏经阁，后面仲有花园等园林设施。 山南祠係沙头永思堂崔氏嘅总祠堂，用嚟祭祀始迁祖崔世英。永思堂崔氏嘅后裔遍布广东各地，单喺南海地区嘅子孙人口过万，每年喺港澳台及海外翻嚟寻根嘅子孙不计其数。 崔氏宗祠族人喺明、清两朝人才辈出，进士有5位，举人有20余位，监生过百人，仕宦、县令到将军、知府等共30余人，朝廷恩赐冠带、顶戴有90余人等，不能尽数。现代名人有缅甸华侨参政议员崔杰南、中央驻澳门办事处秘书长崔国潮等。 崔氏大宗祠（山南祠）清代后成为学校，文革嘅时候都冇被拆，竟然到咗1976年被人拆咗，实在冤枉！崔氏大宗祠办学41年（1929-1938年，1946-1976年）共培养学生两万多名，下面我地睇下崔氏大宗祠嘅历史演变啦！ （二）究竟係掂俾人拆嘎？ 要了解山南祠嘅历史，同埋拆祠堂嘅来龙去脉，我地一定要从头讲起！ ======{ 1542年 }====== 明朝嘉靖二十年（1541年）由辛丑科进士崔一濂、同期进士崔吉、举人崔甸，三人共同倡议建祠，发动沙头崔氏同人集资筹款，并于一年后（1542年）初步建成。 ======{ 1562年 }====== 经过二十年时间，建成原有的五凤楼、五进殿、一百零八个门的规模，直至1949年都冇变过。 ======{ 1739年 }====== 乾隆四年重修一次。 ======{ 1797年 }====== 嘉庆二年重修一次。 ======{ 1857年 }====== 咸丰七年重修一次。 ======{ 1893年 }====== 光绪十九年重修一次。 ======{ 1929年 }====== 民国十八年，由于沙头两等小学需要扩充（原开设于崔氏二世祠），将学校搬到山南祠，改名“育才学校”。设六级六班、教师七人、学生一百八十多人，校长为崔伯昊。 ======{ 1931年 }====== 民国二十年，改名“山南小学”。 ======{ 1938年 }====== 沙头沦陷，学校停课。 ======{ 1946年 }====== 光复，学校复办。由南海参议员黄鲁惠（水南黄保村人）任名誉校长，与旅缅甸华侨崔杰南，知名人士崔健南等人筹办复课。设六级七班，增幼稚班，教师十人，学生两百多人，定名“沙头中心国民学校”。 ======{ 1949年 }====== 学校共有十三个班，教师二十人，学生四百三十多人。 解放后，学校改名为“沙头中心小学”，第一任名誉校长为陆地，校长为卢岳。历代校长包括阮家仪、陈绍廉、李海天、卢文基......等。解放后，教育事业不断发展，学生人数逐年增多。沙头六乡嘅学校，只有初小四级，而沙头中心小学係完全小学，因此六乡嘅学生，读高小都必须嚟中心小学读书。 ======{ 1950年 }====== 学生人数众多，枱凳不足，将神台、香案、牌匾、楹联、屏风及家具都用嚟做枱凳。所有灵位和香炉通通撤走。 ======{ 1956年 }====== 设扫盲班。 ======{ 1957年 }====== 设夜中班。 ======{ 1958年 }====== 设初中日班。 ======{ 1969-1973年间 }====== 校长卢文基及九江教办何钱章多次找朗星书记崔永流商议拆祠堂，崔永流表态：“学校宿舍、教室部分漏水你地可以维修，课室唔够可以喺礼堂中间隔，但山南祠嘅地属朗星嘅，冇我地乡签名绝对唔可以拆！” ======{ 1974年底 }====== 九江公社副书记彭北仙喺沙头小学召开五乡书记会议，商议拆祠堂，建初中。与会人员包括城区梁国、水南卢笑颜、朗星卢炳、北村崔惠常、西桥卢全胜等人。 卢笑颜说：“部分课室漏水可以维修，但祠堂唔係危楼，应该另外想办法。” 梁国说：“我地城区冇钱支持建校” ======{ 1975年 }====== 九江公社干部再次喺沙头小学召开乡书记会议，但冇崔氏族人参加。本次会议通过拆祠堂建学校的方案，由朗星书记卢炳签字同意。 拆建组织机构如下：
======{ 1976年下半年 }====== 开始拆祠堂啦！
所得款项用于建校。 文革都冇拆，凭咩拆我地！ 试想，崔氏大宗祠嘅建造材料上乘，主体牢固，结构紧密，重量惊人。要拆卸係非常之危险嘅，仲未计拆卸嘅人工费同时间。咁大嘅投入，根本可以攞啲钱嚟维修祠堂，甚至建新校舍。再加上，当时拆祠堂冇征求过崔氏族人嘅意见，更冇政府部门红头文件下达，其实係不顾后果硬性强拆行为。 当年决策者，毫无保护文物嘅意识，完全忽视祠堂历经二十年时间先建成原规模嘅历史价值。崔氏大宗祠凝聚了四百几年嘅历史底蕴，係沙头人民嘅一座丰碑。崔氏族人为沙头及社会文化教育事业无私奉献祠堂，结果付出咗无法挽回嘅代价，毁坏了一座国宝级嘅历史文物。 1994年，南海将山南祠遗留下来的前两进建筑列为市级重点文物保护单位，2002年7月广东省人民政府公布为省级文物保护单位。2003年，时任广东省文化厅厅长的曹淳亮考察沙头文物保护单位时，认为崔氏大宗祠很有文化价值，他建议将崔氏大宗祠现存的建筑按照原貌进行修缮，尽可能恢复原貌，保持古代建筑风格。 南海崔氏大宗祠係岭南古建筑嘅代表，更係宗祠文化遗产嘅精髓。如果可以按照原貌复建，将成为沙头嘅文脉地标，带动当地嘅旅游业发展。 崔氏嘅兄弟姐妹们， 拆祠堂之痛， 我们不能忘记， 一定要传播出去， 将来若有机会重建， 有钱就出钱， 冇钱就出力， 冇力就发朋友圈！ 希望可以引起各方关注，为崔氏大宗祠争取更好的明天！ 如果你有山南祠相关的摄影作品，欢迎您把高清原照发至guangdongcuishi@qq.com。让我们来弘扬山南祠的历史文化吧！ 以上资料源自《崔氏族谱》及佛山广文新局发布信息。转载请注明出处，谢谢！ |
|
|
