天冷了，想吃罗宋汤

2019年01月06日  星期日   

天冷了，想吃罗宋汤  

  

　　文 / 管弢

　　天冷了，想吃“罗宋汤”个心就蠢蠢欲动了。

　　据说罗宋汤起源于俄国，英语中俄国是Russia，上海人音译为“罗宋”。既然搿种汤是“罗宋人”经常吃个汤，上海人就叫伊“罗宋汤”了。

　　正宗个罗宋汤需要用当地出产个红菜头增色调味，外加牛肉粒和胡萝卜。但是到了上海，红菜头变成了稀罕物，而且口味偏重，其他地方个人不大欢喜搿种味道。有聪明个上海厨师就试用番茄酱代替，又有人嫌口味偏酸，最后改成一半番茄酱一半鲜番茄，一道放到油锅里煸到出红油，加水烧开以后再加土豆条、卷心菜，就此形成了独具特色个上海改良版“罗宋汤”，口味酸中带甜、甜中飘香、肥而不腻、鲜滑爽口，相当受吃客欢迎。讲究个上海人家还会炒一口油面，精制油烧到八分热，关火炒面粉，翻炒成糊以后加进汤里。搿能烧出来个汤特别浓稠，跟正宗西餐厅里也就相差不多了。

　　勿过，留拨我深刻印象个罗宋汤呒没介考究，而是伊个“精简版”。当时处于三年困难时期，菜场里基本看勿到牛肉，就是偶尔有少量供应，价钿也相当高，一般人侪不舍得买。葛末想吃罗宋汤哪能办呢？就有聪明个上海人用红肠代替牛肉，等整锅汤开始沸腾，放入红肠块一道烧，创造出“红肠版”罗宋汤。或许因为红肠颜色更加接近番茄汤色，红肠版罗宋汤个颜色比“原版”更加明亮，散发出个香味也别有风味。可以讲，红肠是阿拉上海罗宋汤个灵魂。

　　有趣个是，当年只要看看罗宋汤中红肠个粗细和多少，大致就能推算搿家人家个经济条件，毕竟红肠含有肉个成分，属于荤菜。条件稍差个人家，姆妈个刀工肯定特别好，不仅红肠切得细，而且一锅汤里只有数得清个几根“红肠丝”，骗骗“野人头”。家庭条件好一点个，切红肠个辰光就爽气交关，不是切片就是切块，有辰光碰着“连刀块”个红肠，筷子夹到一片能拎起来一串。我小辰光最喜欢捞这种连刀块红肠。

　　自家屋里烧个罗宋汤虽然味道不错，但总归谈勿上正宗，假使要吃正宗罗宋汤，还是要去西餐厅。当年上海比较有名个吃罗宋汤个西餐厅是“德大”，伊拉个汤呈现猩红色，盘子个边缘挂着红色个茄汁油，浓汤中依稀可见切碎个卷心菜和小块牛肉。上海人吃西餐，有自己独特个一套，吃个不仅是情调，更是老派生活个余韵。吃西餐需要讲究仪式感，尤其是罗宋汤。罗宋汤作为开胃菜，先上桌，老克勒们拿起调羹，由内向外舀。舀个时候不能碰盘子，喝个时候不能发声音，大家侪低头猛喝，感觉既仔细又严肃，不过以阿拉小囡眼光看还是蛮滑稽嗰。吃到最后一点盘底汤，我也勿愿意浪费，要么用左手端盘子侧过来喝，要么用面包蘸蘸，总归要吃得清清爽爽。直到罗宋汤撤下去，主菜上桌，大家才交头接耳，开始边吃边聊。搿一碗罗宋汤，包含了老派西餐个体面和温暖。

　　不少上海人记忆中侪会有搿能个印象，每隔一段时间，屋里总会有人喊：“想吃罗宋汤啦！”搿碗汤已经从正规个西餐馆“走”出来，走进企事业单位个食堂，以及普通家庭，甚至辣交关中菜馆里也有供应。可以讲，当年罗宋汤辣辣上海饮食行业个江湖地位就是现在个小龙虾也望尘莫及。一百个家庭煮妇就有一百种不同版本个罗宋汤，交关老上海侪有一份罗宋汤情节。