沪语朗读:杨迅 朗读者 賊 来源:网络 沪语改写:丁迪蒙 朗读:杨迅 有位青年畫家,勒還沒成名之前,住勒一間邪气逼仄个小房间里,靠为别人畫像維持生活。 有一日天,有個富人經過,看伊个畫工邪气細緻,老歡喜个,便請伊幫忙畫幅人像。雙方約好个酬勞是一万块。 一個礼拜後,人像完成了,富人依照約定來拿畫。搿个辰光,富人起坏心了,欺画家年纪輕又没成名,勿肯按照原先个約定付酬勞金。富人心里想:“畫里向个人像是我,搿幅畫假使我勿買,葛末絕对呒沒人會去買个。我又何必花介许多钞票來買呢?”於是,富人就賴賬了,伊讲只願意出三千块買搿幅畫。 青年畫家呆脱了,伊從來也呒沒碰着過搿種事体,心裡有點慌,伊讲了交关闲话,搭富人據理力爭,希望富人能够遵守約定,做個有信用个人。 “我只好出三千块買搿幅畫,侬覅再囉唆了。”富人認為伊居上風。“我最後問侬一句,三千块賣勿賣?” 青年畫家晓得富人是故意賴賬,心里向邪气勿平,伊用堅定个語氣讲:“勿賣。我寧可物賣搿幅畫,也勿願意受侬个屈辱。今朝是侬失信毀約,將來一定要侬付200倍个代價。” “笑煞脱人唻!200倍啊!是60萬咾!我再勿會介笨,出60萬來買搿幅畫唻。” “葛末,阿拉就等勒海看好了。”青年畫家對牢仔富人讲。 經過搿桩事体个刺激以後,畫家搬场,離开了搿個傷心个地方,重新拜師學藝,日日夜夜練習画图。 皇天勿負苦心人,十几年以後,伊終於闖出了一片天地,勒藝術界浪成為了一位知名个人士。 伊個富人呢?離開畫室以後,第二天就拿畫家个畫搭仔伊拉讲个闲話忘记脱了。 直到有得一天,富人个好幾个朋友侪來搭伊讲:“有桩事体邪气奇怪!阿拉去參觀一位成名藝術家个畫展,里向有幅畫一口價,畫里向个人搭侬長得一模一樣,標價是60萬。好笑个是,搿幅畫个標題竟然是——《賊》! 富人好像拨人當頭打了一棒,伊想起了十多年年前个事体。對自家个聲譽傷害实在是忒大了,伊立刻連夜趕得去寻畫家,向伊道歉,並且用了60萬块買回了伊幅人像畫。 青年憑勒勿服輸个志氣,讓富人低下了頭。 搿個年輕人名字叫——畢加索。 |
|